Fourie en Hayes slaggereed vir Grand Finale : 2017-07-17

Twee van Maties Sport se grootste ambassadeurs Arnu Fourie en Ilse Hayes sluit af hul roemryke loopbane by die Para Wêreldbyeenkoms in Londen.

Aksie begin vandag en kom op 23 Julie tot ‘n einde. Beide Fourie en Hayes word afgerig deur Suzanne Ferreira.

“Ek is baie opgewonde oor die Wêreldbyeenkoms. Ek het onlangs vir my afrigter Suzanne gesê ek dink dit is die langste wat ek nog aaneen kon oefen die laaste vyf jaar sonder enige beserings. Daarvoor is ek so baie dankbaar. Dit vul my met opwinding en verwagting om my laaste seisoen op so manier te kan afsluit,” het Fourie gesê.

Fourie dink nie te veel aan die feit dat dit sy laaste byeenkoms ooit is nie. “Ek is seker sodra ek my laaste tree gegee het, sal daar heel moontlik emosies wees, maar op hierdie oomblik is ek net opgewonde om weer die skare in Londen te beleef en goeie herinneringe van vyf jaar terug (2012 Paralimpiese Spele) te herleef en verseker nuwes te maak.”

Na jare se ondervinding is dit vir Fourie belangrik om die groter prentjie in gedagte te hou as hy dink oor sy verwagtinge vir die laaste byeenkoms. “Ek is ‘n baie kompeterende mens so om te sê dat ek nie verwagtinge het sal nie heeltemal die waarheid wees, maar my gebed is dat ek my loopbaan sal afsluit deur reg te laat geskied aan die vorm waarin ek is en selfs dalk persoonlike beste tye te hardloop. Die belangrikste is om die beste van elke oomblik te maak.”

Soos Fourie is Hayes baie tevrede met haar voorbereding. “Dit was lekker om in goeie toestande en omstandighede voor te berei en dit was maklik om te fokus ook. Ek is baie opgewonde oor die komende byeenkoms met die wete dat ek net my beste kan gee. Ek het myself so lank voorberei dat die Wêreldbyeenkoms my laaste sal wees, dat ek nie regtig nou emosioneel is nie. Ek is wel opgewonde!”

Hayes het bygevoeg: “Atletiek was die afgelope 17 jaar so groot deel van my lewe. Ek was bevoorreg. My verwagtinge is om net ‘n goeie ervaring te hê. As ek oor die eindstreep hardloop wil ek net vreugde ervaar en kan fees vier ongeag die tyd of posisie. Dit gaan soveel meer oor herinneringe as oor medaljes.”

Leave a Reply