Konnektiwiteit « Informasietegnologie

Konnektiwiteit

Reis sonder onnodige koste

Vrydag, November 15th, 2013

Indien jy gereeld oorsee reis, het jy waarskynlik al op die harde manier geleer dat selfoonkostes buitensporig duur raak wanneer jy Suid-Afrika se grense verlaat.

Tog is daar maniere om te bespaar wanneer dit steeds noodsaaklik is om per telefoon beskikbaar te wees.

Koop `n plaaslike SIM-kaart

Meeste reisigers weet nie dat hul foon se SIM-kaart met `n plaaslike SIM-kaart vervang kan word nie.

Voorafbetaalde simkaarte is goedkoop en maklik om data op te laai. Inkomende oproepe is normaalweg gratis en uitgaande oproepe (plaaslik en internasionaal) is ook aansienlik goedkoper.

Hou in gedagte dat, wanneer jy `n ander SIM-kaart in jou foon sit, jy ook `n nuwe selfoonnommer gaan kry. Stuur die nuwe nommer aan jou kontakte as jy bereikbaar wil wees gedurende jou oorsese besoek.

Soos in Suid-Afrika, moet jy ook oorsee deur die RICA-proses gaan. Sorg dat jou dokumentasie in plek is om tyd en moeite te spaar.

Koop ‘n SIM-kaart voordat jy vertrek

Execmobile of Flyconnected gee aan jou die geleentheid om `n SIM-kaart te bekom selfs voordat jy op die vliegtuig klim – minder moeite as jy in die vreemde sit.

Maxroam verskaf ook `n voorafbetaalde SIM-kaart wat in meer as 200 lande gebruik kan word.

Skype of TruPhone

Registreer as Skype-gebruiker voor jy vertrek en koop krediete om oproepe te maak.

Oproepe kan so min as 2 sent per minute kos, omdat dit data is en nie `n tradisionele oproep nie.

Skype se enigste nadeel is die betroubaarheid en kwaliteit van oproepe wat onderhewig is aan jou internetverbinding.

Internasionale belkaarte

Belkaarte laat jou toe om gewone landlyn-fone, telefoonhokkies en in sommige gevalle, selfs selfone te gebruik.

Lughawens en gerieflikheidswinkels verkoop dié kaarte, wat relatiewe goedkoop internasionale tariewe bied. Jy kan ook ‘n internasional belkaart in Suid-Afrika koop.

Sit af jou datadienste!

Die eenvoudigste, veiligste en goedkoopste opsie is om alle datadienste af te skakel voor jy oorsee gaan.

Selfs al gebruik jy nie bewustelik data nie, kan toepassings op die agtergrond data gebruik om opdaterings te doen, of `n verbinding te probeer bewerkstellig.

Meer inligting oor diensverskaffers se “roaming” dienste:

Cell C
Vodacom
MTN

[BRON: www.about.com en www.moneyweb.co.za]

Posted in Kommunikasie, Konnektiwiteit | Comments Off on Reis sonder onnodige koste

Wil jy klasloop by Google?

Vrydag, November 15th, 2013

In lyn met die vinnige groei van MOOCs (lees ons artikel oor MOOCS), het Google ook die week `n aanlyn “video-universiteit” op die been gebring.

Google Helpouts is `n aanlyndiens wat gebruikers die geleentheid bied om te kollaboreer, kundigheid te deel en te help met behulp van lewendige, intydse videostrome.

Om die diens te gebruik, gebruik moet jy `n Google+ lid wees, waarmee jy toegang tot Helpouts kry met jou rekenaar of tablet, of deur die Android-toepassing op jou selfoon te laai.

Binne sekondes kan jy ‘n persoonlike instrukteur tot jou beskikking hê of wanneer dit jou pas. Jy kan enige tyd van die dag of nag toegang kry tot `n deskundige se kennis – geen beperking op tyd of geografiese grense nie.

Helpout skeduleer jou sessie wanneer dit jou pas en plaas dit outomaties op jou Google kalender. Jy kan ook kies om deur middel van sms of e-pos herinner te word.

Helpouts het reeds meer as 1000 verskaffers wat enige beroep insluit en lesse gee in `n verskeidenheid spesialisareas. Kundiges of “verskaffers”, soos Google hulle noem, kan klein, medium of groot maatskappye wees, maar ook individue.

