Language:
SEARCH
  • Onlangse bydraes

  • Kategorieë

  • Argiewe

Sekuriteit

Phishing-poging met die onderwerp “SUNCOM”

Woensdag, Februarie 5th, 2020

’n E-pos vanaf `n sun.ac.za adres met die onderwerp “SAFECOM – 5 / FEBRUARY / 2020” is aan personeel en studente versend. Die e-pos vra dat jy op ʼn skakel kliek om `n boodskap van “SAFECOM” te lees. (sien ook voorbeeld onder)

Hierdie is nie ’n geldige e-pos nie, maar ’n strikroofpoging wat jou sal lei na ’n vals webadres.

Deur op skakels in strikroof e-posse te kliek en jou inligting te verskaf, gee jy aan misdadigers toegang tot jou persoonlike inligting en rekeninge. Indien jy vermoed dat jou rekening of toestel gekompromitteer is of jy agterdogtige aktiwiteite oplet:

  • Verander dadelik jou wagwoord by www.sun.ac.za/password.
  • Kontak die IT Dienstoonbank deur ʼn versoek aan te meld of 808 4367 te skakel.
  • Meer inligting is beskikbaar op ons blog en Twitter.

Dataprivaatheid

Donderdag, Januarie 30th, 2020

Dataprivaatheidsdag is in Suid-Afrika nog in sy kinderskoene. Dié inisiatief is reeds sedert 2007 aktief in Europa en twee jaar later het Amerika ook begin deelneem. 

Dataprivaatheidsdag (in Europa ook bekend as Databeskermingsdag) ʼn internasionale dag wat jaarliks op 28 Januarie herdenk word en die bewustheid rondom die beskerming van persoonlike data bevorder. 

Alhoewel Databeskermingsdag reeds vir meer as tien jaar bestaan, is die bewustheid oor die beskerming van data van kritiese belang. Die rede is tweeledig. Eerstens is die voorkoms van databreuke kommerwekkend, ook by groot maatskappye wat voldoende maatreëls in plek behoort te hê om kliënte se data te beskerm.

Wat ons bring by punt twee – GDPR. Voorheen was maatskappye nie wetlik verplig om kliënte se data te beskerm nie. GDPR en POPI-wetgewing het dit verander. Maatskappye word nou verantwoordelik gehou vir kliëntedata en kan swaar beboet word as hulle inligting onbeskermd laat.

Maar hoekom is data so belangrik? Volgens Mark Barrenechea, Hoof Uitvoerende Beampte by OpenText, bou ons elke dag stukkie vir stukkie ʼn digitale weergawe van onsself. Deur middel van jou digitale voetspoor is dit dan maklik om inligting oor jou te kry – persoonlike inligting soos gebruikersname en wagwoorde, jou fisiese bewegings wat deur Google afgeloer word of jou belangstellings, gunsteling-restaurant of vriende. Algoritmes kyk na jou inligting en voorspel jou optrede. Elke stukkie inligting maak deel uit van die groter prentjie wat tot jou nadeel gebruik kan word.

Tegnologie maak dit maklik om data te deel en daarom moet jy self verantwoordelikheid neem vir die beskerming daarvan. Ons kan nie meer staatmaak op maatskappye of sosiale netwerke om ons digitale identiteit te beveilig as ons dit self vrywilliglik blootstel nie. Dis duidelik uit verskeie databreuke oor die afgelope paar jaar – insluitende groot maatskappye soos Facebook en Google.

Databeskermingsdag is net een dag in die jaar waar data-eienaars (enigiemand wat ’n digitale platform gebruik) bewus gemaak kan word van die belangrikheid van data. Ons moet egter elke dag kennis dra van die risiko’s. Hoe kan jy jou data beskerm? Jy weet reeds, jy moet dit net begin doen of beter doen. www.digitalguardian het ʼn deeglike gids oor databeskerming, maar hier is 10 wenke om mee te begin:

  1. Gebruik netwerke met enkripsie wanneer jy toegang nodig het tot belangrike inligting. Gratis Wi-Fi is handig, maar dis ’n risiko. Indien jy webwerwe besoek wat nie https gebruik nie, onthou dat jou data deur enigiemand anders gesien en misbruik kan word.
  2. Kies sterk wagwoorde. Weet nie hoe nie? Hier is ʼn paar wenke. Gebruik twee-faktor bekragtiging of nog beter – ’n wagwoordbestuurprogram.
  3. Beskerm jou wagwoorde. Moet dit nie neerskryf nie. Moet dit nie deel nie. En die belangrikste van almal – moenie dieselfde wagwoord gebruik vir al jou sosiale netwerke of ander webwerwe gebruik nie.
  4. Dateer jou sagteware op wanneer dit jou por. Moet dit nie ignoreer omdat jy haastig is nie – dit kan ʼn belangrike sekuriteitsopdatering insluit.
  5. Dateer gereeld jou an-tivirus sagteware op. Nuwe weergawes van virusse en malware word daaglikse vrygestel. As jy dit nie opdateer nie, is jy ’n maklike teiken. Gebruik anti-virus programmatuur vir jou mobiele toestelle – hulle is selfs meer kwesbaar as jou rekenaars.
  6. Gaan die privaatheidverstellings op jou slimfoon na. Dink voordat jy sommer vir ’n toepassings toegang gee tot jou foon.
  7. Sluit jou slimfoon en tablet wanneer jy dit nie gebruik nie. Jy gebruik dit vir sosiale media en bankdienste en dit bevat al jou persoonlike inligting. 
  8. Aktiveer die “remote location” en die toestel-skoonvee funksies. Indien jou mobiele toestel gesteel word, kan niemand toegang tot jou inligting kry nie.
  9. Verwyder jou data van ou toestelle, byvoorbeeld ou slimfone wat verkoop, weggegooi of vir iemand anders gegee word.
  10. Rugsteun jou data op ʼn daaglikse basis. As jou jy jou toestel verloor of dit malware kry, het jy nog ’n kopie.

