Konnektiwiteit « Informasietegnologie

Konnektiwiteit

Google Chrome, portale en poedels

Woensdag, Desember 3rd, 2014

Aan die einde van Oktober het Google aangekondig dat hulle beoog om terug te val na weergawe 3 van die SSL-protokol in Chrome 39 en dat SSL heeltemal verwyder sal word in Chrome 40. Die rede hiervoor is dat die gebruik van SSL in hierdie Chrome-weergawes `n moontlike sekuriteitsrisiko bied. Die risiko het is intussen gedoop as POODLE (Padding Oracle On Downgraded Legacy Encryption)

Wat beteken dit in gewone taal?

Daar bestaan US-webbladsye wat op die Oracle-infrastruktuur gebou is en van die SSL-protokol gebruikmaak. Die gevolg is dat, indien jy Google Chrome as jou daaglikse blaaier gebruik, jy gaan sukkel om toegang tot sekere inligting te kry. As jy dus na my.sun.ac.za gaan en van daar probeer uitkom by SUN-e-HR, Eksamenuitslae, Etebesprekings, ens, gaan jy dalk onsuksesvol wees.

Indien jy Firefox of Internet Explorer gebruik, kan jy steeds by al die nodige inligting uitkom. Alternatiewelik kan jy ook m.sun.ac.za gebruik vir sekere funksies. Hierdie is egter net `n tydelike probleem.

Informasietegnologie beoog om die naweek `n opgradering te doen wat die Chrome-probleem sal omseil. Dit sal egter beteken dat sekere dienste tydelik vanaf Saterdag, 6 Desember 2014, om 12:00, sowel as Sondag, 7 Desember, nie beskikbaar sal wees nie.

Hierdie dienste sluit alle portaaltoepassings, my.sun.ac.za, Sun-e-HR, ens. in. Aangesien OIC af is gedurende dié tydperk sal geen betalings gedoen kan word nie en laastens sal die funksie om wagwoorde te verander ook nie beskikbaar wees nie.

Ons hoop egter om so gou moontlik die opdatering te voltooi en `n beter platform vir gebruikers te bied wanneer dit voltooi is.

Vir enige navrae, stuur asb. e-pos aan helpinfo@sun.ac.za of skakel x4367.

Posted in Konnektiwiteit, Internet, Sekuriteit | Comments Off on Google Chrome, portale en poedels

Sal jy kan afskakel?

Vrydag, Oktober 24th, 2014

Volgens sielkundige en neuro-wetenskaplike Sean Luo van die Universiteit van Columbia, weerspieël 3.7 tot 13 persent van Amerika en 10 persent van Suid-Korea se internetgebruikers simptome van internetverslawing of ontoepalike internetgebruik. (http://www.cbsnews.com/news/how-real-a-risk-is-social-media-addiction/) In China is rehabilitasiekampe vir internetverslaafdes reeds `n algemene verskynsel. Algemene bewuswording rondom internet en sosiale media verslawing is gelukkig ook aan die toeneem.

Verlede week is berig dat dokters `n man opgeneem het in die Amerikaanse vloot se middelmisbruik-program vir sy verslawing aan Google Glass. Hy het die kopstuk vir tot 18 ure per dag gedra en wanneer dit verwyder word, ernstige onttrekkingsimptome ervaar. Self as hy dit nié gedra het nie, het hy kompulsief sy regterslaap, waar die toestel normaalweg geaktiveer word, getik. Hy is gevolglik gediagnoseer met IAD (Internet Addiction Disorder)

Dis egter nie `n nuwe verskynsel nie. Reeds is 1996, kort nadat die internet ons lewens betree het, is internetverslawing reeds herken as `n moontlike psigiatriese afwyking. Selfs al is dit nie amptelik opgeneem in die nuutste DSM(Diagnostic and Statistical Manual of Mental Disorders)-handleiding, wat gebruik word deur psigiaters nie, behoort dit te wees volgens kenners. Psigiaters verkies ook die term PUI (Problematic Internet Use bo die gebruik van die woord “verslawing”. PUI verwys na die buitengewone hoë gebruik van rekenaars in so `n mate dat dit inbraak maak om `n persoon se daaglikse lewe.

