Algemeen
(English) Learn What It Takes to Refuse the Phishing Bait!
Woensdag, Februarie 1st, 2017
Teken uit, sit af
Donderdag, Desember 1st, 2016Dis amper tyd vir vakansie, maar wat van daai lang lysie met goed om te doen? Ons het vir jou een vir die kantoor saamgestel sodat jy nie daaroor ook bekommerd hoef te wees nie.
1. Maak seker dat jou wagwoord nie verval terwyl jy met vakansie is nie. Verander dit liewer betyds sodat jy nie uit jou rekeninge gesluit is wanneer jy terug is in Januarie nie.
2. Tweedens, het jy al verlof ingesit? Ons hoop so, maar as jy nie het nie, lees hier.
3. As jy beplan om jou rekenaar of toestel te gebruik tydens jou vakansie en enigiets verander, opgestel of reggemaak moet word voor dan, bring dit asseblief ASAP na IT. Net soos Kersfeespersente, wag die meeste mense tot op die nippertjie. Dit maak dit ongelukkig moeilik om almal te kan help. Hoe gouer jy dit bring, hoe gouer kan ons jou help.
4. Indien jy eers middel-Januarie weer op kantoor is, maak seker dat die nodige reëlings in plek is en jou kollegas op hoogte is van jou verantwoordelikhede. Byvoorbeeld, persone wie se SUNid-registrasies gedurende die vakansietydperk verval en daarmee saam alle toegang tot die netwerk en geboue. As jy die SUNid-verteenwoordiger is, maak seker daar is `n plan in plek vir die persone vir wie jy verantwoordelik is. Meer oor SUNid hier.
5. As jy gereeld sleutels, selfone, ens. verloor, stel sekuriteit op jou selfoon en sit `n opsporingsmeganisme in plek. Lees ons artikel oor sekuriteit en hoe om jou selfoon op te spoor.
6. Sit jou Outlook Out of Office assistant aan sodat jy nie met `n posbus vol kwaai e-posse begroet word as jy terugkom nie. Volledige instruksies is op Microsoft se webwerf.
7. Laastens, voordat jy jou kantoordeur met `n glimlag agter jou toetrek en met vakansie gaan, moenie vergeet om alle toestelle wat krag gebruik, af te skakel nie. Dit sluit rekenaars, drukkers, laaiers, monitors en ligte in.
Wat is kuberafknouery?
Vrydag, November 11th, 2016Kuberafknouery (cyberbullying) kan gedefinieer word as ʼn opsetlike en aanhoudende poging om iemand leed aan te doen of te teister deur middel van elektroniese tegnologie. Dit sluit toestelle en toerusting soos selfone, rekenaars en tablette in, sowel as kommunikasiemiddele soos sosiale media webwerwe, teksboodskappe, kletsprogramme en webwerwe.
Kuberafknouery, veral onder tieners, het toegeneem met die dienooreenkomstige toename in gebruik van tegnologie. Terwyl kuberafknouery gebruik word vir kinders en tieners, is die term vir dieselfde optrede by volwassenes kuberagtervolging (cyberstalking) of kuberteistering (cyberharassment)
Wat is kuberafknouery of -teistering?
Teistering se hoofdoel is om iemand se reputasie, veiligheid, werk of inkomste skade aan te doen of om ander mense teen hom/haar te laat draai. Die kuberafknouer wil die slagoffer intimideer, seermaak, beheer, manipuleer, verkleineer of valslik diskrediteer. Hulle aksies is herhalend, opsetlik, vyandig en bedoel om skade aan te doen.
Kuberboelies gebruik openbare forums, sosiale media of aanlyn inligtingswebwerwe. Aanlyn platforms gee aan boelies die mantel van anonimiteit en sodoende kan hulle maklik die gevolge van hul aksies verontagsaam, vermy of ignoreer. Volgens ʼn Amerikaanse opname deur die National Council on Crime Prevention glo 81% van tieners dat kuberafknouery plaasvind omdat dit grappig is. A.g.v. die anonimiteit sien of besef die afknouers nooit die skade wat hulle aanrig nie.
