Kommunikasie « Informasietegnologie

Kommunikasie

YouTube skielik gratis?

Vrydag, November 1st, 2013

Indien jy die afgelope week YouTube besoek het – of dit nou om akademiese redes was of vir jou weeklikse video-fix, sou jy opgemerk het Inetkey nie noodwendig nodig was nie. En jou observasie sou heeltemal reg wees.

Goeie nuus, maar daar is ‘n stertjie aan die storie. Kom ons verduidelik eers hoekom dit skielik so is.

Universiteit Stellenbosch se internet word herlei deur Tenet (The Tertiary Education and Research network), ‘n netwerk met die doel om die beste moontlike infrastruktuur aan akademiese instansies te verskaf. Derhalwe is Tenet se bediener oop vir US-personeel en kan toegang gratis, sonder Inetkey, verkry word.

Maar wat het YouTube hiermee te doen? Tenet huisves ook die afgelope tyd ‘n weergawe van YouTube in sy kasgeheue, sodat gebruikers makliker en vinniger toegang kan kry.

Om te bepaal watter netwerk gebruik moet word vir ‘n versoek en die kortste pad waarheen verkeer herlei moet word, te bepaal, gebruik Google algoritmes, of te wel geo-tagging. In ons geval besluit Google om jou YouTube-versoek eerder na Tenet te wys in plaas van na hulle oorsese bedieners.

`n Risiko bestaan wel dat, indien Google besluit om ‘n ander cache te gebruik vir beter netwerkkapasiteit, die gratis inhoud kan terugverander na betaal-inhoud.

Let wel, ALLE YouTube videos is nie outomaties deel van die kasgeheue nie – Tenet bêre die data volgens aanvraag. Om te verseker jy betaal nie, hou jou Inetkey gesluit wanneer jy YouTube besoek.

Tot tyd en wyl Google sy roete verander kan jy gratis op YouTube rondspeel. Onthou net om jou Inetkey toe te maak, anders kan jy ‘n lelike verrassing aan die einde van die maand kry.

Tags: tenet, YouTube
Posted in Toepassings, Kommunikasie, Konnektiwiteit, Algemeen | Comments Off on YouTube skielik gratis?

Is jy oorsee en het ons nodig?

Vrydag, Oktober 18th, 2013

`n Paar jaar gelede kon jy ons net bel of e-pos stuur, toe kon jy ons blog lees en tweets volg.

Nou kan jy selfs op ons nommer druk as jy oorsee is en sukkel met `n rekenaarverwante probleem.

Spaar jouself die buitensporige internasionale oproepkostes en kom kuier vir ons op Skype deur te soek na helpinfo@sun.ac.za of die gebruikersnaamitstellenuni.

Tags: kontak ons, Informasietegnologie, selfhelp, skype
Posted in Kommunikasie, Konnektiwiteit, E-pos, Algemeen | Comments Off on Is jy oorsee en het ons nodig?

Goeie nuus vir Telkom-kliënte

Vrydag, Oktober 4th, 2013

Telkom is bekend daarvoor dat hulle nie altyd die beste publisiteit kry nie – of dit nou gegrond is of nie. Ons almal ken die spottende verwysing na “Hellkom”. Maar die afgelope maand poog dié telekommunikasie-maatskappy om weer in ADSL-gebruikers se goeie boekies te kom.

Die eerste aanduiding hiervan is die aankondiging op 20 September dat die spoed van alle ADSL-pakkette, teen geen ekstra koste verhoog sal word. Vanaf November sal Telkom begin om die spoed van kliënte wat 1Mbps gebruik, op te gradeer na 2Mbps, die 2Mbps na 4Mbps en 4Mbps na 10Mbps. Voortaan sal die ‘Tot 4 096/10 240 kbps’ pakket verdeel word in twee kategorieë, ‘Tot 4 096 kbps’ en ‘Tot 10 240 kbps’.

Volgens Casper Kondo Chihaka, Telkom se Uitvoerende direkteur van groothandel, sal die opgradering aan kliënte die geleentheid bied om ‘n vinniger spoed te bereik, afhangende van die bestaande netwerktoestande.

Buiten hierdie ADSL-meevallertjie, het die maatskappy ook aangekondig dat Telkom internet-intekenare vir `n beperkte tydperk onbeperkte data sal ontvang vir sekere multimedia- en speletjiedienste. Die twee Telkomdienste wat ter sprake is, is Do Movies en Do Gaming. Wanneer Telkom internetgebruikers hierdie dienste gebruik, sal data nie van die maandelikse kwota data afgetrek word nie.

Die Do Movies promosie bied onbeperkte data vanaf 1 Oktober tot 31 Maart vir DStv Catch Up online, DStv BoxOffice online, Apple TV deur middel van iTunes en die Samsung Video Hub.

