Kommunikasie « Informasietegnologie

Kommunikasie

Skakel in by Bits & Bytes

Vrydag, Augustus 21st, 2015

Komende September vier Bits & Bytes se radio-weergawe sy tweede verjaardag met meer as 55 uitsendings op ons kerfstok. Wat aanvanklik begin het as `n tweeweeklikse radio-insetsel om allerlei IT-nuus te deel, het intussen gegroei tot `n weeklikse instelling wat veel meer as net die doen en late van IT bespreek. Bits & Bytes is tans dié tech-show op MFM en hoe dan anders met twee aanbieders, Marc-Allen Johnson en Tian Petersen wat behoorlik moet bontstaan om by te hou by elke week se tegnologiese nuutjies.

MFM het `n gehoor van 30 000 luisteraars tussen die ouderdom van 14 en 28 en word nie net op kampus uitgesaai nie, maar dek die hele Stellenbosch. IT word dus gehoor dwarsoor Stellenbosch en enigiemand wat wil op hoogte bly van tegnologie sal nie spyt wees om 10 minute af te staan en in te skakel nie. Met elke insetsel probeer ons om `n kombinasie van relevante nuus vir studente en personeel, sowel as interessante verwikkelinge op die tegnologiese front op `n informele trant aan luisteraars oor te dra.

Ons besef egter dat almal nie toegang het om altyd regstreeks daarna te luister nie en het die fasiliteit geskep waar jy, nadat dit uitgesaai is, steeds aanlyn na die uitsendings kan luister. Al wat jy hoef te doen is om na WWW.SUN.AC.ZA/BB te gaan waar daar `n lys van alle vorige nuusbriewe is, maar ook al 56 vorige radio-uitsendings. Kliek bloot op die mp3-skakel en bly op hoogte van wat aan die gebeur is met tegnologie.

Die insetsels word binne die US-netwerk gehuisves, dus gaan dit nie jou internetkoste opvreet nie – jy kan met `n geruste hart luister. As jy wel die regstreekse uitsending wil hoor, skakel gerus elke Woensdag om 15:15 op die Lunch Show op MFM saam met Lesley en ons eie Tian en Marc-Allen in. Kliek HIER om aanlyn na MFM te luister.

Jy is ook welkom om kommentaar en vrae in daardie tydsgleuf via Twitter aan ons te stuur en indien daar geleentheid is, sal dit op die lug beantwoord word. Tweet ons by @ITStellenUni!

Posted in Kommunikasie, Algemeen | Comments Off on Skakel in by Bits & Bytes

Die toekoms van televisie

Vrydag, Augustus 21st, 2015

5 Januarie 1976 – Menige Suid-Afrikaner sit in afwagting voor nuut-aangekoopte televisiestelle vir die eerste televisie-uitsending. Intussen het heelwat water onder die brug geloop en ook subskripsie-dienste, soos DSTV, is deesdae algemeen.

Tussen 1976 en 1978 is geen advertensies tussen programme uitgesaai nie en advertensiebreuke was `n geleentheid om vinnig te gaan koffie maak. Vandag is ons terug by advertensielose televisie met PVR en die meer onlangse nuweling VOD.

Video per aanvraag (VOD) bevredig die groeiende behoefte vir onmiddellike vermaak en ononderbroke reekskykery, maar tot `n jaar gelede was die keuses maar skraps.

DSTV het eerste toegetree tot die geveg met Boxoffice online, `n fliek-verhuringsdiens vir DSTV-intekenare. Kort daarna het ander hul voorbeeld gevolg – Altech met Node, MTN met Frontrow en Times Media Groep met VIDI. Die laaste hupstoot na meer kompeterende dienste, was Amerikaanse reus Netflix, se aankondiging dat hulle beplan om teen einde 2016 in Suid-Afrika te wees.

En toe gooi Naspers finaal die jakkals in die hoenderhok Woensdag met Showmax, hulle VOD-diens.

SHOWMAX

Volgens bronne kan Showmax beskou word as nie nuwe M-Net vir die internet-eeu. Twee intekenopsies is beskikbaar – premium en gratis opsie. Premium diens sal jou R99-00 per maand kos met `n verskeidenheid gewilde reekse, sowel as nuwe en ouer flieks. Ou Suid-Afrikaanse reekse soos Egoli, Binnelanders en Agter elke man verskyn ook op hul spyskaart. Of dit `n poging is om `n spesifieke demografie te wen of bloot om geld te spaar, is `n ander vraag.

Vir Showmax het jy `n lyn met internetspoed van ten minste 1MB en `n webblaaier nodig. `n Onbeperkte internetrekening mag waarskynlik ook handig te pas kom.