Kuberafknouery kom in verskeie vorme voor. Dit kan iemand wees wat aanhoudend ongevraagde e-posse of teksboodskappe aan iemand stuur. Dit kan ook herhaalde dreigemente, seksuele opmerkings, haatspraak, valse beskuldigings of spottery wees.
Sommige teisteraars sal selfs so ver gaan as om by ʼn webwerf in te breek en iemand se inligting te verander of vals stellings te plaas. Hulle kan ook die persoon se persoonlike inligting plaas of ʼn vals rekening skep om die persoon te verneder of in die skande te bring.
Volgens www.wikipedia.org is die 8 algemeenste kuberafknou-taktieke wat tieners gebruik die volgende:
- Uitsluiting: Tieners sluit opsetlik ander tieners uit van ʼn aanlyngroep.
- Kuberafknouing: Tieners kan ander onophoudelik lastig val deur e-posse of boodskappe te stuur of ander in fotos te merk waarin hulle nie gemerk wil wees nie.
- Skinderpraatjies: Plaas of stuur onnodige wrede boodskappe wat iemand se reputasie, verhoudings of selfvertroue leed aan kan doen.
- Blootstelling/Bedrieëry: Oortuig ander tieners om geheime of inligting wat hulle in die verleentheid kan bring te onthul en die inligting dan aanlyn met ander te deel.
- Teistering: Plaas of stuur aanhoudend beledigende, aanvallende en gemene boodskappe.
- Nabootsing: Skep vervalsde rekening om ʼn ander tiener se vertroue te wen. Hulle kan ook by rekeninge inbreek en as die rekeningeienaar boodskappe plaas of stuur wat skade aan die persoon se reputasie en verhoudings kan veroorsaak.
- Kuberdreigemente: Dreig of insinueer gewelddadige optrede teenoor ander om hulle ongemaklik te laat voel.
- Vlampos: Aanlyn argumente wat uit hatige en aanvallende boodskappe bestaan en op verskeie webwerwe, forums en blogs geplaas word.
Verdere definisies van kuberafknouery kan gekry word op die plaaslike Centre for Justice and Crime Prevention se webwerf.
Wie is die afknouers?
Die rede vir kuberafknouery is dieselfde as fisiese afknouery. Die enigste verskil is dat die anonimiteit en gerief van tegnologie dit selfs nog makliker maak.
Iemand wat afknou ken gewoonlik sy teiken en val hulle aan as gevolg van sy eie vooroordele – of dit ras, geloof of seksuele oriëntasie is. Dit kan ook net wees omdat hy dink iemand is nie “cool” genoeg nie of het iets op sosiale media gesê waarmee hy nie saamstem nie.
Dis belangrik om in ag te neem dat ʼn afknouer se optrede gewoonlik voortspruit uit sy eie probleme of kwessies. Volgens Stopbullying.gov is daar hoofsaaklik twee hoofgroepe wat geneig is om ander te teister. Populêre kinders of tieners wat glo deur ander seer te maak sal hulle selfs meer populêr en invloedryk word en aan die ander spektrum diegene wat afknou omdat hulle self afgeknou word en ʼn uitlaatklep vir hulle frustrasie soek.
Hoe om kuberafknouery of -teistering te hanteer
In die meeste lande het kuberteistering dieselfde nagevolge as fisiese teistering. Suid-Afrika het nie spesifieke wette wat fokus op kuberteistering nie. Slagoffers moet hulle dus wend tot kriminele en/of siviele reg. Meer inligting oor die bestaande wette kan gevind word op die Centre for Justice and Crime Prevention se webwerf.
Gevolglik is dit belangrik om kuberafknouery te hanteer sodra dit kopuitsteek. Die video onder gee waardevolle inligting in dié verband.
