Op Sondag, 13 Februarie het 27 ywerige BTK’ners die Kromrivier roete in die Limietberg Natuurreservaat aangepak. Die roete begin aam die Worcester kan van die Hugenote tonnel in die du Toitskloofpas en styg geleidelik tot by ‘n asemrowende 70m waterval. Daniël Kotzé en Gerrit Coetzee het die uitstappie gelei. Die groep het besluit om hulself halfpad met ‘n vinnige swem te beloon, ‘n voorsmakie vir wat sou kom. Na ‘n stewige, maar asemrownde laaste klim het die kloof ons begin insluk en die eerste waterval het te voorskyn gekom. Selfs hierdie waterval was die moeite werd om na toe te stap, maar links teen die krans het kettings die pad vorentoe aangedui. Tie minute het almal oopmond die hoë waterval en salige swempoel aangestaar. Dit was nie lank voor die kloof se rustigheid verbreek is met harde gelag en waterbomme van ‘n hoë rots af nie. Selfs ‘n paar brawe meisies het die sprong aangedurf en die groep is beloon deur ‘n tuimelduik van Anton Kraemer. Magies vol, aanstap! Die warm middagson het die groep gedwing om ‘n laaste keer af te koel in die rivier voor ons in die bussies geklim het op pad terug na die werklikheid toe nie. Dankie vir die drie buitelanders wat ook hul staal gewys het. Inderdaad nog ‘n suksesvolle uitstappie!

— Daniël Kotzé  (27-2-2011)

Sondag se Crystal Pools uitstappie was oudergewoonte baie pret. Hierdie uitstappie was heel moontlik een van die laastes na Crystal Pools aangesien die kloof gesluit gaan word vir ‘n jaar en onder beheerde omstandighede oopgemaak gaan word wat die koste heelwat sal opstoot. Hoewel die meeste BTKners nie baie gretig was om die afspringplekke uit te toets nie, het almal darem ‘n poeletjie of watervalletjie ontdek om die dag in te geniet. Game en ‘n paar ander verversing is verwelkom na die pret in die water. Na die warm stappie terug na die motors, het 10 BTKners nog ‘n draai gaan maak by Bikini-strand vir ‘n yskoue afkoel.

— Anton Kraemer (27/02/2011)

Die afgelope naweek se uitstappie was ‘n fees. Agtien BTKners het Vrydagmiddag die akademie agtergelaat vir ‘n wegbreek in die natuur. ‘n Verdere drie wat nog ander verpligtinge gehad het, het eers Saterdagoggend by ons aangesluit. ‘n Hele boks “Oats”-pap is genuttig voordat die pragtige kloof met meer as twintig watervalle aangepak is. Debat is gevoer oor wat nou klassifiseer as ‘n waterval, maar konsensus kon nie bereik word nie. Teen twaalfuur was ons reeds besig om die kloof te verlaat asook die skaduwee van die digte bome. Ons het ‘n ent verder teen die berg opgestap sodat almal darem ‘n idee kan kry van hoe dit nou is om ‘n berg te klim. Nadat Rossouw sowat ‘n kilometer se verkenning gedoen het, het ons weer teruggestap om middagete langs die rivier te geniet. Daar is nie minder nie as ses snye brood deur elke stapper opgeëet. Die sjokolade was in ‘n vloeistofvorm en dit het oorgestaan. Verder in die kloof af het ons onder ‘n waterval geswem terwyl Willem en Sebastian hulle rotsklimtegniek geoefen het. By die kamp het feitelik almal in die dam gaan ontspan met Carike wat gesorg het vir eindelose vermaak. Die aand is afgesluit met die bekende BTK-pasta en die vla-en-“Toppers” poeding asook baie spesiale “hot chocolate”. Vroeg Sondagoggend moes nege BTKners alweer die pad terug aandurf vir persoonlike verpligtinge. Na ontbyt het ons weer opgestap na die tweede waterval wat as outomatiese vryfbedryf gedien het. Terug by die kamp is die tente almal afgeslaan en alles in die motors gepak. Heelwat stappers het ‘n dik uiltjie geknip op die terugpad. As ek die tekens reg gelees het, het almal dit baie geniet en ek glo almal het sommer nuwe energie vir die week wat voorlê.

— Anton Kraemer (20-2-2011)

Ons het die jaar sommer op ‘n hoë noot afgeskop met die tradisionele sjampanje ontbyt op Botmaskop. Die uitstappie het plaasgevind op Sondag 30 Januarie. Omtrent 30 toeriste het opgedaag vir die ondervinding en almal het dit baie geniet. Dit is ook nie elke dag dat ‘n mens sjampanje, Franse-brood en waatlemoen bo-op ‘n berg kan eet terwyl jy die uitsig bewonder nie. Oomblikke wat onthou sal word is Christiaan wat nie die waatlemoen teen die berg uit kon dra nie en dié taak toe aan ‘n eerste toeris oorhandig het, Jacomien wat haar sjokolade tussen die rotse laat inval het en dit toe tussen die dassiemis moes gaan uitgraw, Charlie wat die oorblywende sjampanjebottel laat verdamp het en laastens ek wat almal ‘n voorsmakie gegee het van hoe ‘n harde toer sal wees deur almal met ‘n ompad deur die bossies te lei.

— Anton Kraemer (11/02/2011)