Language:
SEARCH

wagwoord

Een wagwoord minder

Donderdag, Mei 12th, 2016

Ons het goeie nuus as jy moeg is om daagliks ʼn stroom wagwoorde te probeer onthou. Binnekort is daar een minder wanneer ons die AIS/Tera Term aantekenmetode vergemaklik. 

Die aanpassing van die aantekenproses beteken dat jy voortaan met jou gewone netwerkgebruikersnaam en -wagwoord sal kan aanteken by sun022, die stelsel wat, onder andere, Tera Term huisves. 

Die eerste fase van die proses is ʼn “soft roll-out”, waar SSO (Same Sign On) implementeer word. Gedurende hierdie tydperk sal jy met jou netwerk of steeds met jou bestaande AIS gebruikersnaam, totdat dit verval, kan aanteken. Indien jou AIS wagwoord verval, sal dit nie deur die IT Dienstoonbank-agente herset kan word nie en jy sal jou netwerkgebruikersnaam en -wagwoord moet begin gebruik. 

Huidige AIS gebruikers (met meer as een AIS gebruikersnaam) se primêre AIS-gebruikersnaam sal gekoppel word aan hulle netwerkgebruikersnaam.

Nadat SSO implementeer is, sal nuutgeskepte AIS gebruikers se gebruikersname programaties gestel word na hul US nommer. Dit impliseer ook dat AIS gebruikername, -rolle en -funksies nie hergebruik sal kan word nie. 

Neem kennis dat wagwoorde vir hierdie funksies nie gedeel mag word tussen personeel nie en dat indien dit wel gedoen word, dit die Elektroniese Kommunikasiebeleid oortree. Die SSO-benadering beteken ook dat een wagwoord toegang gee tot jou private Menslike Hulpbronne inligting. Indien jy dus jou wagwoord deel, deel jy ook jou persoonlike inligting.

Nuwe addisionele identiteite moet eerder op SUNiD geskep word.  

Vir enige verdere navrae, kontak gerus die IT Dienstoonbank by 808 4367.

 

Wat is verkeerd met jou wagwoord?

Vrydag, Oktober 10th, 2014

Wagwoorde is `n belangrike komponent van rekenaarsekuriteit en jou elektroniese sleutel to Universiteit Stellenbosch se netwerk. Maar watter wagwoorde is die mees effektief?

Lorrie Faith Cranor is `n sekuriteitsnavorser en `n Mede-professor in Rekenaarwetenskap en van Ingenieurswese en Openbare beleid by die Carnegie Mellon Universiteit. In Maart vanjaar het sy `n TED Talks aanbieding gegee oor haar studie van duisende oorspronklike wagwoorde om vas te stel watter verrassende, baie algemene foute gebruikers, sowel as veilige webwerwe, maak en sekuriteitsrisikos veroorsaak.

Kyk gerus onder na haar interessante gevolgtrekkings oor wagwoorde. Jy mag moontlik daarna jou eie wagwoord wil hersien. Instruksies oor hoe om dit te doen kan op ons wiki gedoen word of probeer die selfhelp-funksie aanlyn.

http://www.ted.com/talks/lorrie_faith_cranor_what_s_wrong_with_your_pa_w0rd

Wagwoordsinkronisasie `n kopseer?

Vrydag, Augustus 31st, 2012

Elke 90 dae kry jy `n e-pos van helpinfo@sun.ac.za wat jou vriendelik versoek om jou wagwoord te verander. Ons almal weet dat, alhoewel dit irriterend is, ook nodig is vir sekuriteitsredes.

`n 2007 studie deur Microsoft se navorsingspan het gevind dat die gemiddelde gebruiker 6.5 wagwoorde op die internet het, dat elke persoon ongeveer 25 rekeninge het wat wagwoorde benodig en gemiddeld 8 wagwoorde per dag moet intik! En dit was in 2007, 5 jaar gelede – dink net hoe lyk daardie syfers teen die tyd.

As jy meer as een toestel gebruik, raak wagwoordverandering `n nagmerrie. Maar daar is `n paar stappe wat jy kan volg om die verandering gladder te laat verloop.

Skakel al die toestelle af, behalwe een, bv. die skootrekenaar.

Teken aan by http://www.sun.ac.za/useradm, selekteer die Change Password opsie, en kies`n nuwe wagwoord volgens die riglyne wat verskaf word.

Teken af van die netwerk met die Logout opsie wat op useradm gegee word.

Teken daarna aan op die netwerk met die nuwe wagwoord.

Maak seker dat alle netwerktoegang (epos, internet, netwerkspasie) suksesvol beskikbaar is.

Skakel die ander toestelle een na die ander aan, verskaf die nuwe wagwoord.

Onthou, jy kan self jou wagwoord enige tyd verander op http://www.sun.ac.za/useradm by die Change Password-opsie. Probeer om te hou by die riglyne wat gegee word om jou wagwoord so veilig moontlik te hou – dit sal jou baie moeite en frustrasie spaar op die lange duur. As jy jou wagwoord heeltemal vergeet het, kan jy dit self verander deur te gaan na die personeelportaal.

