Kommunikasie « Informasietegnologie

Kommunikasie

Om te blog of nie te blog nie?

Vrydag, Mei 24th, 2013

Oor die afgelope vyftien jaar het die woord “blog” deel geword van ons daaglikse woordeskat. Jy besoek daagliks een of ander vorm van `n blog en besef dit nie eers nie! Sedert blogs of webjoernale hul verskyning gemaak het in die laat 90’s, het die formaat en funksionaliteit geleidelik verander en ontwikkel.

`n Blog (kombinasie van die woorde “web” en “log”) is `n webwerf bestaande uit artikels en stories, gelys in omgekeerde chronologiese volgorde van bo na onder. Jy kan dus blaai deur die inskrywings van nuwe artikels na oud.

`n Tipiese blog bestaan uit teks, grafika en skakels na ander blogs, webwerwe en media verwant aan die blog se gekose onderwerp. Die vermoeё van lesers om op interaktiewe wyse kommentaar te lewer, `n belangrike faktor wat bydra tot die populariteit van blogs. Deur middel van die deel van inligting bou die blogskrywer `n verhouding op met sy lesers en `n virtuele gemeenskap met `n eendersdekende lede met dieselfde belangstellings word gekweek.

Die verskyning van blogs het die toekoms en definisie van joernalistiek op `n beduidende wyse beinvloed. Skielik kon enigiemand met toegang tot `n rekenaar sy opinies en artikels publiseer sonder om geredigeer te word. Die meeste blogplatforms is besonder gebruikersvriendelik en maak dit vir individue sonder webontwerp-ondervinding moontlik om kosteloos hul eie blog te hê.

Aanvanklik was blogs hoofsaaklik oor persoonlike ondervindings en onderhou deur `n enkele persoon as `n vorm van selfuitdrukking of kommentaar op sekere onderwerpe. Hierdie blogs is moontlik gemaak deur webwerwe soos Open Diary, Live Journal and Blogger. Teen die laat 2000’s is die fokus verskuif van blogs as persoonlike dagboekinskrywings na volwaardig geredigeerde en gemodereerde digitale tydskrifte. “Multi-skrywer blogs” begin ontwikkel. Bloginskrywings word geskryf en professioneel geredigeer deur groot groepe skrywers.

Soos die funksie van blogs met tyd verander, pas die formaat ook aan. Bo en behalwe tradisionele blogs, ontstaan daar ook afgeskaalde weergawes van die oorspronklike formaat in die vorm van die mikroblog.

Mikroblogs bestaan uit korter kommentaar of inhoud, fotos, videos of ander multimedia. Twitter en Tumblr is twee van die mees populêre voorbeelde van mikroblogs en is veral nuttig vir intydse opdaterings van belangrike globale gebeure.

As jy geinspireerd voel en `n blog vir jou departement wil begin, hoef jy nie ver te soek nie. Jy kan op die universiteit se eie WordPress-platform registreer en jou loopbaan as `n blogger begin! Vir meer inligting, kliek hier.

[SOURCE: www.howtogeek.com & www.wikipedia.org]

Tags: blog
Posted in Kommunikasie, Konnektiwiteit | Comments Off on Om te blog of nie te blog nie?

Oppas vir SIM-kaart omruilbedrog

Vrydag, Februarie 22nd, 2013

Dis `n bekende kuberstrik, maar as dit met een van jou kollegas gebeur, word dit skielik `n realiteit en groter moontlikheid dat dit ook met jou kan gebeur. SIM-kaart bedrog vind plaas as kuberkriminele `n SIM-kaart ruiling gebruik om jou sekuriteitsboodkappe en eenmalige wagwoorde, gestuur deur jou bank, te bekom. Deur die eenmalige wagwoord te gebruik, kan begunstigdes se detail verander word, nuwes byvoeg en fondse uit jou rekening oorgedra deur jou persoonlike inligting te gebruik.

Gedurende die afgelope vakansie het een van ons Tygerberg-kollegas R20 000 op hierdie wyse verloor en versoek dat ons ander personeel ook waarsku.

Hoe werk `n SIM-kaart omruiling?

`n SIM-kaart omruiling vind plaas nadat kuberskelm jou bank aantekeninligting geoes het, omdat jy op `n “phishing” e-pos reageer het. (Hierdie is een van die redes hoekom “phishing” e-posse so gevaarlik is en jy nooit daarop moet reageer of op die skakels in dié e-posse moet kliek nie.)
Sodra die persoon jou selfoonnommer en ander persoonlike inligting in die hande gekry het, kan hy jou identiteit aanneem en `n nuwe SIM-kaart versoek van jou selfoonverskaffer.
Die selfoonverskaffer dra jou SIM-kaart identiteit oor na die nuwe SIM-kaart en kanselleer die ou kaart.
Geen sein word vanaf die ou SIM-kaart ontvang nie en geen SMS’e kan gestuur of oproepe kan gemaak word nie. Hierdie is die eerste teken dat daar fout is, ook as jy die boodskap “SIMCARD INVALID” kry.
Die SMS-magtiging verwysingsnommer, wat normaalweg aan die klient gestuur word, bereik die kuberkraker ipv jou, die geldige eienaar, en hy kan eenmalige betalings maak en begunstigdes skep.

