Verbeel jou daar is een platform waar jy notas, tekeninge en lysies kan maak of skakels plaas – netjies versamel in notaboeke met toegang vir vriende, kollegas of familie. Klink heel handig, né?
Microsoft OneNote is sagteware wat ontwerp is om informeel informasie te versamel en ook verskeie persone in staat stel om saam te werk aan een projek.
Die sagteware kan groot hoeveelhede informasie organiseer op bladsye en seksies binne-in notebooks en lyk soos ʼn ring-leêr waarin jy enigiets kan bêre. Jy kan maar sê dis ʼn digitale notaboek waar jy dit wat jy saamgestel of gekry het op ander toepassings, selfs skermskote en klank- en videogrepe, kan oplaai.
Al hierdie inligting is soekbaar, kan gestoor word in die wolk in OneDrive en is daarom ook beskikbaar op jou ander toestelle.
Maar wat is die verskil tussen OneNote en ʼn woordverwerkingsprogram soos Word? Met OneNote kan jy enige plek op die dokument-ruimte skryf of iets plaas deur daarop te kliek. Jy hoef ook nie te onthou om gereeld te stoor nie. OneNote stoor data soos jy werk.
OneNote is beskikbaar as deel van Microsoft Office en Windows 10. Dis ook beskikbaar as ʼn gratis, losstaande toepassing vir Windows OS X, Windows RT, Windows Phone, iOS en Android. ʼn Webgebaseerde weergawe van OneNote word ook verskaf as deel van OneDrive of Office Online en stel gebruikers in staat om notas aan te pas deur middel van hul webblaaier.
Die goeie nuus vir US-personeel is dat jy nie die sagteware hoef te koop of installeer nie. Dis waarskynlik reeds op jou werkrekenaar. Kliek op die Windows knoppie heel links in die hoek van jou skerm en tik “OneNote” in die soekveld.
Indien jy OneNote op jou foon wil gebruik, kan jy dit aflaai op Google Play. Jy sal sodoende, van enige plek, toegang tot jou notaboeke hê as jy dit sinchroniseer na OneDrive.
Wil jy leer hoe om OneNote te gebruik? Hier is ʼn OneNote instruksie-video op Youtube.
[BRONNE: http://www.pcworld.com, http://www.wikipedia.org/]
Tags: OneNote