Twee dosente blink uit in toekennings vir Nasionale Uitnemendheid in Leer en Onderrig
December 14, 2011 
1 Opmerking
Mnr Len Steenkamp, Universiteit Stellenbosch; dr Liezel Nel, Universiteit van die Vrystaat; prof Jen Snowball, Rhodes Universiteit; prof Delia Marshall, Universiteit van Wes-Kaapland. Afwesig: Mev Sherlien Prithepaul, Durban Universiteit van Tegnologie.
Die Sentrum vir Onderrig en Leer (SOL) wens twee dosente aan die Universiteit Stellenbosch geluk met hul verkiesing deur die nasionale Higher Education Learning and Teaching Association of Southern Africa (HELTASA) komitee vir hul uitnemendheid in onderrig.
Dosente van regoor Suid-Afrika is uitgenooi deur hul departementshoofde om hul onderrig en leer portefeuljes in te dien. ‘n Totaal van 27 kandidate is genomineer en die portefeuljes se kwaliteit was uiters hoog.
Mnr Len Steenkamp (Senior dosent: Rekeningkunde Departement) is gekies as een van die top vyf ontvangers van die toekenning vir Uitnemendheid in Onderrig en Leer, terwyl prof David Holgate (Medeprofessor: Wiskunde Departement) eervolle vermelding ontvang het.
Die toekenning is op 1 Desember 2011 by die jaarlikse HELTASA–konferensie, wat by die Nelson Mandela Metropolitan Universiteit plaasgevind het, aan mnr Steenkamp oorhandig.
HELTASA poog om erkenning te gee aan dosente wat uitnemendheid in onderrig en leer nastreef. Hul verkiesing is dus ‘n groot prestasie vir hul fakulteite, sowel as vir die Universiteit van Stellenbosch. Dosente soos hierdie dien as rolmodelle en leiers ten opsigte van die Hoër Onderwyssektor in Suid-Afrika.
Baie geluk, Len en prof. David. Ons is trots op julle. Weet dat julle die status van onderrig by ons universiteit bevorder elke keer as julle voorbeeld die res van ons aanmoedig om uit ons gemaksone te beweeg.