“Vertel” ons verlede/Maak aanspraak op ons toekoms: Die volwassewording van teologie en ontwikkeling in Suid-Afrika

Die gebied van Teologie en Ontwikkeling vier hierdie jaar ʼn 25-jarige bestaansjaar by die Universiteit Stellenbosch asook in Suid-Afrika. Dit is gevestig in die reënboognasie-jare van ons jong demokrasie en met die toetrede tot volwassenheid is dit van pas om nie net oor die erfenis van hierdie gebied nie, maar ook oor die plek en posisionering daarvan in die huidige Suid-Afrikaanse konteks te besin. Die doel van die vestiging daarvan as ʼn nuwe vakkundige gebied in 1998 deur die eerste persoon van kleur wat aangestel is om teologie aan die Universiteit Stellenbosch te onderrig, was om vakkundigheid te lewer wat die status quo sou aanveg en geloofsgebaseerde praktisyns in hul rol in ʼn ongelyke en behoeftige samelewing op te lei. Baanbrekerswerk is gedoen en Westerse teologiese normatiwiteite is in vele opsigte aangeveg. In hierdie intreerede word gepoog om, binne die raamwerk van dekoloniale storievertelling of, in die woorde van Day, ‘getuienisaflegging’, wat opsigself daarna streef om normatiwiteite aan te veg, betekenis saam te stel van die dikwels onvertelde narratiewe wat uit hierdie gebied en die vakkundiges en praktisyns daarvan, sowel in die verlede as in die hede, na vore kom ten einde die ‘tekens van die tye’ te lees terwyl ons die toekoms aanpak.

Kyk die intreerede hier

Kort biografie

Nadine Bowers Du Toit is ʼn professor in Teologie en Ontwikkeling in die Departement Praktiese Teologie en Missiologie by die Fakulteit Teologie, Universiteit Stellenbosch. Voor haar aanstelling in die Fakulteit in 2013 dien sy as waarnemende dekaan, departementshoof van Gemeenskapsontwikkeling en direkteur van Studentesake by Cornerstone Instituut (toe Cornerstone Christelike Kollege). As die kind van Pinksterleraars, wat aktief in die gemeenskap betrokke was, fokus haar DTh in Praktiese Teologie (2005) op die rol van die plaaslike kerk as ʼn veranderingsagent rakende die kwessie van armoede. Haar navorsing oor die afgelope 20 jaar was dus hoofsaaklik gefokus op die rol van geloofsgemeenskappe in die hantering van die verweefde kwessies van armoede, ongelykheid, ras en geslag. Haar mees onlangse projekte, wat die rol van geloofsidentiteit van geloofsgebaseerde organisasies en die kwessie van jong volwassenes, ras, geloof en ongelykheid ondersoek het, is gefinansier deur toelae van die Nasionale Navorsingstigting en die Nagel Sentrum vir Wêreld-Christenskap. Professor Bowers Du Toit was onlangs die redakteur van ʼn boek getiteld Faith, race and inequality among young adults in South Africa: Contested and contesting discourses for a better future (Sun Media, 2022) en was reeds studieleier vir 25 PhD- en meestersgraadstudente. Buiten dosering, publisering en studieleiding vir nagraadse studente word sy dikwels genooi om gemeentes, kerkleiers en geloofsgebaseerde organisasies toe te spreek ook onderwerpe met betrekking tot gemeenskapsontwikkeling en sosiale geregtigheid. Sy beskou haarself as ʼn aktivis-akademikus, en beywer haar daarvoor om ruimtes te skep waarin meer stemme gehoor kan word. Sy het vir etlike jare as die voorsitter van die Transformasiekomitee in die Fakulteit Teologie gedien. Professor Bowers Du Toit is die direkteur van die Eenheid vir Godsdiens- en Ontwikkelingsnavorsing en dien op die raad van verskeie nieregeringsorganisasies, insluitende The Warehouse, Mfesane en die Alliansie vir Inklusiewe Ontwikkeling. Sy het ook gedien as voorsitter van die Vereniging vir Praktiese Teologie in Suid-Afrika en is tans die president van die Internasionale Akademie van Praktiese Teologie.

RSVP HIER