Wat moet ek doen as ek `n onwettige SIM-omruiling vermoed?

Indien jy die slagoffer is van `n onwettige SIM-omruiling of vermoed dat jy moontlik is, skakel dadelik jou selfoonverskaffer vir hulp.
Kontak jou internetbankdienste hulplyn en versoek dat internetdienstetoegang onmiddellik beëindig word. Dit sal voorkom dat die skuldiges toegang tot jou rekeninge verkry.

Wat kan jy doen om SIM-kaartbedog te voorkom?

Beskerm jou informasie – al jou informasie.
Moet nooit jou ID-nommer verskaf tensy jy doodseker is van die geldigheid van `n webwerf nie. Die bank het reeds jou ID-nommer en sal dit nie weer vra nie.
Moenie jou selfoonnommer verskaf op webwerwe tensy jy die egtheid van die webwerf geverifieer het nie. “Phishing” webwerwe versoek gewoonlik inligting soos `n ID-nommer, e-posadres en e-pos adres wagwoord.
Maak altyd seker dat jou kontakdetails op internetbankdienste geldig en korrek is. Wanneer jou inligting verander, dateer dit op by op internet bankdienste of by jou plaaslike bank.

[INLIGTING VERSKAF DEUR DAVID WILES]

Tags: selfoon, kuberstrikroof, sekuriteit
Posted in Kommunikasie, Sekuriteit | Comments Off on Oppas vir SIM-kaart omruilbedrog

Hou jou selfoon veilig

Vrydag, Februarie 22nd, 2013

Jou slimfoon is deesdae net so kragtig soos jou skoot- of tafelrekenaar van`n paar jaar gelede. Jy stoor ook meer kosbare persoonlike en werksinligting daarop en is feitlik altyd verbind aan die internet. Dit is egter ook juis hierdie gerieflikheid wat vereis dat jy net soveel sekuriteit toe pas op jou selfoon as wat jy op jou rekenaar sou gebruik.

Cooltech, iAfrica se tegnologiese afdeling, het `n paar idees om seker te maak dat die inligting op jou foon veilig bewaar word van “malware”, kuberkriminele, toestelfoute en ander sekuriteitsrisikos.

Stel `n wagwoord op

Die eenvoudigste en eerste stap is om doodeenvoudig `n wagwoord op jou foon te sit. Meeste slimfoonvervaardigers laat jou toe om `n pinnommer of wagwoord in te sleutel elke keer as jy jou toestel aansit of weer gebruik na `n tydperk van onbruik.

Installeer sekuriteitsagteware

Aangesien slimfone nie meer net telefoonnommers en sms’e stoor nie, maar ook, onder andere, bankinligting, is hulle ook `n maklike en perfekte teiken vir kuberskelms.

Oorweeg dit om antivirus-sagteware te installeer om jou toestel te beskerm teen “malware”. F-Secure, Norton, en ander groot sekuriteitsagteware-verskaffers bied elk hul eie weergawe vir die hoof slimfoon platforms.

Aktiveer die afstanduitvee-funksie

Die grootste risiko vir jou as slimfoongebruiker is as jou toestel gesteel of verlore raak. Eerder as jou bekommer oor iemand wat deur jou belangrike inligting snuffel, aktiveer die uitveefunksie wat van `n afstand gedoen kan word.

Hierdie funksie sal jou toelaat om jou fotos, besigheidskontakte en e-posse uit te vee met die hulp van enige internetverbinding as jou foon weg is en jy vermoed jy gaan dit nie weer terugkry nie. As jy nog nie jou foon wil opgee nie, kan sekere posisiebepalingsfunksies jou help om `n idee te kry van waar jou telefoon hom bevind.

Sommige vervaardigers soos BlackBerry en Apple bied die afstanduitvee-funksie en opspoortoepassing vir hul nuutste toestelle, terwyl derdeparty toepassings beskikbaar is vir ander platforms.

Laai veilige, goedgekeurde toepassings af

Die versoeking om gratis, nie-amptelike toepassings op jou iPhone of Android te probeer laai i.p.v. om dit te koop deur die iStore, is nou wel baie groot, maar jy neem `n groot risiko en stel jou foon bloot aan “malware”. Hou eerder by gemagtigde bronne wat streng kwaliteitskontrole toepas op die toepassings wat hulle verskaf en nie met nare ekstras kom nie.

