Language:
SEARCH
  • Onlangse bydraes

  • Kategorieë

  • Argiewe

data privacy

Elke dag is Databeskermingsdag

Dinsdag, Februarie 5th, 2019

Databeskermingsdag is in Suid-Afrika nog in sy kinderskoene. Dié inisiatief is reeds sedert 2007 aktief in Europa en twee jaar later het Amerika ook begin deelneem. 

“Data wat?” hoor ons jou vra. Volgens Wikipedia is Dataprivaatheidsdag (in Europa ook bekend as Databeskermingsdag) ʼn internasionale dag wat elke jaar op 28 Januarie herdenk word. Dit word tans erken in Amerika, Kanada, Israel en 47 Europese lande.

Ten spyte van Databeskermingsdag se bestaan vir reeds meer as tien jaar, het bewustheid oor die beskerming van data oor die afgelope jaar of twee skerp toegeneem. Die rede is tweeledig. Eerstens was daar die afgelope tyd ʼn stuwing in databreuke wêreldwyd, of dit nou Facebook is of meer onlangs Google wat met £44 miljoen in Frankryk beboet is vir GDPR oortredings.

Wat ons bring by punt twee – die implementasie van GDPR verlede jaar. Voorheen was maatskappye nie wetlik verplig om hulle kliënte se data te beskerm nie. GDPR en POPI-wetgewing het dit verander. Maatskappye word tans verantwoordelik gehou vir data en kan swaar beboet word as hulle kliënte se inligting blootstel.

Maar hoekom is data so belangrik? Volgens Mark Barrenechea, Hoof Uitvoerende Beampte by OpenText, bou ons elke dag stukkie vir stukkie ʼn digitale kopie van onsself sonder dat ons dit eers weet. Hierdie digitale voetspoor maak dit makliker om inligting oor jou te kry, of dit persoonlike inligting soos gebruikersname en wagwoorde is, jou fisiese bewegings of jou belangstellings en gunsteling restaurant. Algoritmes spoor jou aksies na en voorsien jou optrede voordat jy dit self weet. Elke stukkie inligting maak deel uit van jou groter prentjie en kan tot jou nadeel gebruik word.

Die deel van data word ook toenemend makliker, wat dit krities maak dat jy self verantwoordelikheid neem vir die beskerming daarvan. Ons kan nie meer staatmaak op maatskappye of sosiale netwerke om ons digitale identiteit veilig te hou nie. Dit het duidelik geword uit verskeie databreuke oor die afgelope jaar – insluitende groot maatskappye soos Facebook en Google.

Databeskermingsdag is net een dag in die jaar waar dataeienaars (dis elkeen van ons wat digitale platforms gebruik) bewus gemaak kan word van die belangrikheid van data. Ons moet egter elke dag bewus wees van die risiko’s. Hoe kan jy jou data beskerm? Jy weet reeds, jy moet dit net begin doen of beter doen. www.digitalguardian het ʼn deeglike gids oor databeskerming, maar hier is 10 wenke om mee te begin:

  1. Gebruik netwerke met enkripsie wanneer jy toegang nodig het tot belangrike inligting. Oop en gratis Wi-Fi is handig, maar dit kom met risiko’s. Indien jy webwerwe besoek wat nie https gebruik nie, onthou dat jou data deur enigiemand anders gesien en misbruik kan word.
  2. Kies sterk wagwoorde. Weet nie hoe nie? Hier is ʼn paar wenke. Daar is ʼn neiging na twee-faktor bekragtiging en meer sekuriteitsdeskundiges beveel sagteware aan wat jou wagwoorde bestuur.
  3. Beskerm jou wagwoorde. Moet dit nie neerskryf nie. Moet dit nie deel nie. Moet ook nie dieselfde wagwoord gebruik vir al jou sosiale netwerke of ander webwerwe nie.
  4. Dateer jou sagteware op wanneer dit jou aanhits. Moet dit nie ignoreer omdat jy haastig is nie – dit kan ʼn belangrike sekuriteitsopdatering insluit.
  5. Dateer gereeld jou anti-virus sagteware op. Nuwe weergawes van virusse, malware, ens. word op ʼn daaglikse basis vrygestel. As jy dit nie opdateer nie, word jy ʼn maklike teiken. Oorweeg ook anti-virus sagteware vir jou mobiele toestelle – hulle is selfs meer kwesbaar as jou rekenaars.
  6. Gaan die privaatheidverstellings op jou slimfoon na. Oorweeg versigtig vir watter toepassings jy toegang wil gee tot sekere funksies op jou foon.
  7. Sluit jou slimfoon en tablet wanneer jy dit nie gebruik nie. Mobiele toestelle word meer gereeld gebruik vir toegang tot sosiale media, bankdienste en minder veilige toepassings wat maklik misbruik kan word as iemand toegang kry.
  8. Aktiveer die “remote location” en die toestel-skoonvee funksies. Indien jou mobiele toestel gesteel word, kan iemand ten minste nie toegang tot jou inligting ook kry nie.
  9. Verwyder al jou data van ou toestelle, byvoorbeeld ou slimfone wat verkoop, weggegooi of vir iemand anders gegee word.
  10. Laastens, maak seker jy rugsteun jou data op ʼn gereelde basis. Ten minste sal jy steeds toegang hê, al verloor jy jou toestel.