As jy onseker is of jy dié roete wil volg, kan jy gerus wees – jy kan dit eers vir 7 dae toets voor jy besluit.

[BRONNE: www.mybroadband.co.za, www.iafrica.com]

VIDI

Times Media-Groep het VIDI in September 2014 bekendgestel en tot Woensdag was dit die grootste plaaslike kompetisie vir Netflix.

Die maandelikse fooi vir onbeperkte toegang tot reekse en flieks (klaarblyklik meer as `n 1000 uur s’n), is ietwat meer as Showmax teen R149-00 kos. Die voordeel is egter dat jy slegs flieks apart kan huur – R27-00 vir nuwe vrystellings en R15-00 vir ouer flieks. Kyk dit wanneer jy wil, maar sodra jy begin het, verval dit na 48 uur.

Soos met Showmax het jy ook `n lyn met internetspoed van ten minste 1MB en `n webblaaier nodig. As jy egter van jou sport en flieks in HD en op `n groot skerm hou, is 2 tot 4 MB `n noodsaaklikheid.

Een van die grootste voordele van VIDI, en die meeste ander VOD-dienste, is dat jy jou kykgenot kan skeduleer soos jy wil, met, met onderbrekings of nie. As `n fliek te lank raak, kan jy dit stop, by jou lysie voeg en volgende keer kyk jy verder.

Inhoud kan op verskeie platforms benut word, insluitende PC, MAC, skootrekenaars, Apple en Android tablette en slimfone. VIDI pas ook die kwaliteit van sy leêrs aan by die platform waarop jy kyk en jou bandwydte.

[BRONNE: www.htxt.co.za, www.bizcommunity.co.za, www.sabc.co.za, www.tvsa.co.za and www.mybroadband.co.za]

FRONTROW

MTN-initiatief, Frontrow, is bekendgestel in September 2014 – `n week na VIDI. Bemarking vir die diens was betreklik yl en die grootste kritiek op Frontrow is die beperkte keuse van materiaal en die ondersteunde platforms. Soos seker te verwagte kan wees van `n selfoonverskaffer, is die fokus op slimfone en tablette, nie op rekenaars of televisie nie.

MTN bied wel `n pakket wat mobiele data insluit. Maar moenie ons woord daarvoor vat nie, lees gerus mybroadband se resensie van Frontrow.

Tans kan VOD nie op dieselfde vlak kompeteer as tradisionele uitsaaikanale nie. DSTV het alleen oor die afgelope 5 jaar 5 miljoen intekenare gewerf. Sport bly sport die grootste trekpleister – iets waarvoor VOD-dienste nie voorsiening maak so ver nie.

Alles ten spyt sal televisie en ons bestaande kykgewoontes moet verander om by te hou by tegnologie.

As VOD vir jou klink na die ideale vermaakoplossing, lees wat die deskundiges sê het oor jou opsies, die moontlike koms van Netflix in 2016 en hoe hulle vergelyk:

ShowMax, Netflix and SA’s disrupted TV future

Netflix could be game-changer in SA
Netflix vs FrontRow vs Vidi vs Node in South Africa

Posted in Kommunikasie, Algemeen, Internet | 3 Comments »

Jy ly dalk aan FOMO

Donderdag, Augustus 6th, 2015

As jy nie kan ophou om na jou selfoon te loer vir e-posse en Twitter-kennisgewings of Facebook-opdaterings nie, ly jy waarskynlik aan FOMO.

In `n vorige artikel het ons genoem dat die woord hashtag verlede jaar bygevoeg is tot die Oxford Dictionary. FOMO is reeds gelys sedert 2013. Google definieer FOMO as volg:

FOMO ˈfəʊməʊ/ noun informal

1. anxiety that an exciting or interesting event may currently be happening elsewhere, often aroused by posts seen on a social media website.

“I realized I was a lifelong sufferer of FOMO”

Alhoewel FOMO nie noodwendig sy oorsprong in sosiale media gehad het nie, het die koms van sosiale netwerke mettertyd `n groot impak daarop begin maak. Fear of missing out (FOMO) is bloot die moderne terminologie vir “die gras is altyd groener aan die ander kant”. (Psychologies magazine, 18 Junie 2012)

Met soveel keuse en geleenthede tot ons beskikking deesdae, is dit geen wonder ons voel soms onvergenoegd oor ons lewens nie. Voor sosiale media was ons salig onbewus van ander se doen en late, maar Facebook, Twitter en LinkedIn herinner ons op `n daaglikse basis waarmee ons vriende, kenisse en kollegas besig is – in hul loopbane en op sosiale vlak.

