Language:
SEARCH
  • Onlangse bydraes

  • Kategorieë

  • Argiewe

Algemeen

Beskerm jou toerusting teen beurtkrag

Sondag, Maart 31st, 2019

Teen dié tyd is ons al gewoond aan die onvoorspelbaarheid van ons kragtoevoer-situasie en het ons reeds aanpassings gemaak in ons daaglikse roetines om dit te akkommodeer.

Maar het jy al gedink watter impak onverwagse kragvloei op jou huis- en werktoestelle het? Om te verseker dat jy nie onnodig skade ly nie, kan jy ‘n paar maatreëls tref.

the-light-bulb-371652_6401. Gaan gereeld die beurtkragskedule na
As jy nie weet wanneer die krag afgaan nie, gaan jy nie toerusting betyds kan beskerm nie. Daar is verskeie plekke om die informasie te bekom – Eskom se Twitterrekening, webwerf, sowel as verskeie toepassings. 

2. Skakel af en ontkoppel
Voordat geskeduleerde beurtkrag plaasvind, skakel al jou toestelle af en trek dit by die muurprop uit. Sodoende voorkom jy dat `n skielike sterk stroom na jou toestel vloei wanneer krag herstel word, en sensitiewe elektronika beskadig.

Dit is veral belangrik dat rekenaarkabels, sowel as foonkabels, uit muurproppe verwyder word. 

3. Gebruik oorspanningafleiers
Soos ons hierbo genoem het, kan skielike sterk strome jou toestelle beskadig. `n Ander metode om dit te voorkom, is om proppe toe te rus met oorspanningafleiers (surge protectors), wat die sterkte van die stroom sal demp.

4. Kry `n kragbank
Hierdie handige klein toestelletjies is draagbare laaiers wat gebruik kan word om jou foon en enige ander USB-toestel te laai. Sodoende sal jy nie gestrand wees sonder selfoon of tablet as die res van die wereld in donkerte gehul is nie.

5. Kry `n UPS
`n Ononderbroke kragbron of UPS vervul dieselfde rol as `n oorspanning afleier, maar met die ekstra funksionaliteit van `n ingeboude battery. Dit verskaf deurlopende kragtoevoer vir `n maksimum van een uur. `n UPS is bloot `n rugsteunstelsel om jou genoeg tyd te gee om jou toestelle en data te beskerm.

6. Rugsteun
Rugsteun van data behoort nie uitsluitlik gedurende beurtkrag te gebeur nie – dit behoort deel te wees van jou roetine. As jy weet dat beurtkrag onafwendbaar is, rugsteun en stoor deurlopend jou werk of ten minste voordat die kragonderbreking plaasvind. Dit sal verseker dat jy nie belangrike werk in die proses verloor nie.

 

[BRONNE: www.eskom.co.za, www.mg.co.za, www.fin24.com, www.mweb.co.za, www.property24.com

 

 

 

(English) Industry-wide shortage of processors

Dinsdag, Maart 5th, 2019

Jammer, hierdie bladsy is nie in Afrikaans beskikbaar nie.

(English) TechSmith Relay for lecture recordings

Donderdag, Februarie 28th, 2019

Jammer, hierdie bladsy is nie in Afrikaans beskikbaar nie.

2018 in oorsig

Donderdag, Desember 6th, 2018

Wat ʼn opwindende jaar het ons nie gehad nie! Terwyl ek hier skryf, het ons sopas nog ʼn uur of twee van beurtkrag betree en is ek dankbaar vir ʼn betroubare skootrekenaar met batterykrag.

Gedurende die Eeufeesjaar van die Universiteit is ʼn aantal moedige besluite gefinaliseer om van die grootste hernieuwingsprojekte van die laaste twee dekades te loods.

Die opvolgstelsels van die twee kern administratiewe toepassings, Studente en Finansiële Bestuur, is evalueer, gekies en einde November deur die Rektoraat goedgekeur. Beide hierdie toepassings, wat oor die volgende twee jaar implementeer word, is modern en innoverend om verskeie redes:

  • Die stelsels sal in die wolk implementeer word  en deur toonaangewende internasionale verskaffers ontwikkel en onderhou word. Dis ʼn belangrike verandering vir die Universiteit wat die bestaande toepassings vir meer as 25 jaar intern ontwikkel en onderhou het.
  • Die platforms wat hierdie toepassings bedien sal wolk- en nie meer kampusgebaseerd wees nie. Dit sal ʼn groot impak hê op die aard van ons werk en ons in staat stel om hulpbronne verskillend aan te wend en sodoende ons dienste aan die Universiteit te verbeter.

