Die afgelope week se koue weer is genoeg om enigiemand te dryf na die naaste bank.
Ons blameer jou nie. Inteendeel, Popflake is `n toepassing wat jou kan help om jou tyd voor die skerm optimaal te benut.
Deesdae is ʼn goeie fliek so skaars soos hoendertande. Wanneer die geleentheid vir ʼn tydjie voor die skerm opduik, sukkel die meeste van ons om aan iets te dink wat die moeite werd is om te kyk.
Dit is juis hierdie dilemma wat ʼn groep studente motiveer het om Popflake, ʼn toepassing wat flieks opspoor met behulp van sleutelwoorde, te ontwikkel.
Al wat jy moet doen, is om die sleutelwoorde te kies wat opsom wat jy in ʼn fliek soek. Byvoorbeeld, “horror”, “teenagers”, “woods” – nie die beste voorbeeld nie, maar julle verstaan die beginsel? Die sleutelwoorde is veronderstel om verskeie aspekte van die fliek te beskryf.
Wat Popflake onderskei van Wikipedia of IMDB, is dat dit probeer om nie die storielyn weg te gee nie. Anders as wanneer jy Wikipedia raadpleeg en voor jy jou oë uitvee, weet jy hoe die fliek eindig.
Al die flieks word met die hand etiketteer. So ver het die beta gebruikersgroep 820 flieks klassifiseer. Hulle het egter ook jou hulp nodig om die databasis uit te brei. Om deel te wees van die proses, los net vir hulle ʼn boodskap op hul Facebook-blad en jy sal toegang kry tot die databasis.
Popflake wys ook die fliek se telling, soos aangedui op Rotten Tomatoes, IMDB, en Metacritic.
Die toepassing is tans slegs beskikbaar vir iPhone, maar ʼn Android-weergawe word wel ontwikkel.