[BRONNE: http://www.bullying.co.uk/cyberbullying/, http://www.deletecyberbullying.org/why-do-people-cyberbully/, http://www.cyberbullying.org.za/south-african-law.html]
Bewaring via hommeltuig
Donderdag, Oktober 27th, 2016Jy het al die videos op YouTube gesien – uitgestrekte, asemrowende lugskote van areas wat feitlik ontoeganklik is vir die meeste mense. Rhino Africa het Woensdag`n video vrygestel wat met behulp van `n hommeltuig verfilm is. Die video wys die skoonheid van Afrika en die resultate is asemrowend.
Deesdae kan ons toegang kry tot feitlik enige afgeleë area met behulp van`n hommeltuig of UAV (unmanned aerial vehicle) met afstandbeheer, sagteware of ʼn GPS-stelsel. Hierdie vlieënde robotte word “hommeltuie” genoem omdat hulle klink soos die eentonige gedreun van ʼn manlike by.
Aanvanklik is hommeltuie nie net as blote tydverdryf gebruik nie. Die eerste toestelle is aangewend deur die weermag, maar vandag is siviele hommeltuie meer algemeen as hul militêre eweknieë. Na beraming is daar teen 2015 reeds meer as ʼn miljoen verkoop en word hulle gebruik vir kommersiële, wetenskaplike, ontspannings- en landboudoeleindes, sowel as ander funksies soos polisiëring, toesig, lugfotografie en natuurbewaring.
Die idee om UAV’s te gebruik vir natuurbewaring is in Januarie 2011 deur Lian Pin Koh, ʼn natuurbewaringsekoloog en Serge Wich, ʼn primaatbioloog bedink. Dit was egter gou duidelik dat die beskikbare UAV’s te duur was vir ontwikkelende lande waar hulle die nodigste was. Lian en Serge se enigste oplossing was om hul eie, meer bekostigbare weergawe te bou. Die prototipe se koste het uitgewerk op minder as $2,000.
ʼn Jaar later is die prototipe getoets in Noord-Sumatra, Indonesië waar dit meer as 30 ritte onderneem het en duisende hoë-resolusie lugfoto’s en videomateriaal van woude en die natuurlewe versamel het. (https://conservationdrones.org/our-story/)
Na mate Lian en Serge se navorsing bekend geraak het, is die term “Conservation Drone” gebore en teen 2012 is UAV’s ook deur die International Anti-Poaching Foundation.
(https://www.youtube.com/watch?v=FIrgjCNcDBI)
Hommeltuie word reeds wêreldwyd vir natuurbewaring gebruik. Die WWF (World Wide Fund for Nature) het dit in 2012 in die Chitwan Nasionale Park in Nepal, begin gebruik om renosters, tiere en olifante te monitor, maar ook om te dien as ʼn afskrikmiddel vir stropery. In dieselfde jaar Google $5 vir die WWF gegee om hommeltuie aan te koop om gedeeltes van Afrika en Asië te monitor en stropery te bekamp.
Ook in Suid-Afrika is UAV’s suksesvol in die Kruger Nasionale Park teen renosterstropers gebruik nadat Denel Dynamics, ʼn vervaardiger van die tegnologie, dit aan die Suid-Afrikaanse Nasionale Parkeraad geleen het vir natuurbewaring.
In Maart 2014 het die Howard G. Buffett Stigting aangekondig dat hulle 255 miljoen rand skenk vir ʼn driejaar inisiatief, in samewerking met die Natuurbewaringstrust, Suid-Afrikaanse Nasionale Parkeraad (SANParks) en ʼn Suid-Afrikaanse openbare winsorganisasie (PBO). Hierdie inisiatief se doel is om stropery in die Kruger Nasionale Park te beveg en nuwe anti-stropery tegnologie te toets. SANParke toets tans die hommeltuie en vanjaar het die Stigting ʼn verdere 37.7 miljoen gegee vir die aankoop van ʼn helikopter vir gebruik teen stropery bedrywighede. (https://www.savetherhino.org)
In Namibië is hierdie tegnologie deur die Sea Shepherd Conservation Society gebruik om die jaarlikse uitdunproses van robbe te monitor en ook om rensosterstropery in die Etosha Nasionale Park te bekamp.