Die Do Gaming opsie bied onbeperkte data op speletjie-platforms en bedieners vanaf 4 Oktober vir 30 dae vandat die diens geaktiveer is. Die “gratis data” platforms sluit die PlayStation Network, Xbox Live, Battle.net, Steam, Origin en die Do Gaming bedieners in.

Alle data wat op hierdie platforms gebruik word, hetsy dit vir aanlyn speletjies, die aflaai van `n speletjie of programveranderings is, sal nie afgetrek word van kliënte se normale datagebruik nie. Indien jy na die 30 gratis dae wil aanhou om die Do Gaming diens te gebruik, kan jy dit aankoop teen R49 per maand.

[BRON: www.mybroadband.co.za]

Posted in Kommunikasie | Comments Off on Goeie nuus vir Telkom-kliënte

Bits & Bytes amptelik op die lug

Vrydag, September 20th, 2013

`n Maand gelede het ons julle met trots ingelig dat daar voortaan `n spesiale IT-segment elke tweede Dinsdag op MFM uitgesaai sal word. (Lees die berig hier.)

Die radio-weergawe van Bits & Bytes het die afgelope week sy tweede suksesvolle uitsending gehad en die terugvoer het ons verwagtinge oortref. Met elke insetsel probeer ons om `n kombinasie van relevante nuus vir studente en personeel, sowel as interessante verwikkelinge op die tegnologiese front op `n informele trant aan luisteraars oor te dra.

Dié week se onderwerpe het e-pos storms, `n nuwe “slim”-horlosie wat eendag selfone se rol mag oorneem, ons nuutste opname en nuus oor die splinternuwe IT-Studentesentrum wat in Januarie bekendgestel word, in.

Ons besef egter dat almal nie toegang het om daarna te luister nie en het dus die fasiliteit geskep waar jy, nadat dit uitgesaai is, steeds aanlyn na die uitsendings kan luister. Al wat jy hoef te doen is om na www.sun.ac.za/bb te gaan waar daar `n lys van alle vorige nuusbriewe is, maar ook alle vorige radio-uitsendings. Kliek bloot op die mp3-skakel.

Die insetsels word binne die us-netwerk gehuisves, dus gaan dit nie jou internetkoste opvreet nie – jy kan met `n geruste hart luister.

As jy wel die regstreekse uitsending wil hoor, skakel gerus elke tweede Dinsdag om 11:45 op die AM to PM Show op MFM saam met Ella, Eduard en ons eie Tian in.

Jy is ook welkom om kommentaar en vrae in daardie tydsgleuf via Twitter aan ons te stuur en indien daar geleentheid is, sal Tian dit op die lug beantwoord. Tweet ons by @ITStellenUni!

Tags: Bits & Bytes, mfm
Posted in Kommunikasie, Gemeenskapsinteraksie | Comments Off on Bits & Bytes amptelik op die lug

IT op die lug

Vrydag, Augustus 30th, 2013

Die dae wat die Informasietegnologie-afdeling die onbereikbare entiteit aan die ander kant van Banghoekweg is, is lank reeds verby. Sedert 2010 het ons `n aktiewe poging begin aanwend om kommunikasie en interaksie met die res van kampus en almal aan wie ons `n diens lewer, te verbeter.

Begin September skud ons die winter se stof van ons voete en betree `n nuwe era van kommunikasie. Voortaan sal IT jou nie net bereik met e-pos nie, maar ook oor MFM se radiogolwe.

Met `n gehoor van 30 000 luisteraars tussen die ouderdom van 14-28 ouderdomsgroep, is daar geen twyfel dat IT `n jonger mark, en spesifiek studente sal bereik nie. Dié nuwe kommunikasiekanaal gee aan ons die geleentheid om `n groter deel van ons gebruikers op kampus te bereik en meer betrokke te raak by studentekwessies.

Daar sal dus voortaan twee-weekliks `n spesiale IT-insetsel op MFM wees op Dinsdae, 11:45 gedurende die AM-PM-show. Aangesien Bits & Bytes reeds `n gevestigde handelsmerk begin word, sal die insetsel ook bekendstaan as Bits & Bytes.

Bits & Bytes op die lug sal nie bloot nog `n institusionele mondstuk wees nie, maar eerder `n geleentheid om interessante tegnologiese verwikkelinge te bespreek. Daar sal ook geleentheid aan studente en personeel gegee word om d.m.v. ons Twitter-voer vrae te vra wat ons op die lug sal beantwoord.

Ons sien uit daarna om komende Dinsdag ons toetrede tot radio te maak en hoop jy skakel Dinsdag om 11:45 by ons in. Kliek hier om na MFM te luister.

Posted in Kommunikasie, Gemeenskapsinteraksie, Konnektiwiteit | Comments Off on IT op die lug

IT skakels

US skakels

Onlangse bydraes

Kategorieë

Argiewe