Rugsteun jou data

`n Groot deel van jou lewe is op jou slimfoon – e-pos, telefoonkontakte, dokumente, fotos en baie meer. Net soos jy jou rekenaar (hopelik!) rugsteun, doen dieselfde met jou selfoon sodat alles nie verlore is as jou foon wegraak, gesteel word of beskadig word nie. Baie slimfone laat jou toe om `n deeglike rugsteun te maak na jou rekenaar of ten minste net die belangrikste data en opstellings aanlyn te stoor.

Tags: selfoon, sekuriteit
Posted in Kommunikasie, Konnektiwiteit, Sekuriteit | 2 Comments »

Skype-gebruikers geteiken deur “ransomware”

Vrydag, Oktober 12th, 2012

Skype gebruikers is tans die teiken van ransomware deur middel van `n boodskap wat voorkom asof dit vanaf iemand in jou kontaklys kom.

Die boodskap lui “lol is this your new profile pic?”, gevolg deur `n skakel. As Skype-gebruikers op die skakel kliek, laai `n zip leêr wat `n uitvoerbare program bevat, af en word die rekenaar se stelsel besmet.

Die stelsel is gevolglik ontoeganklik en wys slegs `n boodskap wat geld vereis.

Meer oor die Skype ransomware.

BRON: www.mybroadband.co.za

Tags: ransomware, skype
Posted in Kommunikasie, Sekuriteit | Comments Off on Skype-gebruikers geteiken deur “ransomware”

Hoekom verander na `n nuwe Exchange?

Vrydag, Julie 27th, 2012

Informasie Tegnologie het onlangs alle Stellenbosch Universiteit gebruikers opgradeer van Microsoft Exchange Server 2007 na Exchange Server 2010. Baie van julle wou weet hoekom dit nodig was om te verander van die bestaande weergawe na iets anders en nuut. Glo dit of nie, die nuutste Exchange het `n hele paar voordele – tegnies en ook vir jou as gereelde Outlook-gebruiker.

Die duidelikste verskille tussen die twee weergawes kan gesien word in Webmail. Die nuwe Webmail (ook bekend as die Outlook WebApp) het `n nuwe ontwerp en ook `n paar handige nuwe funksies.

Webmail 2010 gebruik dieselfde “gesprek”-uitleg as jou Outlook 2010.

Boodskappe word gewys in stringe sodat alle boodskappe oor `n spesifieke onderwerp logies saam gegroepeer word. Jy hoef nie meer te soek vir `n boodskap om te verstaan wat die konteks van iemand se antwoord is nie. As `n nuwe boodskap ontvang word, skuif die hele string chronologies na die tyd en datum van die nuutste boodskap.

Hierdie uitleg het voordele en nadele. As dit nie vir jou werk nie, kan jy dit maklik afskakel. Kliek net op Arrange By, rol af na Conversations, en deselekteer Show Messages In Conversations.

Met 2010 kan jy ook `n e-pos aanstuur as aanhegsel. Dit kan handig te pas kom as jy `n boodskap vir iemand wil aanstuur, maar eers wil hê die persoon moet jou kommentaar lees voor hy die boodskap oopmaak.

Voorheen was die voorkeur webblaaier vir Webmail Internet Explorer. As jy Firefox gebruik het, het jy die afgewaterde weergawe van Webmail gekry. Nou kry jy die volledige Webmail as jy Safari (Mac OS X) of Firefox gebruik.

2010 beskik oor die vermoë om `n gedeelde kalender oop te maak en langs jou eie te sien – handig as jy ook iemand anders se kalender moet koördineer.

E-pos wenke is ook geaktiveer in Oulook 2010. Hierdie funksie sal jou waarsku as jy “reply all” gebruik vir `n groot groep mense of as jy sensitiewe materiaal wil aanstuur. Dit sal jou ook in kennis stel as iemand vir wie jy e-pos stuur sy/haar “Out of office” of “auto-reply” aangesit het.

Gereguleerde verkeer laat toe dat verspreidingslyste en posbusse gemodereer word deur `n nie-admin gebruiker soos `n bestuurder wat boodskappe eers moet goedkeur voordat dit afgelewer word.

Waarskynlik die grootste voordeel is die lae stoorkoste. Exchange Server 2010 se databasis-enjin is tot 70% meer effektief as Exchange Server 2007 in terme van sy skyf lees- en skryfvermoeë. Dit maak die uitrol van groter databasisse, met baie groter posbuskwotas op baie groter skywe, moontlik.

Dit beteken meer spasie vir jou. Alle personeellede het nou `n posbus-beperking van 1GB – dubbeld soveel as met Exchange 2007, die vorige weergawe.

Wil jy meer weet?

Posted in Kommunikasie, E-pos | 2 Comments »

IT skakels

US skakels

Onlangse bydraes

Kategorieë

Argiewe