Die Rektor se verwelkoming:

Prof Wim de Villiers

Welkom, toekomstige Maties!

Verlede jaar het Covid-19 ons planne vir ’n Opedag in die wiele gery, en ons voornemende studente kon nie fisies ons pragtige Stellenbosch-kampus besoek nie. Ons het egter ons eerste virtuele Opedag-webtuiste geloods en duisende mense van regoor die wêreld bereik.

Daarom doen ons dit vanjaar weer!

Hierdie Opedag-webtuiste gee jou die geleentheid om te sien waaroor die Universiteit Stellenbosch gaan. Jy kan ’n virtuele “toer” onderneem en alles wat ons fakulteite bied, verken.

Om ’n loopbaan ná skool te kies kan skrikwekkend wees, en die senuwees knaag dalk, maar ek hoop dít wat jy hier vind, kalmeer jou senuwees en maak jou opgewonde.

Want om aan die Universiteit Stellenbosch te studeer is werklik ’n opwindende ervaring. Kwalifikasies van ons instelling is gesog, en ons graduandi maak ’n groot impak waar ook al hulle in die wêreld gaan.

Daar is ook ’n rede waarom soveel mense sê hulle studentejare op Stellenbosch was van die beste tye in hul lewe.

forward together,
sonke siya phambili,
saam vorentoe

Onthou, ons is in die top 1% van universiteite wêreldwyd. Ons is inklusief, ons doen baanbrekersnavorsing en werk aan opwindende projekte saam met ander universiteite en instellings van regoor die wêreld. Ons innoveer, en sodoende transformeer ons studente se lewens op ’n positiewe manier.

Ons sien uit daarna om van jou te hoor, en hoop om jou volgende jaar nie meer as ’n toekomstige Matie nie, maar ’n Matie in murg en been op kampus te verwelkom!

Prof Wim de Villiers
Rektor en Visekanselier

Afrikaans