Language:
SEARCH
  • Onlangse bydraes

  • Kategorieë

  • Argiewe

skype

Microsoft 365 vs. Office 365: Wat is die verskil?

Dinsdag, Junie 4th, 2019

Microsoft 365 vs. Office 365: Wat is die verskil?

Konsekwentheid van produkname is belangrik as jy nie jou kliënte wil verwar nie, maar as jy veelvuldige produkte met verskeie weergawes het, kan dinge begin deurmekaar raak. Ja, Microsoft, ons kyk na jou…

Microsoft het Microsoft 365, ’n groep bestaande produkte, onder een lisensie bekendgestel. Die naam is soortgelyk aan die reeds bestaande Office 365 (en die onlangse naamverandering van Dynamics 365). Heelwat mense het in der waarheid alreeds Office 365 eerder Microsoft 365 begin noem.

So dis maklik om te sien hoe hierdie twee produkte verwar kan word met mekaar. Dit raak selfs meer verwarrend as jy besef dat Microsoft 365 ook Office 365 insluit.

Kom ons kyk na die verskille:

Die kort weergawe

Office 365 is ’n wolkgebaseerde stel produktiwiteitstoepassings soos Outlook, Word, PowerPoint, ens. Microsoft 365 is ’n groep dienste wat Office 365 insluit, sowel as etlike ander dienste, insluitende Windows 10 Enterprise.

Die lang weergawe

Office 365

Office 365 is ’n wolkgebaseerde stel toepassings en dienste gebou rondom produktiwiteit in besigheid. Dit sluit toepassings in wat jy waarskynlik reeds ken, soos Microsoft Outlook, Word, PowerPoint, Excel, Skype for Business, SharePoint, OneDrive en Teams, sowel as ander kragtige produktiwiteit-, saamwerk- en sekuriteitseienskappe.

Microsoft 365

Microsoft 365 is ’n groep dienste wat Office 365 insluit. Dit sluit ook Windows 10 Enterprise, Enterprise Mobility + Security (EMS) en masjienleer in. Soos die naam aandui is dit meer gerig op groter organisasies wat ’n enkele, veilige platform benodig waar daar gedeel en saamgewerk moet word. Dit sluit sterk data-eienskappe bo en behalwe Windows 10 Pro en Office 365.

Wat is ingesluit by Microsoft 365 in vergelyking met Office 365?

Beide produkte het die vermoeë om volledig geïnstalleerde Office-toepassings op fone, tablette en PCs te loop, sowel as die webblaaier weergawes. Jy kry 1TB persoonlike stoorplek vir jou lêers, besigheid e-posse en kalenders. Jy het ook toegang tot Skype for Business vir kitsboodskappe en video-oproepe, sowel as Microsoft Teams en nuwe hulpmiddels soos Delve en Planner.

Die verskil kom in by die bestuur van toestelle. Anders as Office 365, kom Microsoft 365 met ’n enkele konsole waar gebruikers en toestelle bestuur kan word. Jy kan ook outomaties Office-toepassings uitrol na Windows 10 PCs.

Office 365 het geen sekuriteitshulpmiddele nie. Die alternatief het die vermoeë om data te beskerm oor verskeie toestelle en ook veilige toegang. Jy kan ook Windows 10 toestelle beskerm teen risiko’s soos malware deur middel van Windows Defender.

[ARTIKEL DEUR MANDY WANZA]

Skype Translate einde 2014 vrygestel

Vrydag, Junie 6th, 2014

Ons het onlangs genoem dat Skype groep video -oproepe gratis beskikbaar gemaak het aan sy gebruikers en nou is hulle weer in die nuus met `n nuwe innovasie. 

Laasweek het Microsoft CEO Satya Nadella aangekondig dat Skype binnekort ook stem- en video-oproepe amper-intyds kan vertaal. Dit beteken dat jy in Afrikaans met jou Russiese kollega in Moskou kan praat en julle mekaar 100% sal kan verstaan sonder om `n gemeemskaplike taal soos Engels te gebruik. Aangesien Skype meer as 300 miljoen gebruikers per maand het, is dit vanselfsprekend dat Skype Translate `n groot internasionale bereik gaan hê.