Die diagnose vir internetverslawing is nie `n maklike een nie, aangesien iemand nie verslaaf raak aan die medium self nie, maar eerder aan die beskikbare aanlyn-inhoud. Die internet is slegs die platform daarvoor. Daar word ook beweer dat IAD bloot `n simptoom is vir ander onderliggende afwykings eerder as een op sy eie. Vele ander verwante verslawings val onder die algemene IA-term, byvoorbeeld dobbelverslawing, verslawing aan internetverhoudings, aanlyn inkopies, ens. (meer detail oor IAD kan gevind word op www.wikipedia.org)

Sou jy kon afskakel, selfs net vir `n dag? Wat van dié naweek sonder Facebook, Twitter of e-pos? Dink net hoeveel tyd sal jy hê vir ander aktiwiteite …

In 2013 het Paul Miller, `n Amerikaanse joernalis van Springfield, Missouri en senior-redakteur van The Verge besluit om af te skakel van die altyd-verbinde aanlyn wêreld waarin hy hom bevind het. Sy doel was om “homself te vind” en meer produktief te wees. Hy’t homself afgesny van die internet te gebruik, ophou sosiale media gebruik en teruggegaan na `n wêreld voor internet, toepassings en slimfone. Jy kan sy praatjie hieronder kyk en hoor hoe sy ervaring was.

Ander verwante videos en kortfilms:

https://www.youtube.com/watch?v=Z7dLU6fk9QY
https://www.youtube.com/watch?v=OINa46HeWg8
https://www.youtube.com/watch?v=e0H6AzEMHSc

[BRONNE: http://www.zdnet.com; http://www.cbsnews.com, http://www.wikipedia.org]

Tags: internetverslawing
Posted in Kommunikasie, Konnektiwiteit, Internet | Comments Off on Sal jy kan afskakel?

Die wolk is oppad

Vrydag, September 26th, 2014

24726-cloud-outline-vector

Binne die volgende paar maande gaan Matie-studente e-pos kan stuur soos nooit tevore.

As jy `n gereelde Twitter-gebruiker is of soms in die Neelsie of Biblioteek ronddwaal, het jy waarskynlik al kennisgewings opgemerk wat verwys na die “cloud”. Moenie bekommerd wees nie – ons verwys nie na die ontwykende son en tipiese Kaapse weer nie. Inteendeel, hierdie wolk bring goeie nuus.

Studentegetalle het oor die afgelope paar jare met rasse skrede toegeneem en daarmee saam die behoefte vir meer e-pos stoorspasie. Tot hede is alle studente se e-pos gehuisves op die universiteit se bedieners, maar spasie is besig om uit te loop. Die dae van e-pos op plaaslike bedieners huisves, is iets van die verlede.

Sedert verlede jaar ondersoek Informasietegnologie moontlike oplossings vir die probleem en die gevolgtrekking is gemaak dat Office 365 die beste keuse vir studente e-posse is. MS Office en Microsoft bedryfstelsels word reeds gebruik in studente rekenaargebruiksareas en sal gevolglik maklik kan integreer met bestaande tegnologie.

Met die wolkpos-projek betree Universiteit Stellenbosch `n nuwe fase van e-pos en hoewel personeel dieselfde pad gaan stap, is die grootste behoefte tans om eers alle studente se e-pos te skuif.

Die teikendatum vir die migrasie is Oktober. Ons sal studente egter deurlopend op hoogte hou van verwikkelinge deur middel van Twitter.

`n Webblad sal beskikbaar gestel word waar studente self kan migreer en die wolk-platform toets. Studente kan dus self kies wanneer hulle wil migreer. Diegene wat teen die Desember nog nie self migreer het nie, sal outomaties teen die einde van die jaar deur IT geskuif word na die Office 365.

Maar hoekom sukkel met min spasie as jy `n volle 50GB tot jou beskikking kan hê? Office 365 bied ook ander voordele soos stoorspasie op OneDrive en aanlyntoegang tot Microsoft toepassings soos Word, Excel, ens.

