Gemorspos, of te wel “spam”, is wanneer identiese, meestal steurende, boodskappe na `n groot hoeveelheid e-pos- of selfoongebruikers gestuur word. As `n ontvanger kliek op een van die skakels in die boodskap, word hulle herlei na strikroof webwerwe of webwerwe wat “malware” huisves. “Spam” e-posse kan ook versteekte “malware” skripte bevat. 
Die teenoorgestelde van “spam” – met ander woorde e-posse wat jy WIL ontvang, word natuurlik “ham” genoem. (ja regtig)
Die eintlike oorsprong van die woord “spam” hou verband net die oorspronklike, geprosesseerde variasie en ons het die obskure Britse groep komediante van Monty Python om te blameer daarvoor. In die 1970 skets sing-praat `n groep Vikings die woord “spam” so onophoudelik in `n restaurant dat niemand anders kan praat nie. Kliek hier as jy die oorspronklike Monty Python skets wil sien waar die woord “spam” 132 keer gebruik word in 3 en `n half minute!
Selfs Google vind die woord interessant. Die maatskappy het op `n stadium `n verrassing versteek vir hulle gmail-gebruikers. As jy jou se “spam” leêr sou oopmaak, het dit omgeskakel na `n webinsetsel met `n verskeidenheid resepte vir regte spam. Onder andere resepte vir “Spam Primavera”, “Spam Swiss Pie”, “Creamy Spam Broccoli Casserole” en “Spam Veggie Pita Pockets”. Die eerste gemorspos is reeds op 3 Mei 1978 gestuur om `n nuwe rekenaarstelsel te adverteer. Dis gestuur vir 600 gebruikers van ARPANET en al 600 adresse is met die hand ingetik vanaf `n uitgedrukte dokument. Jy kan die e-pos hier lees.
Vanaf Augustus 2010 word daar geskat dat daagliks ongeveer 200 biljoen gemorspos boodskappe gestuur word. Gelukkig gebruik ons op kampus redelike streng gemorspos filters om groot hoeveelheide onnodige e-posse uit ons posbusse te hou. As jy egter nogsteeds te veel kry na jou sin, gaan lees gerus hier. As dit jou enigsins beter laat voel – volgens Steve Ballmer, CEO van Microsoft, kry Bill Gates vier miljoen e-posse per jaar, waarvan die meeste gemorspos is.
SOURCES: http://blog.emailaddressmanager.com, http://mashable.com & www.wikipedia.org
Tags: e-pos, kuberstrikroof, gemorspos