Die Universiteit kan ’n groot hoeveelheid elektrisiteit oor die feestyd bespaar deur ’n paar eenvoudige beginsels te volg.

Volgens mnr Dolf Krige, Bestuurder: Nutsdienste, moet personeel veral seker maak dat elektriese toestelle by die muursok afgeskakel word omdat elektrisiteit steeds gebruik word – selfs al word die toestel afgeskakel.

Hy het die volgende wenke gegee:

• Maak seker dat alle rekenaars afgeskakel is (ook by die muursok). Veral ook by rekenaar gebruikersareas (RGA’s).
• Skakel ook alle drukkers, fotostaatmasjiene, skandeerders, koffiemasjiene en Hydroboil warmwatertoestelle ook af.
• Trek alle batterylaaiers uit die muurprop – selfoonlaaiers, kameralaaiers, radiolaaiers, ens.
• Skakel alle warmwatersilinders (geysers) ook af.
• Waar moontlik moet leë yskaste en vrieskaste ook afgeskakel en die deure oopgelos word (yskaste en vrieskaste moet uiteraard eers ontvries word).
• Verseker ook dat alle lugversorgers afgeskakel is.
• Sorg asb. dat alle kantoor-, kleedkamers- en stoorkamerligte afgeskakel word en dat geen ligte onnodig brand nie.