Craig, Kobus Maties se silwerrandjie : 2017-05-04

Elke donker wolk het ‘n silwerrandjie en vir die Maties-rugbyspan is dit die individuele toekennings vir Kobus van Dyk en Craig Barry.

Maties het die eindstryd van die Varsitybeker-reeks in Pretoria teen Tukkies met 21-28 verloor. Van Dyk is egter nie net die Speler van die Toernooi nie, maar ook as die beste voorspeler in die reeks aangewys. Barry is as die beste agterspeler beloon.

Die duo is saam met Duncan Saal ook in die toernooi-span ingesluit wat Dinsdag teen die Junior Springbokke in die Danie Craven-stadion speel. Daar is ook drie Maties op die plaasvervangerbank. Hulle is Ernst Stapelberg, Michal Haznar en Johan Momsen.

Die teleurstelling was groot vir Barry en sy manne. Barry het dit egter duidelik gemaak dat die nederlaag nie die goeie dinge wat die afgelope paar maande gebeur het, ongedaan kan maak nie.

“Die toernooi was eintlik ‘n reuse-sukses vir ons gewees. Verskeie spelers het die geleentheid gekry om hulself te bewys en baie was suksesvol. Vir ons as Maties-span was dit natuurlik nie die einde waarvoor ons gewerk of beplan het nie, maar daar is baie positiewe aspekte wat ons uit die toernooi kan neem. Die Maties-trui is beslis in ‘n beter plek. Ons as span word nie gedefinieër deur die nederlaag nie, maar deur die gesamentlike poging wat ons almal ingesit het in aanloop en met die verloop van die toernooi,” het Barry gesê.

Vir Barry was dit sy laaste Varsitybeker-reeks. Hy is met 42 wedstryde die speler wat die meeste verskynings al ooit in die reeks gemaak het en met sy 16 drieë – waarvan nege die afgelope reeks – ook die Varsity Beker se voorste driedrukker.

Leave a Reply