Lettere en Sosiale Wetenskappe
Die Departement Musiek aan die Universiteit Stellenbosch is die oudste van sy soort in Suid-Afrika, met ’n ryke geskiedenis van meer as ’n eeu in musiekonderrig, uitvoerende kunste, kreatiewe werk en navorsing. Met ’n gevestigde tradisie van artistieke én akademiese prestasie blink ons oud-studente uit in hul loopbane en dra daadwerklik by tot die plaaslike en internasionale musiekwêreld. Deur innoverende onderrigmetodes te integreer met ’n ryk en uiteenlopende programaanbod, skep ons ’n ruimte waar kreatiwiteit natuurlik ontluik. Hier kan jy jou vaardighede met selfvertroue slyp, nuwe musikale horisonne verken en jou kreatiewe visie ten volle uitleef.
Die departement het sy oorsprong in 1905 as die Suid-Afrikaanse Konservatorium van Musiek, gestig deur musikante wat die behoefte aan formele musiekopleiding raakgesien het. Sedert ons integrasie in die Universiteit in 1934 het ons voortdurend uitgebrei – met ’n sterk fokus op omvattende opleiding, uitvoering en navorsing. Vandag is ons tuiste die moderne Konservatorium-gebou, waar ’n aktiewe netwerk van musikante en dosente floreer. Wat omvang, geleenthede en blootstelling betref, is dit een van die mees uitsonderlike leeromgewings in Suid-Afrika.
Ons bied verskeie voorgraadse opsies aan – insluitend die BMus- en BA Musiek-grade, diplomas en die Hoër Sertifikaat. Toelating behels ’n praktiese oudisie én ’n teoretiese toets. Ons hoë gehalte akademiese en praktiese opleiding berei jou voor vir ’n wye verskeidenheid musiekloopbane – van opvoeding en uitvoering tot komposisie, navorsing en tegnologie.
empty
empty tag
Wat moet ek voorberei vir die oudisie?
Drie kontrasterende werke na eie keuse, wat u vlak van musikale begrip en tegniese vaardigheid weerspieël, is nodig. Die paneel van drie dosente kies twee van die werke wat uitgevoer moet word, alhoewel al drie werke in sommige gevalle nodig mag wees. Die werke (of 'n gedeelte van die werke) hoef nie langer as 20 minute te duur nie. As werke langer duur, kan kandidate gevra word om slegs 'n sekere deel uit te voer.
Is daar ‘n spesifieke standaard waarop ek moet wees met my eerste instrument?
Die minimum standaard vir kandidate wat aansoek doen vir BMus, BA (Mus) en Diploma, is gelykstaande aan graad 7. Daar word nie vereis dat kandidate wel die eksamen geslaag het nie – dit is bloot ‘n riglyn vir ‘n minimum-standaard van voordragwerke. Kandidate is welkom om meer gevorderde werke voor te dra. Kandidate wat werke van minder gevorderde standaard wil voordra, kan ook as voorbereiding vir graadkursusse, vir die Hoër Sertifikaat-program keuring ontvang.
Kan ek aansoek doen vir ‘n departementele beurs?
Alle kandidate wat oudisie aflê kom outomaties in aanmerking vir departementele beurse.
Moet ek ook oudisie aflê met my tweede instrument?
Kandidate hoef nie in Augustus of September oudisie met die tweede instrument af te lê nie. Indien kandidate egter twee instrumente op A-vlak wil neem (dus twee eerste instrumente) moet hulle egter oudise in beide instrumente aflê tydens die amptelike oudisie-periode. Kandidate wat na afloop van die oudisies aanvaar is vir studies kan in die week voordat klasses in aanvang neem, (gewoonlik einde Januarie), plasingsoudisies aflê met hulle tweede instrument. Kandidate kan ook koordirigering of orkesdirigering as ‘n tweede instrument neem. Kontak gerus Mnr Martin Berger vir inligting oor koordirigering by maberger@sun.ac.za of Prof Corvin Matei by corvin@sun.ac.za vir inligting oor orkesdirigering en vereistes vir die oudisie.
Indien ek ver woon vanaf Stellenbosch en nie op die spesifieke datums die oudisie kan kom aflê nie, kan ek op ‘n ander manier oudisie aflê?
Kandidate kan op diskressie vergunning kry om per video aansoek te doen. ‘n Ongeredigeerde video met drie konstrasterende werke kan ingedien word. Kandidate moet egter eers met Yolanda Botha kontak maak yolandab@sun.ac.za om toestemming te kry. Reëlings moet ook getref word om die toelatingstoets af te lê. Kandidate word egter aangeraai om verkieslik die oudisie af te lê op een van die gegewe datums.
Indien ek navrae het, wie kan ek kontak?
Kandidate kan Yolanda Botha by yolandab@sun.ac.za kontak.