Selfs jy kan jou origami-klas op Helpouts aanbied. Onthou net dat kundiges deur Google goedgekeur moet word en `n volledige beskrywing van hul dienste, pryse en skedules verskaf moet word.

Ongelukkig, anders as MOOCs, is daar `n koste verbonde aan Google se nuwe diens.

Kliënte betaal per minuut of sessie vir lewendige, intydse videogesprekke met die deskundige, wat op sy beurt aan Google 20% van sy fooi betaal. Sommige maatskappye sal wel gratis sessies aanbied om bemarking `n hupstoot te gee.

Betaling geskied deur middel van Google Wallet, wat jou kredietkaartdetails bevat, en jy betaal per sessie of per minuut. As jy ontevrede is met die diens, waarborg Helpout `n volledige terugbetaling – mits jy dit binne 72 uur versoek.

Skielik lus om te leer kitaar speel? Matt Gibson wag vir jou by Google Helpouts …

[BRON: www.iol.co.za en www.wikpedia.org]

Posted in Konnektiwiteit, Internet, Opleiding | Comments Off on Wil jy klasloop by Google?

Mobiele tegnologie opname wys nuwe gebruikspatrone uit

Vrydag, November 1st, 2013

Diit blyk dat Android- en Apple-selfone waarskynlik binne die volgende jaar om studente se guns gaan kompeteer, terwyl Blackberry se populariteit vinnig wegkwyn. Die prentjie het beduidend verander sedert 2012:

Hierdie is slegs een voorbeeld van die resultate van ‘n onlangse mobiele tegnologie opname, geneem deur Informasietegnologie, om patrone in mobiele toestelle onder studente te bepaal.

Die doel van die opnames, waarvan die eerste in September 2012 uitgevoer is, is om gedragspatrone te identifiseer sodat toepaslike universiteitsdienste en -strategieë in die toekoms implementeer kan word. Die kombinasie van toestelle waaroor studente beskik en hoe vinnig omstandighede verander, is kritiek vir ingeligte beplanning en besluitneming.

‘n Ander onverwagse neiging is die stadige toename van tablette op kampus. Aangesien die meerderheid studente daagliks toegang tot ‘n skootrekenaar, ultrabook of notebook het, word die tablet gesien as ‘n “derde” toestel wat 47% van studente nie kan bekostig nie en 25% verkies om nie te gebruik nie.

Slegs 28% van deelnemers besit ‘n tablet, waarvan bykans die helfte Apple iPads is, met Android tablette kort op sy hakke. Studente dui aan dat `n styging mettertyd sal plaasvind, maar wel geleidelik.

Ongelukkig is bewustheid rondom die Studente Tegnologie Program, wat aan studente die geleentheid bied om skootrekenaars, tablette en notebooks teen afslagpryse te koop, steeds gebrekkig.

Aan die positiewe kant sien studente deurlopend dienste en inhoud wat verband hou met leer, akademiese geleenthede en skedules, byvoorbeeld eksamenresultate, klas- en eksamenroosters en taakinformasie, as die noodsaaklikste funksie wat mobiele toestelle moet vervul.

Dis moontlik dat, wanneer meer leerinhoud, insluitende e-handboeke, meer beskikbaar raak via mobiele toestelle, ook vir aflyn gebruik, die toename van tablette ook mag versnel.

Verdere opnames sal in die toekoms uitgevoer word om gebruikspatrone en addisionele veranderinge oor tyd te bestudeer.

Een gelukkige wenner, BComm-student Pierre-Etienne, was die gelukkige wenner van ‘n Incredible Connection geskenkbewys ter waarde van R1500.

2832 studente uit 32266 uitgenooides is, het die opname voltooi.

[FOTO: Ralph Pina (direkteur: ontwikkeling) met wenner Pierre-Etienne Rossouw]

Tags: Android, Apple, Blackberry, selfoon, mobile survey
Posted in Konnektiwiteit, Navorsing | Comments Off on Mobiele tegnologie opname wys nuwe gebruikspatrone uit

YouTube skielik gratis?

Vrydag, November 1st, 2013

Indien jy die afgelope week YouTube besoek het – of dit nou om akademiese redes was of vir jou weeklikse video-fix, sou jy opgemerk het Inetkey nie noodwendig nodig was nie. En jou observasie sou heeltemal reg wees.