 [BRONNE: https://www.forbes.comhttps://www.techradar.com]

Onthou jy daai fliek wat jy afgelaai het?

Maandag, Januarie 20th, 2020

Met `n vinnige internetkonneksie en genoeg internetdata is dit vandag moontlik om die nuutste flieks en reekse aanlyn te kyk. En dis heerlik om alles tot jou beskikking te hê – wat jy ookal soek, kan jy aflaai. Dis nou wel nie heeltemal wettig nie, maar hoe gaan `n filmmaatskappy in Hollywood in elk geval vir jou in die middel van nerens opspoor?!

Ongelukkig is dit hier waar jy die fout maak. Tot redelik onlangs het TV-netwerke en filmmaatskappye nie te veel moeite gedoen om die aflaai en verspreiding van onwettige flieks en reeks te kniehalter nie. Dit was net eenvoudig te moeilik en nie koste-effektief nie. Dis egter nie meer die geval nie. 

Informasietegnologie ontvang gereeld e-posse ontvang vanaf maatskappye soos Warner Bros. en Columbia Pictures wat aandui dat onwettige, kopiereg materiaal afgelaai en versprei word vanaf IP-adresse binne die universiteit se netwerk.  Hierdie e-posse sluit die spesifieke IP-adres, sowel as die naam van die materiaal wat afgelaai en versprei is in. IT word gevolglik genoodsaak om die persoon aan wie die adres behoort te kontak en `n skriftelike waarskuwing te gee.

Die verspreiding (“seeding”) van kopieregmateriaal sonder `n lisensie is beide `n kriminele en siviele oortreding in Suid-Afrika, selfs al is die verspreiding oor BitTorrent. In Suid-Afrika, onder die Kopiereg Wet van 1978, kan dié oortreding jou in die tronk laat beland vir tot 5 jaar en `n boete van tot  R10,000 vir elke item wat jy versprei.

Tussen 2010 en 2012, is 200,000 mense reeds gedagvaar vir die oplaai en aflaai van kopieregmateriaal deur BitTorrent.

So, voordat jy die nuutste episode van jou gunsteling reeks gou aflaai, oorweeg eers mooi of jy die kans wil waag. Dis dalk veiliger om van `n diens soos Netflix of Showmax gebruik te maak.

MEER INLIGTING:

Hoe werk BitTorrent en “seeding”?

http://en.wikipedia.org/wiki/BitTorrent 

http://www.bittorrent.com/help/guides/beginners-guide

 


 

Eduroam-toegang vir besoekers (eVA)

Woensdag, November 6th, 2019

eVA (eduroam besoekerstoegang) is ’n nuwe diens wat besoekers aan hoër onderwys- en navorsingsinstellings in staat stel om toegang tot die veilige en sekure eduroam Wi-Fi netwerk te verkry. As addisionele identiteitsbestuurmiddel, is eVA ’n platform waar besoekers aan Universiteit Stellenbosch wat slegs tydelike internettoegang benodig op eenvoudige en veilige manier kan registreer. 

Wat is dit? 

eVA verskaf ’n meganisme wat gemagtigde personeel by eduroam-instellings toelaat om ’n besoeker te begunstig en tydelik regte aan toe te ken vir ’n spesifieke tydperk. Aangewese eVa-administrateurs kan bepaal wie geregtig is om besoekers te bestuur en hoe lank besoekers toegang kan kry. 

Hoe werk dit?

Indien jy eVA wil gebruik om jou departement se besoekers te registreer, teken asseblief ’n versoek aan op die ICT Partner Portal.  Om administrasie te vereenvoudig, kan die eVA kontakpersoon tipies dieselfde persoon wees wat SUNid ook hanteer en verkieslik ook slegs een persoon per departement of afdeling.

Neem net kennis dat jou lynbestuurder jou versoek moet goedkeur voordat jou regte toegeken kan word. Goedkeuring kan ook op die ICT Partner Portal gedoen word. 

Wat is die voordele?

  • Geen ander, addisionele registrasie, byvoorbeeld SUNid, is nodig om dié diens te gebruik nie.
  • Maklik om te gebruik. Handleidings en volledige instruksies is aanlyn beskikbaar. 
  • Besoekers se regte kan bestuur en beperk word.
  • Toegang verval outomaties na ’n verkose datum.
  • Rekords kan gehou en geoudit word.

Meer inligting oor eVA.

(English) How do I report phishing?

Donderdag, Oktober 17th, 2019

Jammer, hierdie bladsy is nie in Afrikaans beskikbaar nie.

 

© 2013-2020 Disclaimer: The views and opinions expressed in this page are strictly those of the page author(s) and content contributor(s). The contents of this page have not been reviewed or approved by Stellenbosch University.