 Data is mag en as jy die mag in jou hande wil hou, moet jy dit beskerm.

[BRONNE: https://www.forbes.comhttps://www.techradar.com]

Beskerm jou persoonlike inligting

Maandag, Januarie 29th, 2018

Data Privacy Day, vind elke jaar op 28 Januarie plaas en is ʼn internasionale poging om individue en besighede te bemagtig om privaatheid te beskerm, respekteer en ook om vertroue te bou.

Verlede jaar was daar verskeie omvangryke databreuke regoor die wêreld en vervolgens is daar ‘n groter bewustheid om informasie te beskerm.

Maar hoekom moet ons omgee oor ons inligting?

Met nuwe verwikkelinge soos die Internet of Things, `n fenomeen wat toestelle by die huis, werk en skool verbind, staan ons op die drumpel van nuwe tegnologie  Hoewel hierdie vooruitgang matelose geleenthede bied, beteken dit ook dat ons as gebruikers moet leer om ons inligting te beskerm en beveilig. Binne ʼn oogwink is jy deesdae verbind aan die res van die wêreld, maar dieselfde toestelle samel terselfdertyd inligting oor jou en jou familie in. 

Hoeveel inligting deel jy daagliks aanlyn? Ons bestee die grootste gedeelte van ons dag op die internet en alles wat ons doen word opgeneem en gedokumenteer deur ons toestelle. Hierdie versamelde data word vir ʼn onbepaalde tyd gestoor en kan enige tyd gebruik word. 

Die National Cyber Security Alliance in Amerika gee die volgende wenke: 

  1. Persoonlike inligting is soos geld: ken die waarde daarvan en pas dit op. 
    Wees bedag op wie jou inligting kry en hoe webwerwe en toepassings dit insamel. Verwyder die toepassings wat jy nie gebruik nie, sorg dat die ander op datum is en kyk gereeld na jou toepassings se verstellings. 
  2. Deel versigtig.
    Dink mooi voor jy iets oor jouself of iemand anders aanlyn plaas. Hersien gereeld jou vriende op sosiale netwerke en kontaklyste. 
  3. Bestuur jou aanlynteenwoordigheid.
    Stel die privaatheid- en sekuriteitsverstellings op webwerwe en toepassings na gelang van jou behoeftes. Jy hoef nie altyd alles met almal te deel nie.  
  4. Beskerm jou aantekenbesonderhede.
    Maak seker jou rekening is sekuur. Moenie slegs ʼn wagwoord gebruik vir bankrekeninge, e-pos en sosiale media nie. Gebruik `n twee-stap bekragtigingsproses, biometrie of sekuriteitsleutels. 
  5. Hou jou toestelle skoon.
    Hou die sagteware, bedryfstelsel, anti-virusprogramme en toepassings op jou selfoon en rekenaar op datum om dataverlies, infeksies en malware te voorkom. 
  6. Pas die goue reël toe. 
    As jy nie jou inligting geplaas wil hê nie, moet ook nie ander se inligting plaas nie. 
  7. Beveilig jou toestelle.
    Elke toestel moet beskerm wees met ʼn wagwoord of sterk bekragtigingsproses – vingervee, gesigherkenning, ens. Tot watter inligting sal iemand toegang hê as hulle jou toestel in die hande kry?
  8. Dink voor jy ʼn toepassing gebruik.
    Inligting oor jou, soos die speletjies wat jy speel, jou kontaklys, waar jy koop en waar jy bly, kan waardevol wees vir iemand anders. Toepassings, soos Strava, samel al hierdie inligting in. 

FEITE EN STATISTIEKE

  • 41% van Amerikaners is al aanlyn bedreig en een in elke 5 (18%) is al ernstig geteistering. 
  • 82% van kuberbekruipers gebruik sosiale media om uit te vind waar hulle potensiële slagoffers bly, waar hulle skool toe gaan, ens.  
  • Vier uit vyf US-dokterpraktyke was al slagoffers van kuberaanvalle.  Hou in gedagte dat mediese en gesondheidsinligting onder die mees sensitiewe en persoonlike inligting van ʼn individu tel.

[SOURCE: https://staysafeonline.org and www.wikipedia.org]

 

© 2013-2019 Disclaimer: The views and opinions expressed in this page are strictly those of the page author(s) and content contributor(s). The contents of this page have not been reviewed or approved by Stellenbosch University.