Einde van ‘n era by Steinhoff Maties Rugby : 2017-07-17

Die einde van die 2017 Varsitybeker-rugbyreeks het ook die einde van ‘n era by Steinhoff Maties Rugby beteken.

Verskeie spelers wat belangrike lede van die Maties Rugby-gesin was, het in die eindstryd teen Tukkies hul laaste wedstryd in die Maroen gespeel. Party van die spelers gaan voort met hul rugbyloopbane, terwyl ander loopbane weg van die rugbyveld vestig.

Kobus van Dyk (losvoorspeler) wat onlangs sy debuut vir die Stormers gemaak het, sal altyd sy tyd by Maties met ‘n glimlag onthou. “Dit is defnitief een van die beste groepe saam met wie ek al gespeel het…op en af van die veld! Die vriende wat ek gemaak het sal ek altyd hou. Dit was regtig ‘n baie groot voorreg om saam met so ‘n spesiale groep my rugbyloopbaan te kon begin.”

Kyle Steyn en Devon Nash het albei ses maande kontrakte met Griekwas gesluit. “Ek is baie opgewonde oor die vooruitsig van die nuwe avontuur. Ek is gretig om betrokke te raak. Ek het nie nou die kans verwag nie, want ek het nie besef hoe groot die Varsitybeker se invloed is nie. So ek het gehoop vir iets om oor my pad te kom, maar nie so gou nie. Ek het vir myself doelwitte gestel, maar nou wil ek net gaan en my alles gee,” het Steyn gesê.

Oor sy tyd by Maties Steyn het hy bygevoeg: “Maties Rugby het ‘n ongelooflike geskiedenis en om in die Maroen-trui te speel, my eie vriendskappe en herinneringe onder daardie geskiedenis te bou, en om die trots en nalatenskap van Maties Rugby te ervaar, is iets wat ek sal altyd koester.”

Craig Barry, kaptein van die Varsitybeker-span, het ook bygevoeg: “Dit was ‘n pad vol seëninge en lesse. My tyd by Maties het my gevorm om ‘n beter mens te word. ”

Beyers de Villiers, wat ná die eerste wedstryd in die Varsitybeker moes ophou speel weens die gevaar van verdere harsingskudding, fokus nou op sy loopbaan weg van die rugbyveld.

Leave a Reply