Vir die wat gereeld na die BTK se aanlyn tuiste kom sal hierdie skielike verandering dalk ‘n bietjie skok meebring, maar neem gerus ‘n tydjie om rond te blaai en te kyk wat alles verander het.

Daar is nog baie werk om gedoen te word en ons gaan ons bes doen om die webtuiste in sy volle glorie te hê wanneer die Universiteit weer begin.  Ons sal enige kommentaar, krities en goed, baie waardeer.

Hier is ‘n paar nuwe funksies van die nuwe blad:

• Meer foto’s wat makliker is om deur te blaai en af te laai
• Sien uitstappies en toere op ‘n interaktiewe kaart
• Argief met sketse, uitstappie verslae en notules van 1928 tot nou
• Youtube kanaal met reeds meer as 15 video’s

Uiteindelik is die watertenk bo op die berg. Van links na regs: Reinhardt Venter, Andre Leuvennink, MD Greyling, Charl Ellis, Isak Bosman, Daniël Schoonwinkel, Jacobus Stander en Hugo Minnaar (Johannes Leuvennink het die foto geneem)

Op Saterdag 25/11/2011 het ‘n groep van 8 BTK’ners en ‘n Oud-BTK’ner die water na die terrein van die Berghut op die plaas Belle Vue naby Hermanus aangelê. Dit is die eerste werk wat op die terrein gedoen is en die terrein is nou gereed vir die bouers wat in Januarie gaan begin.

Die vreugde was groot toe die kraan oopgedraai was en daar water uitkom.

Die groep van 9 het hulle baie goed van hul taak gekwyt en die werk sommer vinnig afgehandel, sodat daar nog tyd was om middagete by die waterval te geniet, waar die koue bergwater aangedurf is.

Die BTK sien uit na nog baie genotvolle uitstappies na die berghut en bedank die groep wat deel was van hierdie geskiedkundige oomblik vir die BTK.

–Isak Bosman

Klik hier vir nog foto’s van die uitstappie.

Vriende,

Die Berghut se water is aangelê en die 1500 liter tenk is geinstalleer en vol! Die oorloop word teruggegooi in die stroompie waaruit dit geneem is!

Die pype se opneem was maklik. Ons het die onderste klofie se paadjie verby die poele gebruik. Die tenk se opdra was egter baie moeilik en ongemaklik. Ons het die nuwe voorgestelde kontoerpad se roete gebruik. Ons het baie gesukkel, maar die manne sien kans vir ‘n tweede tenk van 1500 liter in Februarie wanneer die US weer begin. Die keuse van die grootte van die tenk was korrek. Groter sou dit nie tussen die bome deur gemaak het nie. 1000 liter sou nie makliker wees nie, want dit is dieselfde deursnit as die 1500 liter. Die 500 liter sou baie makliker wees want hy is net 80cm in deursnit maar is te klein.

Baie dankie aan Isak Bosman, MD Greyling, Reinhardt Venter, Hugo Minnaar, Daniel Schoonwinkel, Jacobus Stander, Charl Ellis en Johannes Leuvennink.

Groete
André

Klik hier vir nog foto’s van die uitstappie.

Die nuwe bestuur het dit goed gedink om die BTK se website op te gradeer. Saam met die nuwe tuiste is daar ook nuwe inligting en features waarmee ons hoop om u ervaring so lekker as moontlik te maak.

Stuur asseblief enige voorstelle na btk@sun.ac.za.

Maak geskiedenis en kom wees deel van ‘n span wat die waterpyp gaan aanlê na ons toekomstige berghut.

Op Saterdag die 26ste November, die Saterdag na die Gala, gaan ons na die berghut terrein, 10km buite Hermanus. Ons gaan om water vanuit die rivier na die terrein aan te lê wat benodig word vir die bouwerk. Na baie beplanning gaan bouwerk volgende jaar begin. Dit sal die eerste werk wees wat gedoen word op die terrein. Read More