As jy meer wil weet oor die Wolkpos-projek, volg ons op Twitter by @ITStellenUni of #theitcloud.

Tags: wolk stoorspasie, e-pos, the it cloud
Posted in Konnektiwiteit, E-pos, Studente | Comments Off on Die wolk is oppad

Hoe om die meeste uit jou tablet te put

Vrydag, September 26th, 2014

Tablette is nie goedkoop nie, maar hulle is beslis een van die beste beleggings wat jy as ’n studente kan maak. (lees ons vorige artikels oor die koop van `n tablet en hoe om dit te gebruik om mee te leer)

Jy moet egter nie net ’n tablet koop en wondere verwag nie. Jy sal ’n paar aanpassings moet maak in hoe jy leer om die grootste voordeel uit jou belegging te trek.

Meer spesifiek, jy sal werklik jou tablet in jou leerervaring moet integreer: los jou notablok by die huis, kry al jou klasnotas in digitale vorm en begin om boeke in e-formaat te koop. Dit sal aanvanklik moeilik wees en jy sal dalk bevraagteken of dit uiteindelik alles die moeite werd is. Maar sodra jy jou werkvloei by jou tablet aangepas het, sal jy die voordele tienvoudig trek.

Verder sal jy ook die beste apps vir die werk moet kry. Net soos rekenaars sagteware soos Microsoft Word kan laat loop, het tablette ook klein sagtewarepakkette wat as “apps” bekend staan. Daar is letterlik honderde duisende apps wat vir beide iOS en Android beskikbaar is – elk van hulle voer spesifieke funksies uit en werk goed in spesifieke kontekste. Die meeste apps is goedkoop (minder as $5 of R50) en kan help om jou produktiwiteit drasties te verhoog.

Kyk na hierdie blogartikel vir ’n lys nuttige iOS apps vir studente. En vir Android, kyk na hierdie opsomming.

WENK: Vir ’n gids oor apps koop, kyk na hierdie artikel vir iOS en hierdie een vir Android.

Kan ’n tablet ’n rekenaar vervang?

Indien koste jou grootste bekommernis is en jy tussen ’n tafelrekenaar/skootrekenaar of ’n tablet moet kies, sal jy seker wonder of laasgenoemde eersgenoemde volledig kan vervang.

Die kort antwoord – ten minste tans – is NEE. iPads en Galaxy Tabs (sowel as ander Android-toestelle) is baie nuttig en sal feitlik alle daaglikse take kan uitvoer wat studente moet verrig, bv. om die web te deurblaai, e-pos te lees, toegang te kry tot ’n leerbestuurstelsel (bv. SUNLearn), notas te maak, ens.

Jy kan selfs opstelle en verslae op ’n tablet skryf (hoewel jy vir sulke swaardiens tikwerk moontlik ook ’n eksterne sleutelbord sal moet koop). Jy sal egter nie dieselfde sagteware kan loop as wat jy of ’n persoonlike rekenaar of Mac kan doen nie, omdat die sagtewareplatforms verskil. Met ander woorde: indien jou kursus vereis dat jy gespesialiseerde sagteware moet gebruik (soos geïntegreerde drywer elektronika vir programmering (programming IDE – integrated drive electronics) of rekenaargesteunde ontwerpsagteware (CAD – computer-aided design software), sal jy heel moontlik nie net ’n tablet kan gebruik nie.

Hoewel dit definitief waar is dat ’n tablet die beste vir jou werk as jy ook ’n rekenaar/skootrekenaar het, moet jy ook in ag neem indien jy tussen die twee moet kies dat jy altyd die Universiteit se rekenaarsentrums (bv. HUMARGA of FIRGA) vir gespesialiseerde sagteware of swaardiens tikwerk kan gebruik. Hierdie is moontlik ’n goeie manier om die keuse tussen die aanskaffing van ’n rekenaar/skootrekenaar of ’n tablet te vermy.