Sover ons kennis strek het geen Suid-Afrikaanse universiteit hierdie toepassings al voorheen na ʼn wolkgebaseerde platform migreer nie.

Die IT-afdeling het hard gewerk om die kwaliteit en volhoubaarheid van ons dienste te verbeter. Die tweejaarlikse kwaliteitverbeteringsverslag is in Augustus voorgelê aan die institusionele Kwaliteitskomitee, is positief ontvang en goedgekeur. Belangrike verbeteringsmylpale is in die verslag genoem, onder andere die vestiging van ʼn nuwe bestuursliggaam en tegnologiebestuur, die Tegnologie- en Informasiekomitee, sowel as verskeie organisatoriese, infrastruktuur- en diensverbeterings.

ʼn Verdere beduidende sukses in 2018 is die ontwikkeling en implementering van die ICT Partner Portal, ʼn stelsel wat ons werksvloei en wisselwerking met ons vennote, kollegas en kliënte vaartbelyn maak en bestuur. Ongeveer 80% van die IT-afdeling se diensprosesse is sedert die stelsel se implementering in September gedefinieer en -konfigureer en meer as 17000 insidente en versoeke is die afgelope drie maande verwerk. Die stelsel is ontwerp sodat daar deursigtigheid vir alle prosesaandeelhouers, kliënte, dienspersoneel en bestuur is ten opsigte van die werksvloei en voltooiing van take. 

Die jaar sal ook onthou word vir ʼn skerp toename in kuberaanvalle, veral strikroofpogings. ʼn Gespesialiseerde kubersekuriteitsfunksie is gevestig om die toename in bedreigings te hanteer. Dis egter onthutsend dat ʼn beduidende persentasie van ons mannekrag gevolglik ook deur hierdie verskynsel absorbeer word. 

Ons is ook hartseer dat ʼn paar van ons kollegas die span verlaat, sommige vir aftrede, ander vir groener weivelde. Ons wens hulle almal voorspoed toe, veral Callie van der Merwe en Thys de Wet wat hulle hele loopbaan by die Universiteit spandeer het.

Laastens wil ons ook vir prof Stan du Plessis, ons nuwe Uitvoerende Bedryfshoof, bedank vir die eerste volledige jaar van sy leierskap en ondersteuning. Ons is gretig en geïnspireerd om na ʼn kort rustyd 2019 aan te durf met nuwe energie.

Beste wense vir die feesgety!

Attie Juyn

 

 

Voor jy weggaan …

Woensdag, Desember 5th, 2018

Die Desembervakansie is om die draai en ons glo jy, nes ons, kan nie wag om jou rekenaar af te sit en te begin ontspan nie. Maar voordat jy gaan is daar `n paar takies wat jy nou al kan afhandel sodat jou terugkoms in Januarie pynloos is. Hier is `n paar wenke:

    1. Aktiveer die Out of Office-funksie op jou sun.ac.za Outlook-posbus en dui aan wanneer jy weer beskikbaar sal wees indien iemand jou moet kontak. Dui ook aan wie die verantwoordelike persoon sal wees gedurende die tydperk wat jy weg is en sit die persoon se e-posadres by op die Out of Office-boodskap.
    2. Maak seker dat enige werkverwante data toeganklik is vir jou kollegas terwyl jy weg is. Moet egter onder geen omstandighede jou wagwoord vir kollegas gee nie aangesien dit `n sekuriteitsrisiko skep.
    3. Indien jou sun-wagwoord moontlik kan verval gedurende die vakansie, verander dit eerder voordat jy weggaan. As dit verval terwyl jy weg is, kan jy uit jou rekening gesluit word en dit onnodige stres veroorsaak wanneer jy dit moet heraktiveer in Januarie. 
    4. Indien jy enige addisionele hulp nodig het met bogenoemde, meld asb. `n diensversoek aan op die ICT Partner Portal en een van ons tegnici sal jou kan help.
    5. Informasietegnologie sluit, soos die res van die Universiteit op 22 Desember en maak weer 2 Januarie oop. Indien moontlik, probeer jou versoeke so vroeg as moontlik aanmeld voor jy weggaan.  Indien jy `n kritiese probleem het, kan ons jou moontlik nie `n dag voor die tyd of op die laaste Vrydag help nie aangesien verskaffers ook sluit gedurende die feesseisoen.
 

© 2013-2019 Disclaimer: The views and opinions expressed in this page are strictly those of the page author(s) and content contributor(s). The contents of this page have not been reviewed or approved by Stellenbosch University.