Language:
SEARCH
  • Onlangse bydraes

  • Kategorieë

  • Argiewe

Kennisgewings

Onderhoudnaweek: 17 tot 20 September

Dinsdag, Augustus 31st, 2021

Informasietegnologie sal gedurende die naweek van 17 September onderhoud uitvoer op verskillende komponente van die IT infrastruktuur. Gevolglik sal daar tye wees wanneer stelsels nie beskikbaar is nie.

Kwartaallikse, geskeduleerde onderhoud vind plaas vanaf 21:30 Vrydag, 17 September tot 07:00 Maandag, 20 September. Verskeie IT dienste en stelsels word hierdeur geraak en kan gedeeltelik of in geheel nie beskikbaar wees nie.

Weens die omvangryke onderhoud en die noodsaaklikheid vir deeglike toetsing van stelsels en dienste kan onderbrekings Maandag ook voortduur.

Wees verseker dat ons alles binne ons vermoë sal doen om onderbrekings tot die minimum te beperk. Vir navrae meld ʼn versoek aan op die ICT Partner Portal.

Onthou om in jou Junk Email vouer te kyk

Maandag, Augustus 30th, 2021

Om te verseker dat personeel en studente nie blootgestel word aan gevaarlike strikroof of gemorspos nie het ons stelseladministrateurs en sekuriteitspan vroeër die jaar `n addisionele vlak van sekuriteit implementeer deur die gemorsposfilter strenger te maak. 

Maar hoe werk `n gemorsposfilter? Aan elke boodskap wat ontvang of gestuur word, word`n sekerheidsvlak toegeken op grond van die waarskynlikheid dat dit gemorspos is. Afhangende van dié vlak sal die inkomende boodskap direk na die gebruiker se Junk Email vouer gestuur word, of nie. Die filter kyk na sekere kriteria in die e-pos, soos byvoorbeeld meer as `n sekere hoeveelheid skakels of potensieël gevaarlike aanhangsels. Om die perfekte balans te tref is moeilik – ons wil nie hê jy moet belangrike e-posse mis nie, maar terselfdertyd is dit ons verantwoordelikheid om jou en al ons gebruikers te beskerm van kwaadwillige aanvalle.

Om hierdie rede is dit belangrik dat jy gereeld in jou Junk E-mail vouer kyk om seker te maak dat daar nie belangrike e-posse lê en wag nie. 

Die hoofdoel van Microsoft Outlook se gemorsposfilter is om onwelkome e-posboodskappe weg te hou uit jou Inbox deur dit in die Junk Email vouer te plaas. Hierdie proses word op `n institusionele vlak deur Microsoft toegepas (soos hierbo genoem word), maar jy kan self ook boodskappe van `n persoon of maatskappy merk as gemorspos of nie.

Hoe om jou gemorsposfilter aan te pas.
Hoe om `n e-pos as gemorspos te merk.
Hoe om gemorspos en strikroof by Microsoft aan te meld. (aflaaibare PDF-dokument) 

Vir verdere navrae teken asseblief `n versoek aan op die ICT Partner Portal.

 

 

Diensvlakke beinvloed deur COVID

Maandag, Augustus 23rd, 2021

Weens ‘n paar positiewe Covid gevalle onder ons IT ondersteuningspersoneel bestaan die moontlikheid dat ons ondersteunsdiensvlakke beïnvloed gaan word totdat personeel kan terugkeer en hul take kan hervat.

Slegs kritiese “op-perseel” ondersteuning vir personeel sal by die IKT hoofgebou per afspaak hanteer word. Versoeke kan egter steeds aangeteken word by ICT Partner Portal en daar sal so gou moontlik daaraan aandag gegee word.

Ons vra byvoorbaat om verskoning vir enige ongerief.