Skype Translate brei ook sy taaldatabasis uit deur middel van “leeroordrag” – die sagteware verbeter die tale waaroor dit reeds beskik, terwyl `n nuwe een aangeleer word. Microsoft is nie duidelik oor hoe die proses werk nie, maar dis verseker `n algoritme wat handig te pas kom.

Die sagteware is tans in `n toetsfase, maar Microsoft het amptelik aangekondig dat `n beta-toets weergawe beskikbaar sal wees vir Windows 8 teen die einde van die jaar. As jy Skype Translate in aksie wil sien, kyk gerus na die demonstrasie video.

Screen shot of the Skype Translate demo at Code Conference.

[BRON: www.memeburn.com]

Skype groep video-oproepe nou gratis

Vrydag, Mei 23rd, 2014

As jy vriende en familie oorsee het, weet jy dat Skype `n handige middel is om gratis, of teen `n relatiewe lae koste, met hulle te kan kommunikeer. Jy is ook een van 663 miljoen geregistreerde Skype-gebruikers.

Skype vier die jaar reeds sy 11de verjaardag en is ontwikkel deur `n Deen en Sweed genaamd Janus Friis en Niklas Zennström as `n stem-oor-IP- en blitsboodskapdiens. Friis en Zennström het die applikasie se naam afgelei uit twee woorde – sky en peer. 

Sedert 2011 is Skype die eiendom van Microsoft. Dié maatskappy het Skype gekoop teen die stewige bedrag van $8.5 biljoen. Skype se hoofkantoor sit egter nie in Amerika nie, maar in Luxembourg, terwyl die grootste gedeelte van die ontwikkelingspan en 44% van Skype-werknemers hulle in Tallinn en Tartu in Estonia bevind.

Met Skype kan jy met enigiemand gesels deur middel van oorfone, via video met `n webkamera en ook deur blitsboodskappe te tik. Oproepe na ander Skype-gebruikers is gratis, maar landlynoproepe en selfoonoproepe word van jou rekening gedebiteer. 

Buiten die gewone funksionaliteit, soos bo genoem, is daar ook funksies soos leêroordrag en video-oproepe vir groepe. Laasgenoemde is onlangs eers gratis beskikbaar gestel aan alle Skypegebruikers. Voorheen was dit slegs vir premium-gebruikers. 

Skype video-oproepe gee aan jou die geleentheid om groepoproepe deur middel van `n webkamera te maak met tot `n maksimum van 9 ander mense op een slag. As jy gebruik wil maak van hierdie nuwe, gerieflike funksie, kan jy meer daaroor lees op Skype se webwerf

Is jy oorsee en het ons nodig?

Vrydag, Oktober 18th, 2013

`n Paar jaar gelede kon jy ons net bel of e-pos stuur, toe kon jy ons blog lees en tweets volg.

Nou kan jy selfs op ons nommer druk as jy oorsee is en sukkel met `n rekenaarverwante probleem.

Spaar jouself die buitensporige internasionale oproepkostes en kom kuier vir ons op Skype deur te soek na helpinfo@sun.ac.za of die gebruikersnaamitstellenuni.

Skype-gebruikers geteiken deur “ransomware”

Vrydag, Oktober 12th, 2012

Skype gebruikers is tans die teiken van ransomware deur middel van `n boodskap wat voorkom asof dit vanaf iemand in  jou kontaklys kom.

Die boodskap lui “lol is this your new profile pic?”, gevolg deur `n skakel. As Skype-gebruikers op die skakel kliek, laai `n zip leêr wat `n uitvoerbare program bevat, af en word die rekenaar se stelsel besmet.

Die stelsel is gevolglik ontoeganklik en wys slegs `n boodskap wat geld vereis.

Meer oor die Skype ransomware.

BRON: www.mybroadband.co.za

 

© 2013-2024 Disclaimer: The views and opinions expressed in this page are strictly those of the page author(s) and content contributor(s). The contents of this page have not been reviewed or approved by Stellenbosch University.