Language:
SEARCH
  • Onlangse bydraes

  • Kategorieë

  • Argiewe

Gemeenskapsinteraksie

Nuwe aanlyn platform vir SU Sosiale Impak

Maandag, Junie 4th, 2018

Wil jy graag betrokke raak by sosiale impak geleenthede by Universiteit Stellenbosch of dalk net sien watter inisiatiewe bestaan? 

Die Sosiale Impak-platform vertoon bestaande inisiatiewe en help om nuwe geleenthede vir samewerking te identifiseer vir diegene wat betrokke wil raak. 

Dit bied ‘n  hulpmiddel om personeel se werk te ondersteun en versterk en ook op betekenisvolle manier te dien as sosiale leerspasie en model vir goeie praktyk met betrekking tot sosiale impak by die US.

Die platform beskik oor ’n aantal soekfilters, ’n deursoekbare nuusargief, asook ’n aantal visuele elemente wat aandui hoeveel verskillende inisiatiewe (vir sosiale impak) daar in die onderskeie fakulteite plaasvind. 

Personeel kan aandui hoe hulle werk bydra tot die universiteit se sewe ontwikkelingstemas, naamlik opvoeding vir almal; werkverskaffing en inklusiewe ekonomiese ontwikkeling; omgewing en volhoubaarheid; voedselsekuriteit en gesondheid; hulpbronne en infrastruktuur; veiligheid; sekuriteit en goeie bestuur; en sosiale- en geslagsgelykheid. Hierdie ontwikkelingstemas sluit direk aan by die Verenigde Nasies se Volhoubare Ontwikkelingsdoelstellings. 

Personeel word genooi om hul inisiatiewe vir sosiale impak hier te registreer. Besoek www.sun.ac.za/si vir meer inligting.

 

IT-personeel skud hulle sakke vir VWS

Donderdag, Maart 12th, 2015

vwsDie afgelope week woed `n verwoestende veldbrand in die Jonkershoekvallei in Stellenbosch. Bykans 3000 hektaar veld reeds gebrand en 450 brandbestryders het hulle hande vol gehad om die brand onder beheer te hou. 

Met die onlangse verwoestende brand in die Kaappunt-omgewing het ons gesien hoe hard brandbestryders onder moeilike omstandighede werk en `n groot deel hiervan is VWS (Volunteer Wildfire Services) vrywilligers. Hulle is dus afhanklik van bydraes om hulle werk te kan doen en het fondse nodig om brandbestryding met helikopters te doen, vir toerusting en ook basiese items soos mediese voorraad, oogdruppels, kos en water.

Informasietegnologie-personeel wou graag help en het Woensdag hulle sakke geskud en teen die einde van die dag reeds R4450-00 ingesamel, sowel as kosvoorraad. Hierdie geld word via Givengain se geregistreerde VWS-projek direk in hulle rekening betaal sodat hulle dit kan gebruik vir noodsaaklikhede.  

Ons daag ander US-departemente en -afdelings uit om dieselfde te doen.  Gaan kyk gerus op Volunteer Wildfire Services se webwerf vir meer inligting oor hoe om te help en hul Facebook-blad vir die nuutste nuus oor die brand.

 

volunteer-wildlife-services

Skakel in by Bits & Bytes

Vrydag, November 7th, 2014

radio2

Die afgelope September het ons een jaar op die lug gevier. Bits & Bytes het aanvanklik begin as `n nuusbrief vir personeel,  maar daar was net te veel interessante dinge om te deel – ons kon dit nie net vir onsself hou nie. Maar wat meer kon ons doen?

Die antwoord was maklik. Met `n gehoor van 30 000 luisteraars tussen die ouderdom van 14 en 28, het ons geweet MFM is die perfekte pasmaat. En so is Bits & Bytes, die radio-weergawe gebore. Vir die afgelope jaar het ons `n weeklikse insetsel gedurende die AM-PM-show om 11:45 Dinsdagoggende gehad met Tian Petersen as aanvanklike stem vir IT, maar mettertyd het Marc-Allen Johnson by die span aangesluit.

Bits & Bytes is nie nie bloot nog `n institusionele mondstuk wees nie, maar het mettertyd `n platform geword waar interessante tegnologiese verwikkelinge en speelgoed, bespreek kan word. Met elke insetsel probeer ons om `n kombinasie van relevante nuus vir studente en personeel, sowel as interessante verwikkelinge op die tegnologiese front op `n informele trant aan luisteraars oor te dra.

Ons besef egter dat almal nie toegang het om daarna te luister nie en het dus die fasiliteit geskep waar jy, nadat dit uitgesaai is, steeds aanlyn na die uitsendings kan luister. Al wat jy hoef te doen is om na WWW.SUN.AC.ZA/BB te gaan waar daar `n lys van alle vorige nuusbriewe is, maar ook al 34 vorige radio-uitsendings. Kliek bloot op die mp3-skakel.

