As jy altyd aan die gang is, maar nogsteeds `n manier wil hê waarmee jy op hoogte wil bly van wat aangaan in die wêreld en met jou vriende en familie, kan jy dit dalk oorweeg om vir jou `n tablet aan te skaf. Hierdie toestel is maklik om te gebruik en lig genoeg om saam met jou te sleep – of jy nou reis na Arniston of Abu Dhabi!
`n Tablet het normaalweg `n raakskerm koppelvlak wat dit maklik maak om te gebruik en meer toeganklik vanweë die eenvoud. Die toestel het nie `n sleutelbord nie en is derhalwe ligter en dunner as `n gewone skootrekenaar.
Waarvoor kan ek dit gebruik?
Dis jou keuse waarvoor jy jou tablet wil gebruik, maar die toestel is hoofsaaklik meer gemik op vermaaklikheid, soos internet, e-pos, speletjies, sosiale media, videos, e-boeke en fotos.
Jy kan dit egter gebruik vir basiese werksdoeleindes – veral as dit kom by kommunikasie. Met hierdie mobiele toestel het jy, waar jy ookal gaan, toegang tot jou e-pos, kan jy dokumente oplaai, toepassings aflaai, dokumente skep en verander, powerpoint aanbiedings opstel en sigblaaie aanpas.
Onthou dat `n tablet nie bedoel is om rekenaars of skootrekenaars te vervang nie. Tablette het stadiger verwerkers, minder geheue en kleiner stoorspasie. As jy dus gereeld programme, soos grafiese of video-redigeringsprogramme, gebruik wat `n sterk verwerker nodig het, hou maar by jou skootrekenaar.
Watter een?
Die mark vir tablette brei amper daagliks uit met nuwe produkte en nuwe weergawes. Elkeen bied iets anders en nuut, maar voordat jy `n keuse maak, besluit eers wat jou IT-behoeftes is. As jy `n vergelyking soek tussen die verskillende opsies, lees gerus hier meer.