Hierdie voortdurende sosiale bemarking is egter nie `n realistiese uitbeelding van iemand se lewe nie. Natuurlik sal niemand twiet oor hul siek kat, probleme met die loodgieter of die buurman se keffende hond nie. Ons wys eerder waar ons vakansie gaan hou het, watter wonderlike kos ons eet of die ekslusiewe wyn wat ons drink.

Volgens `n landwye opname deur `n farmaseutiese maatskappy, in Junie 2012, het 62% van die 3000 deelnemers tussen 15 en 50 jaar erken dat hulle in “aanhoudende vrees” leef dat hulle uitmis op iets meer opwindend as waarmee hulle besig is.

Maar hoe voorkom ons dat ons opgesweep word in die histerie van sosiale media en hierdie aanhoudende gevoel dat daar iets is wat ons mis? GQ en Nir and Far het `n paar voorstelle, maar op die ou end kom dit bloot daarop neer dat jy jou lewe moet leef en geniet soos JY wil en ophou probeer byhou met die res van die wêreld. So, hoekom nie eerder ly aan JOMO (Joy of missing out) nie?

NS. YOLO is `n akroniem vir “you only live once”. Soortgelyk aan carpe diem, gee dit te kenne dat `n mens die lewe moet geniet, selfs al is daar risikos verbonde. Lees meer op Wikipedia.

[BRONNE: www.forbes.com, www.wikipedia.org]

Tags: FOMO, twitter
Posted in Kommunikasie, Konnektiwiteit, Algemeen | Comments Off on Jy ly dalk aan FOMO

#Hutsteken

Vrydag, Julie 24th, 2015

Voor sosiale media was `n hutsteken of octothorp die simbool op `n telefoonknopppie wat jy nooit gebruik het nie. Daardie dae is lankal verby.

Hutstekens (hashtags) is vandag deel van ons woordeskat en is selfs in Junie 2014 opgeneem in die Oxford English Dictionary.

Die hutsteken is vir die eerste keer in Twitter bekend gestel deur Chris Messina.Voorheen is die hutsteken of pond-simbool op verskeie ander maniere op die web gebruik – byvoorbeeld om kanale op IRC (Internet Relay Chat) aan te dui. Sedertdien word dit veel wyer op sosiale netwerke gebruik.

hashtag

ˈhaʃtaɡ/

noun

1. a word or phrase preceded by a hash sign (#), used on social media sites such as Twitter to
identify messages on a specific topic.

Wikipedia definieer dit as `n tipe merker of metadata etiket wat gebruik word op sosiale netwerke of mikro-blogdienste om dit vir gebruikers te vergemaklik om boodskappe oor `n spesifieke onderwerp of met sekere inhoud op te spoor.

Die bemarkingsplatform Offerpop som die geskiedenis van dié simbool goed op in `n eenvoudige diagram.

Wanneer jy `n # voor woorde of frases sit, sal hierdie items outomaties gemerk word en soekbaar wees vir gebruikers van die sosiale netwerk – `n vinnige en maklike manier om verwante inligting oor `n onderwerp te versamel. Die # kan enige plek in die inskrywing geplaas word – as deel van `n sin, aan die begin of einde. Dié metode is veral handig by `n sosiale netwerk soos Instagram as jy soek na fotos van `n spesifieke geleentheid of reisfotos, byvoorbeeld #paris of #worldcup2014.

Die teken se hooffunksie moet egter wees om metadata, konteks of ekstra inligting vir `n twiet, foto of bloginskrywing te verskaf. Deur `n hutsteken by te voeg, maak jy seker dat jou inskrywing oor `n spesifieke onderwerp gesien word. Maar maak seker dit voeg waarde by.

Hutstekens kan maklik misbruik word. Gemorspos-verspreiders stuur twiets met populêre hutstekens bloot om blootstelling te kry – selfs al het dit niks met die boodskap te doen nie. Indien hutstekens misbruik word – byvoorbeeld bloot gebruik word om ondersteuners te kry of niks relevant bydra tot die gesprek nie, kan `n rekening gefilter en selfs opgeskort word.

Twee hutstekens per inskrywing of twiet is aanvaarbaar, terwyl drie die limiet is. Enigiets meer en jy gaan net op jou lesers se senuwees werk. In 2013 het Jimmy Fallon en Justin Timberlake `n skets gedoen oor die soms belaglike gebruik van hutstekens.

Sedert 2010 is hutstekens ook gebruik deur televisiekanale vir bemarking. `n Relevante hutsteken word voor, gedurende of na `n episode van `n reeks uitgesaai en verskyn aan die onderkant van die skerm. Dit word gereeld deur sosiale media deskundiges en groot maatskappye ingespan om ondersteuners te kry en handelsmerke te bemark.