Ekstra vlak van sekuriteit vir rekenaars op kampus

Maandag, Augustus 2nd, 2021

Kubermisdaad is ʼn veld wat voortdurend ontwikkel. Alhoewel die groter meerderheid virusse aanvanklik as poetse geskep is, is dit deesdae noodsaaklik om op hoogte te bly met die verskeie risiko’s op die internet as jy veilig aanlyn wil wees. Hier is ʼn kort opsomming van die basiese gevare: 

Malware, of malicious software, is ʼn oorkoepelende term vir enige kwaadwillige rekenaarprogram. Malware is die mees algemene vorm van aanlyn-bedreiging. 

Ransomware is ʼn nuwe vorm van malware wat gebruikers se toegang tot dokumente of toestelle sluit en dan anoniem ʼn aanlynbetaling eis om toegang te herstel. 

Adware is ʼn vorm van malware wat versteek is op jou toestel en advertensies aan jou vertoon. Sommige adware monitor ook jou aanlyngedrag sodat dit pasgemaakte advertensies vir jou kan wys. 

Spyware is ʼn vorm van malware wat versteek is op jou toestel, jou aktiwiteite monitor en sensitiewe data soos bankinligting en wagwoorde steel. 

Die wêreld van kubermisdaad is soortgelyk aan die van tegnologie. Elke jaar is daar nuwe tendense, deurbrake en hulpmiddele. 

Jy het moontlik opgemerk dat daar onlangs ʼn Malwarebytes Threat Scan ikoon op jou skootrekenaar of tafelrekenaar se skerm verskyn het (Figuur 1). Moenie skrik nie, dis nie ʼn nuwe tipe malware nie! Universiteit Stellenbosch se IT-afdeling het ʼn ekstra vlak van sekuriteit op kampusrekenaars bygevoeg. 

Figuur 1

Malwarebytes Incident Response is vertroude standaard in outomatiese eindpunt remediasie. Ongelukkig, onder huidige omstandighede, beteken dit dat sommige malware kan terugkeer nadat dit verwyder is. Indien dit gebeur sal Malwarebytes jou aanpor om jou rekenaar af en aan te sit, soos aangedui in Figuur 2.

Figuur 2

Dit gebeur omdat die malware moet sinkroniseer met jou webblaaier se profiel. Dit sal weer terug sinkroniseer met jou toestel nadat dit verwyder is. Indien jy daagliks sulke versoeke van Malwarebytes kry om jou rekenaar af te sit, stel ons voor dat jy ʼn versoek aanteken op die ICT Partner Portal sodat ʼn tegnikus jou kan help. 

[ARTIKEL DEUR BRADLEY VAN DER VENTER]

Die Wet op Beskerming van Persoonlike Inligting (POPIA) is hier

Sondag, Julie 4th, 2021

Die Wet op Beskerming van Persoonlike Inligting (4 van 2013) (POPIA) het op 1 Julie 2021 ten volle in werking getree. `n Kort opsomming van die POPIA-wet is beskikbaar hier.

Ter ondersteuning van die Universiteit van Stellenbosch se voorbereiding om gereed te wees vir POPIA, het die Afdeling Inligtingsoorsigbestuur ʼn reeks gidse en gereedskap gepubliseer op www.sun.ac.za/privaatheid.  Dit sluit in die institusionele privaatheidsregulasies, ʼn aanlyn privaatheidsimpak assessering asook kanale om insidente en oortredings in die gebruik van persoonlike inligting aan te meld. 

Vir meer inligting volg asb. die skakel na www.sun.ac.za/privacy.  Sessies oor bewusmaking, gefasiliteerde impakstudies op privaatheid en interne advies- en konsultasiedienste is ook beskikbaar op versoek. Vir meer inligting, kontak privacy@sun.ac.za

Lees ook: POPIA: Hoe waardevol is jou inligting?

Everlytic, die digitale boodskap-platform, het ook `n verskeidenheid nuttige artikels op sy webwerf, sowel as `n handige POPIA Powerpoint-gids

 

© 2013-2021 Disclaimer: The views and opinions expressed in this page are strictly those of the page author(s) and content contributor(s). The contents of this page have not been reviewed or approved by Stellenbosch University.