Ander gebruike vir UAV’s sluit in: opnames van gewasse, lugfotografie, reddingspogings, inspeksie van kraglyne en pypleidings, tel van wild, aflewering van mediese voorrade in andersins ontoeganklik gebiede, die opsporing van persone wat onwettige jag, verkenningsoperasies, koöperatiewe omgewings monitor, grenspatrollie-missies, beskerming van konvooie, bosbrandbeheer, toesig, humanitêre hulp, landmeting, vuur en ongelukke ondersoek, meting van grondverskuiwings, opsporing van onwettige stortingsterreine, die konstruksiebedryf en ook skare beheer.
[SOURCES: https://en.wikipedia.org/wiki/Unmanned_aerial_vehicle, https://conservationdrones.org/our-story/, https://en.wikipedia.org/wiki/Conservation_Drones, https://www.savetherhino.org/rhino_info/thorny_issues/the_use_of_drones_in_rhino_conservation]
Maties toepassing bekendgestel
Vrydag, Augustus 26th, 2016Die blinknuwe 
Maties App is verlede Woensdag in die Neelsie bekendgestel, maar moenie FOMO ontwikkel omdat jy dit misgeloop het nie. Hier is alles wat jy moet weet.
Die Maties App is ʼn gesamentlike poging tussen Informasietegnologie en Maties Sport. Dit het ontstaan met die idee om ʼn enkele platform te skep waar personeel en studente interaksies kan hê oor verskeie aktiwiteite wat op kampus gebied word.
Die toepassing poog om ʼn aktiewe lewenstyl te bevorder en personeel en studente betrokke te kry by kompetisie-gebaseerde leierborde. Gebruikers kan hulle gunsteling Maties sportspanne volg en ook die nuutste resultate, nuus en speelbeurte sien. Studente kan weer tred hou met hul groepe (clusters) of koshuis se plasing in kampuswye kompetisies.
Die doel was om ʼn mobiele toepassing daar te stel wat kan dien as ʼn aanvanklike basis vir verdere ontwikkeling saam met belanghebbendes. Terselfdertyd moes dit dadelik ewe veel waarde bied aan die gebruiker en die universiteit.
ʼn Groter verskeidenheid aktiwiteite en geleenthede sal mettertyd op die Maties App gelys word. Tans kan gebruikers reeds ʼn verpersoonlikte lys van gebeure waarin hulle belangstel en gaan bywoon, sien. Dit kan dan bygevoeg word op jou foon se kalender en met vriende gedeel word.
Soos met ander sosiale media platforms, kan jy sien hoeveel mense ʼn geleentheid of aktiwiteit bywoon. Jy kan selfs aanmeld (check-in) by geleenthede sonder ʼn papierkaartjie deur ʼn QR-kode te laat skandeer.
Aan die ander kant van die spektrum kan organiseerders van geleenthede maklik inligting oor belangrike geleenthede versprei en vinniger en meer effektief studente aktief en betrokke kry. Organiseerders kan ʼn idee kry van die hoeveel geïnteresseerdes en wie aangedui het dat hulle die geleentheid wil bywoon. Dis nie nodig om ʼn ingewikkelde vorm te gebruik nie. Die gebruiker is reeds aangeteken en sy details is sigbaar.
ʼn Ekstra voordeel van die Maties App is dat gebruikers maklik nuwe, opgedateerde inligting oor gebeure, sowel as kampuswye kommunikasie, kan ontvang. Enige boodskap kan direk na gebruikers se fone gestuur word en dit kan geteiken word tot ʼn spesifieke geleentheid of demografiese groep (byvoorbeeld studente, personeel of almal) Hierdie funksie is besonder handig gedurende noodsituasies wanneer inligting vinnig by studente en personeel moet uitkom.
Is jy nuuskierig om te sien hoe dit lyk? Kyk gerus die video hier of lees die artikel op die US-tuisblad.
Die Maties App kan gratis afgelaai word by die Google Play store. Laat weet ons wat jy daarvan dink en wat ons kan doen om dit te verbeter?