Ek is nie `n oggendmens nie. Brein- en spierfunksie skop eers nege-uur in. Met die hulp van sterk koffie natuurlik. Maar daar is `n toepassing om te help.

Jy kan jou in dink hoe groot my liefde vir wekkers is. Dit maak nie saak watter toon, liedjie of byklank uit die natuur, of dit nou krysende meeue, watervalle, branders of wind chimes is, niks kan my pynloos die nuwe dag inlei nie.

Turbo Alarm, blykbaar ʼn populêre en effektiewe toepassing, beloof om die jou standaard selfoon alarm se vermoëns te oortref. 

Eerstens is dit gratis en bevat dit geen advertensies wat op jou reeds teer nerwe te werk nie. Dit beloof ook om super aanpasbaar met opsies en konfigurasies te wees. 

Ja, dit het al die standaard opsies: volume wat aanpas hoe langer jy neem om te reageer, verskillende alarm tone, ens. Maar dit kan jou ook elke oggend wakker maak met ʼn nuwe liedjie. Dink net, jy hoef nie meer vir 200+ oggende van die jaar wakker te skrik met Bohemian Rhapsody nie, maar jy kan elke oggend met `n ander Queen-treffer wakkerword.

Vir my is die bepalende faktor egter die snooze, mute en disable funksies. En dis hier waar Turbo Alarm aanloklik begin lyk. Die toepassing gee vir jou meer opsies as die meeste ander wekker-toepassins. Jy kan byvoorbeeld jou alarm stel sodat dit net reageer as jy die lig aanskakel – ʼn besondere handige opsie in ons Wes-Kaap wintermaande. Makliker maniere om jou rus en vrede te verleng, is deur die foon te skud, verskeie patrone daarop te teken of ʼn kombinasie van nommers of kolle te druk op jou foonskerm.

Addisionele funksies sluit in:

★ Kies ʼn lêer met liedjies of jou speellys as jou alarmtoon en jy sal elke oggend met ʼn ander liedjie wakkergemaak word. 
★ Wanneer jy jou alarm instel, sal dit ook die weervoorspelling wys vir die tyd wanneer die alarm sal afgaan. 
★ Mini-speletjie om die alarm tydelik te stop.  
★ Sekuriteitsalarm wat lui as jy nogsteeds by die huis is.
★ Wil jy eerder geleidelik wakkerword? Kies dan die geleidelike volume en die tydperk wanneer dit op sy maksimum moet wees.  
★ Kies die manier waarop die toestel vibreer: rustig, normaal, vinnig of geen. 
★ Jy kan kies op watter wyse jy die alarm wil stilmaak: deur die kamerlig aan te skakel, die toestel te skud, ʼn vierkant of driehoek op die skerm te tik, ʼn dwarsbalk te sleep, lank of kort te druk of ʼn klein of groot knoppie te druk.
★ Simuleer die sonskyn in jou kamer met jou gunsteling kleur. 
★ Verminderende sluimer-intervalle. 
★ Widget met ʼn lys van aktiewe alarms.
★ Beperk die kere wat jy mag sluimer. 
★ Anti-sleepyhead modus om seker te maak jy word wakker op daai dae wanneer jy ekstra moeg is.
★ Aanpasbare agtergrond

DIE UITSLAG

Indien aanpasbaarheid vir jou belangrik is, sal Turbo Alarm jou oggendroetine ietwat meer prettig maak. Dit voel egter of die verskeidenheid funksionaliteit ook tot die toepassing se nadeel kan strek. Is dit alles werklik nodig is om die eenvoudige taak, om jou uit die bed uit te kry in die oggend, te verrig?

Turbo Alarm is gratis beskikbaar op Android. 

Dis 6:08 in die oggend. Sekondes gelede het jy heerlik geslaap; onbewus van die res van die wêreld se bedrywighede. Jou selfoon het ander planne. `n Boodskap. 

Iemand het vir jou een ster gegee op `n aanlyn-toepassing. Jou persoonlike en romantiese vermoëns is beoordeel en dit lyk nie goed nie.

`n Toneel uit `n wetenskapfiksie fliek? Nee. Teen die einde van volgende week sal dié scenario `n realiteit wees wanneer Nicole McCullough en Julia Cordray hulle kontroversiële toepassing, Peeple, op die wêreld loslaat.

`n Wolk van ongunstigheid hang bo Peeple sedert die bekendstelling vroeg in Oktober. 

Aanvanklik sou negatiewe kommentaar verskyn, waarna jy, as beoordeelde,  in kennis gestel word. Jy kry 48 uur om jou beoordeler te oortuig dat hy/sy verkeerd is of jouself te verdedig op Peeple. Negatiewe kommentaar word nie verwyder nie en in kort: jy het nie veel sê nie. 

Na oorweldigende kritiek in die media  – spesifiek oor die gunstige platform wat Peeple skep vir teistering en afknouery – het die toepassing se benadering vinnig verander. ‘n Prominente artikel in die Washington Post het gelei daartoe dat Peeple se webwerf, Facebook-bladsy en Twitterrekening spoedig verwyder is.

Dit word nou eerder bemark as `n toepassing wat gemik is op positiewe terugvoer – `n “positive revolution”, soos die webwerf tans aandui. 

Cordray skryf op LinkedIn dat geen persoon gelys sal word sonder hul toestemming nie. Die 48-uur wagperiode om negatiewe kommentaar te verwyder is nie meer van toepassing nie. Indien jy nie `n kommentaar goedkeur nie, sal dit nie geplaas word nie.   

Of Peeple sy prosedures en aanslag verander of nie, die werklike effek van `n toepassing wat soveel inbreuk maak op menseregte, sal eers gevoel word as dit in werking is.

Dat daar geweldig baie opposisie teen Peeple is, is duidelik. `n Petisie om die toepassing te verban het vroeër die week meer as 7000 handtekeninge versamel. Twee parodieë is reeds geskep: “Sheeple,” en “Meet Peeple”. Selfs die uitgesproke satirikus John Oliver  het, op sy eiesoortige manier, kommentaar gelewer.

Peeple in die media: http://www.theguardian.com | http://www.latimes.com | http://www.forbes.com | http://arstechnica.com | http://www.mybroadband.co.za

Of jy dié wintervakansie die koue ontduik en erens warmer gaan skuil en of jy moet uithou tot Desember, om `n vakansie te beplan is nie vir sissies nie.

Met `n toepassing en webwerf vir alles onder die son, is dit nie verbasend dat daar ook verskeie is om jou trippie Addo toe sonder enige insidente te laat verloop nie.

 1. Tourism Radio’s City Guides 

Hierdie toepassing is beskikbaar internasionaal en plaaslik en kan dus gebruik word as jy oorsee ook reis. Die gidse sluit inligting in vir meer as 1500 besienswaardighede, onder andere oor geskiedenis, kultuur, geografie, aktiwiteite en dek 24 internasionale stede.

Sodra jy naby een van hierdie besienswaardighede kom, sal oudio outomaties begin speel en teks sal gewys word. Dit maak gebruik van GPS om hierdie inligting aan jou te bied, maar een van die grootste voordele daarvan is dat jy nie aanlyn hoef te wees en gevolglik data hoef te gebruik nie. Installeer die toepassing bloot en dateer dit op net voordat jy op reis gaan.

 Die Tourism Radio’s City Guides toepassing is gratis beskikbaar op Android en iOS.

 2. Africa: Live  

As jy hou van wilde diere afloer met jou verkyker, is die Africa: Live app die ideale belegging vir jou slimfoon.

 [BRONNE: www.travelground.com, www.htxt.co.za, www.news24.com, www.southafrica.net]