Op Dinsdag, 8 April het die einde van die Windows XP-era uiteindelik na 12 jaar aangebreek. Vanaf dié datum sal Microsoft nie meer opdaterings vir XP vrystel nie. 

Hoewel jou XP-bedryfstelsel steeds sal funksioneer, beteken dit wel dat jou rekenaar meer blootgestel sal wees aan rekenaarvirusse. Terselfdertyd is XP verouderd en nie meer  effektief genoeg om aan ons behoeftes vandag te voldoen nie. 

Daar is egter nog nie rede vir grootskaalse paniek nie. IT is sedert verlede jaar in die proses om Windows 7, XP se plaasvervanger, uit te rol na XP-rekenaars op kampus.  Ons wil so min as moontlik ongerief veroorsaak en verstaan dat personeel baie besig is en stel ons gebruikers se hulp in die verband hoog op prys.

Met die uitrol van Windows 7 stel ons ʼn aanvaarbare standaard van digitale sekuriteit en integriteit, en ewe belangrik, skep ons ʼn geleentheid vir gebruikers om nuwe tegnologie aan te leer en te bemeester.

Dis wel belangrik om in gedagte te hou dat `n groot aantal rekenaars se hardeware nie in staat is om `n swaarder en nuwer bedryfstelsel te hanteer nie. Ouer werkstasies mag komponente benodig en in so `n geval sal `n tegnikus `n aanbeveling doen. Hierdie uitgawes sal vir  die departement se koste wees. 

Opgradering van XP na Windows 7 is gratis, maar daar is `n koste verbonde aan die rugsteun van werksverwante data,  persoonlike data soos musiek, video en flieks, asook die addisionele hardeware (indien enige) benodig.

Geen 3de party sagteware sal herinstalleer word nie. Indien die rekenaar byvoorbeeld AutoCAD of SAS opgehad het, sal dit nie oorgelaai word nie. Sagteware soos SAS, wat nie deel vorm van IT se standaardsagteware installasie nie, maar steeds ondersteun word deur IT, sal per versoek aan help@sun.ac.za weer installeer word. Sagteware soos AutoCAD, word glad nie deur IT ondersteun nie en die onus berus bydie personeellid/departement om dit weer gelaai te kry.

Die koste vir datarugsteun beloop  R950-00 vir minder as 15GB en R1650-00 bo 15GB. 

As jy haastig is om jou rekenaar op datum en spoed te kry, kan jy ons gerus kontak om `n tyd te skeduleer wat jou sal pas.

`n Vinnige manier om vas te stel watter bedryfstelsel jy tans gebruik, is om HTTP://WHATSMYOS.COM/ te raadpleeg en die webwerf sal die dinkwerk vir jou doen. Indien jy wel XP gebruik, kan jy `n e-pos stuur aan HELP@SUN.AC.ZA  en `n opgradering versoek. Onthou net om vir ons die volgende inligting te gee om die proses te bespoedig – 

die rekenaar se batenommer,  kontaktelefoonnommer,  gebounaam en kamernommer.

SUrveys.sun.ac.za is `n webgebaseerde diens, gratis beskikbaar aan alle Universiteitseenhede en -personeel. Die hoofdoel is om akademiese personeel of nagraadse studente wat aanlyn meningsopnames, as deel van hul akademiese aktiwiteite moet uitvoer, te ondersteun.  SUrveys bied die geleentheid om:

1. maklik `n gesofistikeerde, pasgemaakte, aanlyn meningsopname te skep wat vertakking as addisionele funksie kan hanteer, 

2. die opname te toets,

3. deelnemers uit te nooi of `n unieke hiperskakel vir die opname te publiseer,

4. antwoorde in `n sentrale, geinstitusionaliseerde databasis (dit word gerugsteun en dis sekuur) te stoor,

5. jou eie reaksiedata te kan beheer,

6. data na SPSS of Excel te kan uitvoer.

As jy belangstel om `n meningsopname te doen, let op die volgende:

1. Indien die opname persone insluit wat geassosieer word met die Universiteit – of dit personeel of studente is – is dit onderworpe aan goedkeuring deur die Universiteit se Etiese komitee. Vir inligting oor hierdie proses, besoek asseblief die webwerf van die Departement van Institusionele Navorsing en Beplanning en kliek op  “Applications to undertake research involving University staff or students“.

Indien die meningsopname buite die Universiteit gedoen word, is etiese goedkeuring nie noodwendig nodig nie. Volg egter nogsteeds die stap uiteengesit by punt 1. hierbo. Indien daar aangedui word dat goedkeuring nie vereis word nie, voltooi die e-Survey aaansoekvorm . Tegniese inligting oor die sagteware wat gebruik word, is beskikbaar op die webwerf van Checkbox Survey Solutions.

2. Jou studieleier of dosent kan ook genader word vir hulp met die formulering van vrae en die samestelling van die opname om die beste moontlike resultate te kry. Hulp is ook beskikbaar by die Sentrum vir Navorsing in Wetenskap en Tegnologie en die  Sentrum vir Statistiese Konsultasie.

In Oktober verlede jaar is daar `n eenvoudige proses geimplementeer om besoekers of eksterne werkers op die universiteit se stelsels te registreer. Voorheen was dit nodig om `n vorm in te vul en by Menslike Hulpbronne in te dien. Hierdie stap is sedertdien nie meer nodig nie, aangesien elke departement sy eksterne werkers of besoekers kan registreer. 

Wanneer ‘n persoon ‘n aanstelling of rol benodig en die persoon gaan geen betaling ontvang vir die tydperk van die aanstelling nie, moet hierdie persoon as ‘n eksterne werker aangestel  en dus op SunID registreer word.

Daar is slegs drie tipes aanstellings wat Menslike Hulpbronne steeds hanteer: 

1)      ‘n Permanente aanstelling. 

2)      ‘n Tydelike aanstelling. Hier praat ons sommer ook van ‘n HEMIS aanstelling en dit verwys na die tipe vorms wat voltooi moet word met aanstelling om betaling te ontvang.

3)      Diverse betalings word deur persone in departmente gelaai deur die sun-e-HR stelsel te gebruik. Indien daar nuwe diverse betalings gelaai moet word, skep hierdie funksie ook nuwe UT nommers. Die diverse betalings word wel deur MHB hanteer, maar indien hierdie tipe betaling of aanstellings enige elektroniese toegang of toegang na geboue benodig, moet die persoon ook as eksterne werker of besoeker geskep word op SunID.

Meer volledige instruksies kan hier gevind word of volg ons maklike diagram hieronder.