Laastens moet jy daarop let dat sommige Windows-gebaseerde tablette (bv. die Microsoft Surface Pro) van dieselfde Windows-platform gebruik maak wat jy op ’n rekenaar vind. Tegnies is hierdie tablette dus volwaardige rekenaars in tabletvorm en kan hulle ’n tafelrekenaar/skootrekenaar heeltemal vervang. Hierdie tablette is egter duur en is nie juis gewild nie, wat jou twee keer moet laat dink voor jy besluit om een te koop.

[ARTIKEL DEUR JOHANNES JONKER]

Tags: tablet
Posted in Konnektiwiteit | 2 Comments »

Koop`n tablet: Die keuses

Vrydag, September 5th, 2014

In `n vorige skrywe het ons gekyk na die voordele van tabletgebaseerde leer. Hierdie keer stel ons ondersoek in na die verskeie opsies beskikbaar wanneer jy een wil koop.

Hoewel daar ’n groot verskeidenheid tablette op die mark is, kan hulle almal in terme van die sagtewareplatform waarop hulle loop, gekategoriseer word. Net soos ’n rekenaar op Microsoft Windows, Mac OSX of Linux loop, het ’n tablet ook ’n sogenaamde bedryfstelsel. Wanneer jy dus ’n tablet kies, het jy drie vername keuses^[1]:

’n iOS-gebaseerde tablet:
1. Apple iPad (begin teen omtrent R4 500 vir ’n ouer iPad 2 met WiFi)
2. Apple iPad Mini (begin teen omtrent R3 500 vir ’n eerste generasie toestel met WiFi)
’n Android-gebaseerde tablet:
1. Samsung Galaxy Tab (begin teen omtrent R6 000 vir ’n ouer Galaxy Tab 2 P5100 met WiFi)
2. Samsung Galaxy Note (kos omtrent R7 000 vir ’n Galaxy Note N7100 met WiFi+3G)
3. Goedkoper alternatiewe van ander maatskappy (kos so min as R1 500)
’n Windows-gebaseerde tablet:
1. Lenovo en Dell (begin teen omtrent R5 000)

Die eerste twee groepe is verreweg die gewildste. Hoewel baie mense sal argumenteer dat ’n iPad beter is as ’n Samsung Galaxy Tab – of omgekeerd – is enige keuse tussen die twee hoofsaaklik ’n geval van smaak. As jy egter ’n slimfoon het (bv. ’n iPhone of ’n Samsung Galaxy), maak dit sin om ’n tablet te koop wat op dieselfde sagteware loop sodat jy maklik data en apps tussen die twee kan deel.

Indien koste jou grootste bekommernis is, sal jou beste opsie wees om ’n goedkoper Android-tablet te kry. Hierdie tablette behoort feitlik alles te kan doen wat hulle Samsung grootboet doen, hoewel ietwat stadiger en sonder etlike van die verbeterings wat met Samsung toestelle kom. Wanneer jy egter so ’n tablet koop, moet jy seker maak die batterylewe is goed (jy sal ten minste 8 ure se batterylewe wil hê om deur ’n dag se klasse te kom) en dat die tablet voldoende stoorruimte het (minder as 16 GB sal bietjie vinnig vol word).

Vir gedetaileerde spesifikasies oor beskikbare tablette, kliek hier (aflaaibare pdf)

WENK: Die Universiteit Stellenbosch vorm deel van die nasionale Studente Tegnologie Program (STP), wat skootrekenaars en tablette teen verlaagde pryse aanbied. Kyk gerus na hulle webwerf: www.stp.ac.za. Teen middel-September sal daar nog modelle bygevoeg word, onthou dus om gereeld te gaan kyk.

^[1] Let wel dat die gelyste pryse van die tablette bloot as ’n algemene riglyn dien en in Januarie 2014 geldig was.

Posted in Konnektiwiteit, Studente | 2 Comments »

IT skakels

US skakels

Onlangse bydraes

Kategorieë

Argiewe

Konnektiwiteit

Google Chrome, portale en poedels

Sal jy kan afskakel?

Hoe om die meeste uit jou tablet te put

Koop`n tablet: Die keuses