Die insetsels word binne die US-netwerk gehuisves, dus gaan dit nie jou internetkoste opvreet nie – jy kan met `n geruste hart luister. As jy wel die regstreekse uitsending wil hoor, skakel gerus elke tweede Dinsdag om 11:45 op die AM to PM Show op MFM saam met Eduard en ons eie Tian en Marc-Allen in. Kliek HIER om aanlyn na MFM te luister.

Jy is ook welkom om kommentaar en vrae in daardie tydsgleuf via Twitter aan ons te stuur en indien daar geleentheid is, sal Tian dit op die lug beantwoord. Tweet ons by @ITStellenUni!

IT vat die koek by Welwees Sportdag

Vrydag, November 7th, 2014

Op 24 Oktober het `n sterk stuks van 43 IT-personeel die 31 grade hitte vir die US Welweesdag breëbors en grootbek aangedurf. Ook maar goed die uitslae was goed anders sou daar `n paar hangende sku koppe gewees het aan die einde van die dag.

Aan spangees en entoesiasme was daar geen tekort aan nie. Dit was duidelik aan die volume waarteen daar geskree – IT was sonder twyfel die grootste rasers. Die feit dat almal heldergroen t-hemde met die filosofiese woorde “Keep calm and call IT” aangehad het, het hulle natuurlik nie enigsins minder opsigtelik gemaak nie.

IT-spanne het mekaar se sportaktiwiteite bygewoon en  mekaar welluidend die veld ondersteun en motiveer. Die effek hiervan was duidelik te sien tydens die toutrekkompetisie. Daar is min dinge wat `n man so hard laat trek soos iemand wat langs hom staan en skree nie.

Tussendeur is worsrolletjies gebraai, koeldrank gedrink en `n goeie skoot suiker vir energie met sjokoladekoek.

Vir die tweede jaar het IT dit reggekry om vir elke Sportdagaktiwiteit `n span in te skryf (sien name van alle deelnemers heel onder) en het met die louere weggestap met die vlugbal, hokkie en toutrek. IT het ook met die algehele prys weggestap.

“Ek is trots op al die deelnemers, en baie dankbaar teenoor die organiseerders binne IT en die US se Welwees afdeling onder leiding van Maureen Kennedy.” – Petro Uys

Mini sokkerspan: Lynton Speelman, Gerrie Jacobs, Philip Greeff, Arrie Martin, Jerome Swart, Lucio Southon, Randall Christians, Andre Adams

Stap: Ciska Marais, Lee-Anne Pharoa, Marita de Koker, Shaamela Martheze

Vlugbal: Marius Bruwer, Mariana Fourie, Elmar Matthee, Camen Petersen, Donelda Petersen, Charnelle Davidse

“Pool noodle” Hokkie: Joe Smit, Cheslon Faroa, Quinton Luiters, Pablo Korkie, Albert Meyer, Mandy Wanza 

Raakrugby: Millicent Pieters, Hendrik Adams, Zanfrick Witbooi, Quintus Roos, Johan Loubser, Nico Goosen, Jodi Layman

Netbal (shoot outs): Marie Daniels, Marlé Botha, Petro Uys, Jemaine Wales, Tondani Mooketsi, Anthea Davids

Toutrek: Francois de Koker, Warren Koopman, Johan Brand, Mario Randelhoff, Tommy Abrahams, Kagiso Shakoane

Studente wen by tegnologiefees

Donderdag, Oktober 24th, 2013

ʼn Tegnologiefees met verskeie pryse, groot afslag en die geleentheid om die nuutste tegnologie uit te toets en daarmee te speel, is Dinsdag 22 Oktober in die Neelsie gehou.

Die Tegnologiefees was ʼn inisiatief van die Studente Tegnologieprogram (STP) wie se doel dit is om bekostigbare tablette en skootrekenaars te verskaf aan alle studente verbonde aan openbare universiteite in Suid-Afrika.

Personeel en studente kon nie net waardevolle inligting oor die tegnologie wat die program bied kry nie, maar kon dit ook uittoets en daarmee speel. Daar was verskeie pryse op die spel en afslag is aangebied op heelwat van die produkte wat uitgestal is.

Die Maties-dansvereniging het vir die vermaak gesorg oor middagete en die name van die wenners van die October Tech Fest-kompetisie is getrek. Kyk video hier.​

 

© 2013-2020 Disclaimer: The views and opinions expressed in this page are strictly those of the page author(s) and content contributor(s). The contents of this page have not been reviewed or approved by Stellenbosch University.