Vir inligting oor hoe om hutstekens meer effektief te gebruik, lees gerus Rebecca Hiscott se artikel op Mashable.

Populêre webwerwe wat hutstekens ondersteun:

[BRONNE: www.wikipedia.org]

Tags: hutsteken, sosiale media, twitter
Posted in Kommunikasie, Algemeen | Comments Off on #Hutsteken

Ek het `n voëltjie hoor fluit

Vrydag, Julie 24th, 2015

Het jy al ooit gehoor van “Larry, the bird?”. Ja, dis reg, selfs die Twitter-voëltjie het `n naam.

Ons is waarskynlik bekend met die aanlyn sosiale netwerk Twitter, maar weet ons meer as dat dit bestaan uit 40-karakter “twiets”?

Twitter, of twttr soos dit aanvanklik bekendgestaan het, is in Maart 2006 geskep deur Jack Dorsey, Evan Williams, Biz Stone en Noah Glass gedurende `n voldag breinstormsessie. Dorsey het die keuse van die naam Twitter as volg beskryf:

“…we came across the word ‘twitter’, and it was just perfect. The definition was ‘a short burst of inconsequential information,’ and ‘chirps from birds’. And that’s exactly what the product was.”

twttr is aanvanklik gebruik aangesien die domein-naam twitter.com nie op daardie stadium beskikbaar was nie. Ses maande later, met Twitter se amptelike bekendstelling, is die naam verander na die een wat ons vandag gebruik.

Amper tien jaar later is Twitter Inc. steeds gebaseer in San Francisco, met meer as 25 kantore regoor die wêreld en 500 miljoen gebruikers.

Deur die jare het Twitter ontwikkel van `n sosiale hulpmiddel waarmee mense kommentaar lewer oor hul daaglikse doen en late en lug van opinies tot iets wat gebruik word vir bemarking, onderrig en nuus en veral handig is vir noodkommunikasie. Gedurende die San Francisco aardbewings en Boston-marathon bomaanvalle was Twitter die hoof-kommunikasiekanaal vir die vespreiding van inligting. In Suid-Afrika het Twitter sy nut bewys gedurende die brande in Kaapstad en daarna met die insameling van fondse.

In gevalle soos hierdie gebruik Twitter-gebruikers `n # om inligting oor `n spesifieke onderwerp te groepeer en soekbaar te maak, byvoorbeeld #capetownfires. Sodra `n spesifieke hutsteken se gebruik toeneem en dit `n tendens word, word dit `n trending topic en word dit vertoon op die sypaneel vir alle gebruikers. Hierdie onderwerpe wys die onderwerpe waaroor daar die meeste gepraat word, hetsy dit nuusgebeure is of persone se opinies oor aktuele gebeure. (Meer oor # hier)

Kolleges en universiteite maak deesdae ook gebruik van Twitter as `n kommunikasie- en leerhulpmiddel vir studente. Wanneer `n kursus bestaan uit `n groot groep studente, kan Twitter ingespan word om gesprekke tussen klaslede te fasiliteer.

HOE WERK DIT?

Twiets is by verstek sigbaar vir almal, maar versenders kan hul boodskappe beperk tot hul ondersteuners. Gebruikers kan twiet op die Twitter webwerf, deur middel van versoenbare eksterne toepassings (byvoorbeeld toepassings vir selfone) of selfs met SMSe in sommige lande. Hertwiet (retweeting) is wanneer `n twiet populêr is en ander gebruikers dit verder versprei. Beide twiets en hertwiets kan nagespeur word om te sien hoe dikwels dit gelees word.

Gebruikers kan inskryf vir ander gebruikers se twiets – dit staan bekend as following en intekenaars staan bekend as followers of tweeps. Gebruikers kan ook ander gebruikers blokkeer as hulle dit so verkies.

As `n gebruiker iemand wil antwoord of noem, word `n @-teken voor die persoon se gebruikersnaam gevoeg. Om `n twiet van `n ander Twitter-gebruik te deel met jou eie lesers, kan jy die retweet knoppie in die twiet self gebruik.

Kyk gerus dié oulike, geanimeerde geskiedenis van Twitter op YouTube.

[SOURCE: www.wikpedia.org]

Tags: hutsteken, twitter
Posted in Kommunikasie, Algemeen | Comments Off on Ek het `n voëltjie hoor fluit

IT skakels

US skakels

Onlangse bydraes

Kategorieë

Argiewe

Kommunikasie

Skakel in by Bits & Bytes

Die toekoms van televisie

Jy ly dalk aan FOMO

Ek het `n voëltjie hoor fluit