Die Open Researcher and Contributor ID (ORCID) verskaf ‘n permanente 16-syfer numeriese identifikasienommer (bv. http://orcid.org/0000-0001-5109-3700) om sodoende jouself van alle ander navorsers te onderskei.

Indien jy al tevore gepubliseer het, het jy heel moontlik ‘n ReseacherID of Scopus Author ID, of selfs publikasies wat in CrossRef geïndekseer word. ORCID laat jou toe om hierdie inligting van ander stelsels na een aanlynidentiteit in te trek. Die identifikasienommers word in ‘n sentrale register gestoor.

Universiteit Stellenbosch (US) het in 2015  ’n lid van ORCID geword en is nou op die punt om universiteitsrekords met die ORCID register te integreer. Alle akademiese personeel, navorsers en nagraadse studente sal teen einde Februarie per e-pos genooi word om ’n ORCID iD te skep en dit met hul universiteitsrekord te skakel. Diegene wat reeds oor ‘n ORCID iD beskik, sal gevra word om hul iDs met hul universiteitsrekord te skakel en hul US affiliasie te bevestig.

Ons wil graag alle navorsers en akademiese personeel aanmoedig om vir ‘n ORCID iD te registreer indien hulle nog nie oor een beskik nie. Verdere ontwikkelings sal ons in staat stel om iDs te integreer met navorsingsinligtingstelsels, die institusionele navorsingsbewaarplek (SUNScholar), befondsing en kontrakte en MH-stelsels. ‘n ORCID skakel is ook reeds beskikbaar op die InfoEd stelsel waar jy jou ORCID iD kan skakel en die Nasionale Navorsingstigting het ook onlangs as lid aangesluit en beplan om ORCID in hul nasionale CV stelsel te integreer. Lees hier meer oor befondsers en ander platforms waar die gebruik van ORCID vereis word.

Meer inligting is beskikbaar op die biblioteekgids, ORCID and other researcher identifiers. Almal is ook welkom om te registreer vir die ORCID werkswinkel wat op 24 Februarie aangebied word.

Kontak asseblief vir Marié Roux, tel.: 021-8082623 of jou fakulteitsbibliotekaris vir enige navrae of om ‘n afspraak te maak vir ‘n kort inligtingsessie by jou departement.