As jy verby IT stap en `n donderende getoeter vanaf die grondvloer hoor, moenie skrik nie, dis net Wendy Robyn wat `n projek afgesluit het en dit een van die dae gaan begin aankondig met `n vuvuzela. Ja, dinge gaan soms so bedrywig by IT se netwerkafdeling dat daar oomblikke vir stresverligting gemaak moet word.

Wendy is verantwoordelik vir projekfinansiering binne IT se netwerkafdeling. Dit sluit onder andere die insameling van inligting vir kosteberamings, fondse aanvra, bestellings hanteer, fakture betaal en projekstate opdatum hou vir die suksesvolle afsluiting van projekte. Sy hanteer ook alle navrae rondom projekte se finansies. Nie sleg vir iemand wat Duits bo Rekeningkunde op skool gekies het nie.

Na matriek by Immaculata High meisieskool, het haar Nasionale Diploma in Menslike Hulpbronne voltooi. Kort daarna aanvaar sy `n pos by Pierre Cronje, `n meubelvervaardiger wat al op Top Billing gebruik is. Sy werk eers as ontvangsdame, maar kort voor lank word sy aangestel as Payroll administrator. Dis ook hier waar haar liefde vir dekor saad geskiet het – `n passie wat baie handig te pas kom noudat sy en haar man, na 9 jaar, hul eie huis het.

Intussen het sy vlak 3 van AAT Rekeningkunde voltooi en sy sal binnekort voortgaan met die vierde.Dit was wel uitdagend om te leer met twee kinders van onderskeidelik 6 maande en 5 jaar, waarvan die oudste haar beveel het om haar boeke neer te sit. “Ek het maar 4 uur in die oggend begin swot.”

“Ek hou van struktuur en finansies.”

“Die beste deel van my werk is om `n projek te kan afsluit en die satisfaksie wat dit meebring.” Sy geniet dit om met finansies te werk, omdat dit so presies is en sy `n projek kan balanseer teen die einde daarvan. “Die laaste sent wat uit is, sal my pla!” Aan die ander kant is projekte wat lank oopbly weens verskeie probleme en vertragings, `n groot frustrasie.

Maar sy het amper binne die eerste week bedank by IT.”Die kombinasie van Afrikaans probeer verstaan en die vreemdheid van die tegniese omgewing was vir my `n groot  uitdaging.” En nou, na 7 jaar by IT is daar is nie eers `n sweempie van `n Engelse aksent nie en het sy beide die tegnologie en Afrikaans onder die knie.

“As Lynn, Albrecht en ek eers so sit en begin gesels oor die “ou dae” en allerhande stories vertel, moet jy weet, almal is alweer gestres. Ons drie lag baie.”

“Werk is nie alles nie, familie en `n jou lewe buite werk is wat op die ou end saakmaak.”

Met twee kinders onder 5 jaar, is ander tydverdrywe nie altyd `n opsie nie. Maar retail theraphy is definitief een. “O, ek is lief vir shop, maar ek gee nie baie geld uit nie. Dit gaan meer oor die lekkerte van soek en`n bargain kry!” Gelukkig is sy is baie gedissiplineerd wat geld betref – by die werk en met haar eie finansies.

By die gym sal jy haar maklik op die roeimasjien kry, maar nie op `n trapmeul nie. “Dit maak my te duiselig.” “Ek is nie mal oor sport nie, maar gaan darem gym toe en probeer gesond eet. Enigiets met saadjies!” Sy hou ook van stap en sal maklik erens heen stap in plaas van om in die kar te spring.

“Jy sê nie ‘nee’ vir liefdadigheid nie.”

Liefdadigheid is vir Wendy nie onderhandelbaar nie en sy en`n vriendin, begin om elke jaar Kersfees geskenkpakkies in te samel vir organisasies wat reeds min befondsing ontvang soos soos Sunrise Educare in Bishop Lavis en die CHOC House (Children fighting Cancer). “Omdat ek self kinders het, is behoeftige kinders ook my hooffokus.Dis my manier van teruggee, omdat ek self so geseënd is”.

Tussendeur is daar af en toe tyd vir `n vakansie by Club Mykonos, maar eendag as die kinders groter is, sal die plaaslike Mykonos verruil word vir die regte een! Ook Australië en Frankryk is op die lys vir `n trip in die toekoms. Maar vir nou hou haar 2 kinders, 1 hond en haar man haar besig genoeg.

As jy meer van Wendy se liefdadigheidsprojek, Christmas Smiles, wil weet, stuur vir haar e-pos by wrobyn@sun.ac.za.