Goeie nuus, maar daar is ‘n stertjie aan die storie. Kom ons verduidelik eers hoekom dit skielik so is.

Universiteit Stellenbosch se internet word herlei deur Tenet (The Tertiary Education and Research network), ‘n netwerk met die doel om die beste moontlike infrastruktuur aan akademiese instansies te verskaf. Derhalwe is Tenet se bediener oop vir US-personeel en kan toegang gratis, sonder Inetkey, verkry word.

Maar wat het YouTube hiermee te doen? Tenet huisves ook die afgelope tyd ‘n weergawe van YouTube in sy kasgeheue, sodat gebruikers makliker en vinniger toegang kan kry.

Om te bepaal watter netwerk gebruik moet word vir ‘n versoek en die kortste pad waarheen verkeer herlei moet word, te bepaal, gebruik Google algoritmes, of te wel geo-tagging. In ons geval besluit Google om jou YouTube-versoek eerder na Tenet te wys in plaas van na hulle oorsese bedieners.

`n Risiko bestaan wel dat, indien Google besluit om ‘n ander cache te gebruik vir beter netwerkkapasiteit, die gratis inhoud kan terugverander na betaal-inhoud.

Let wel, ALLE YouTube videos is nie outomaties deel van die kasgeheue nie – Tenet bêre die data volgens aanvraag. Om te verseker jy betaal nie, hou jou Inetkey gesluit wanneer jy YouTube besoek.

Tot tyd en wyl Google sy roete verander kan jy gratis op YouTube rondspeel. Onthou net om jou Inetkey toe te maak, anders kan jy ‘n lelike verrassing aan die einde van die maand kry.

Tags: tenet, YouTube
Posted in Toepassings, Kommunikasie, Konnektiwiteit, Algemeen | Comments Off on YouTube skielik gratis?

Mediaverwydering: die regte manier

Vrydag, Oktober 18th, 2013

Dis 4:32 op `n Vrydagmiddag. Jy is gedaan na `n week vol dramas en krisisse en wil net jou rekenaar afsit en gaan naweek hou. Jou selfoon beep vir die soveelste keer met `n boodskap van die ryklub wat angstig sit en wag.

Twee minute gelede het jy onthou van `n dokument wat jy die naweek wil lees en dit kopieer op die oomblik teen die spoed van `n slak deur dryfsand.

Die dilemma is – gaan jy dit uittrek en hardloop voordat jy huistoe moet ryloop? Gaan jy geduldig wag tot dit klaar gekopieer is? Of gaan jy dit onderbreek en die regte, voorgeskrewe stappe neem om dit te ontkoppel? Hoe gevaarlik kan dit wees vir jou rekenaar en data as jy net vinnig jou geheuestokkie of eksterne hardeskyf uittrek?

Wanneer jy enigiets met `n USB-konneksie aan jou rekenaar koppel, kry dit die geleentheid om data te lees en skryf na die toestel – data wat soms ook elders geberg word. Met datastoring word die inligting nie onmiddellik na jou toestel geskryf nie, maar eers in jou rekenaar se geheue gebêre.

Indien jy die USB-toestel net uitpluk voordat hierdie inligting volledig klaar geskryf is, of steeds besig is om te kopieer, kan jou data korrup word.

Die goeie nuus is dat Windows outomaties hierdie stoorfunksie vir USB-toestelle deaktiveer, tensy jy spesifiek aandui dat jy dit wil gebruik. As data nie geskryf of gelees word op daardie oomblik nie, kan jy normaalweg met `n geruste hart die “Safely Remove Hardware”-opsie ignoreer. Maar, as die geheuestokkie se liggie flikker en data gelees of gekopieer word, vat jy die kans dat jy met verlore en korrupte data gaan opeindig.

“Safely Remove Hardware” is jou veiligheidsnet om te keer dat jy nie jou eie leêrs vernietig nie. As jy dit wel gebruik, verseker jy dat jou data mooi netjies verpak is en met die nodige metadata aangeheg.

Vir meer inligting oor veilige media verwydering, lees gerus hierdie deeglike uiteensetting op How to geek se webwerf.

[BRON: www.howtogeek.com]

Tags: databestuur
Posted in Konnektiwiteit, Algemeen | Comments Off on Mediaverwydering: die regte manier

IT skakels

US skakels

Onlangse bydraes

Kategorieë

Argiewe