Nog wenke vir die verandering van jou wagwoord kan by https://stbsp01.stb.sun.ac.za/innov/it/it-help/Wiki%20Pages/Change%20password.aspx gekry word.

Hoekom wag? Verander nou!

Donderdag, Junie 7th, 2012

Elke 90 dae  gee jou rekenaar `n boodskap wat jou laat sug van moedeloosheid en jy dan eerder ignoreer en uitstel tot op die nippertjie. En hoekom? Want dit verg `n klein bietjie moeite en breinkrag om `n oorspronklike wagwoord uit te dink wat jy nie na twee dae gaan vergeet nie.

Wagwoorde een van daai dinge soos belasting, munisipale rekeninge en onnodige bankkostes – frustrerend, maar nodig (goed, miskien is hulle nie almal per se nodig nie, maar julle verstaan my punt.)

Die beste oplossing is om dit so vinnig as moontlik te doen en dan hoef jy nie vir die volgende 14 dae gekonfronteer te word deur `n treiterende boodskappie nie. Om die proses so vinnig en pynloos moontlik af te handel, gee ons `n paar voorstelle.

As jy die eerste keer die boodskap kry, gaan direk na http://www.sun.ac.za/useradm. Voordat jy jou wagwoord verander, log eers uit inetkey en Outlook om die sinkronisasieproses te vergemaklik. Indien moontlik, moenie “wireless” gebruik as jy jou wagwoord verander nie, gebruik eerder jou netwerkkabel en deaktiveer “wireless”.

Indien die rekenaar slegs tuis gebruik word, en nie op die netwerk gekoppel is nie, sal die verandering van wagwoorde net  ‘n effek hê op u e-pos en inetkey op die tuisrekenaar  en sal die aanvanklike wagwoord van die rekenaar nie ook verander, tensy dit op die netwerk gekoppel word nie. Vir wagwoorde om korrek te sinkroniseer, moet  die rekenaar/laptop aan een van die US se domeins gekoppel wees.

Hierdie week is daar in 6.5 miljoen LinkedIn rekeninge ingebreek en dit beklemtoon weereens die noodsaaklikheid van `n sterk wagwoord.

Let veral op die volgende:

  • Die vorige 10  gebruikte wagwoorde kan nie weer gebruik word nie.
  • Jou gebruikersnaam, naam of huidige wagwoord mag nie deel vorm van jou nuwe wagwoord nie.
  • Jou wagwoorde moet bestaan uit 8 of meer karakters.
  • Wagwoorde moet karakters uit 3 van die 4 onderstaande groepe bevat: Klein letters, hoofletters, syfers, spesiale karakters (byvoorbeeld %,$,#)
Gebruik ‘n woord wat aan jou bekend is of iets waarvan jy hou en vervang van die letters met ‘n nommer of verskuif die hoofletters, byvoorbeeeld:

D1tiswin7er = Dit is winter

P@nn3koeK = Pannekoek

warMKoff13 = Warm koffie

Wanneer jy jou wagwoord op http://www.sun.ac.za/useradm verander, verander ook die wagwoord ooreenstemmend op al jou ander toestelle. (selfoon, tablet, ens.) Indien jy nie jou ander toestelle by jou het nie en dit aan die internet gekonnekteer is tuis, vra dat iemand tuis dit vir jou afskakel terwyl jy jou wagwoord verander. Skakel ook onmiddellik jou toestel (rekenaar, tablet of selfoon) af nadat jy jou wagwoord suksesvol verander het sodat dit kan sinkroniseer.

Indien jy die wagwoord verander het en dit nie gou genoeg op jou Selfoon/Tablet opdateer het nie, verander dit na die nuutste wagwoord en skakel IT om rekening te “unlock”. Dit sal verhoed dat jy jou wagwoord weer moet verstel.

Alweer jou wagwoord vergeet?

Vrydag, Maart 9th, 2012

Het jy die IT dienstoonbank se nommer geprogrammeer op jou telefoon vir in geval jy jou wagwoord vir die soveelste keer verloor of vergeet? Nou hoef jy nie meer nie!

Te danke aan `n nuwe stelsel ontwikkel deur IT kan jy nou self jou wagwoord op die intreeblad van enige van die portale (byvoorbeeld http://my.sun.ac.za) verander deur te kliek op “Wagwoord vergeet?”. `n Tydelike wagwoord kan via die portaal-applikasie aan jou toegeken word op grond van een van die volgende:

  1. Jou selnommer
  2. `n Eksterne e-posadres (as jy alumni is)
  3. Sekuriteitsvrae en antwoorde

Onthou asseblief dat dat die stelsel slegs jou wagwoord kan verander as bogenoemde inligting volledig en akkuraat op ons databasis vasgelê is.

Vir enige navrae kontak die IT Dienssentrum by x4367.

 

© 2013-2016 Disclaimer: The views and opinions expressed in this page are strictly those of the page author(s) and content contributor(s). The contents of this page have not been reviewed or approved by Stellenbosch University.